KANDOK 26 - DAÜLANGPÜ LAIHING (BSI)

¹ Shaonyüsha kü shü vüpükei, hahvet shingkü vang keipükei, ngapa kü dhüm shuohpeyü nebahnyih.

² Shing nelingi piteipü ajekha kei, nevaijü khihmang ouha yüteipü keiha, nüngi danghen neshangpü kü thaüvaü nehetnyih.

³ Koyei kü bheipü keiha, gadu kü nyiam maapü keiha, ngapa hük kü bheiyeishuoh.

⁴ Nüngi ngapa hük kü büpa ngapü aimü shah teleitei, Hei nevaijema nüngao büpa leshi leidaihen.

⁵ Ngapa hük kü büpa ngapü aimü shahnyok shuohtuh, Hei nevaijema büpai ngeiyü kon kohpü shennyak shei deihhen.

⁶ Shennyak hükei la langtükpükei, nevaijü iy-aongmakoteihen yempükei, ngapa hük mü shah shomteipeyü nyüke.

⁷ Ngapalei ju kübü kandok shah-ü lakhopai la shüshi kampükei nyüke.

⁸ Ngapa kü dhüm shuohteipeyü nyeikaunglah kü yaong dungpükei nyüke.

⁹ Ngapa hükei ju kübü kandok shah-ü yiüi chokpülei lakei hühthang nopükei nyüke.

¹⁰ Üpai ngapa nevaijü peihpü leipü heüheü müei leihahnya, büpayü jiüjiükei mih kü klong kappükei nyüke.

¹¹ Shi hüki laophüi bhaipü hahnüng leipükei, ngapa hüki laophülei ngadou leiyei leiyei düknyüpeih.

¹² Shennyak hüki laophü nyingi kon kohnyüpeih shei deihhahpü nüngi eela?

¹³ Nehetpa hüki, “Lemnyülei mailang nyüke, longi mangpü shahnyü chingshongei longnyüke” shei enyeih.

¹⁴ Shemsha küpei küpei leipü keiha, nehetpa hüki laophülei shinshingei lemnyeih.

¹⁵ Nehetpa hüki laophülei nükshungei lak deüshi nyunyeih; büpai julei nük anei hahhenao vaknyüpeih.

¹⁶ Shennyak nyeti kon kohshi shahnying epü meyü nehetpa hüki büpa-üng kon kohpeih shei deihnyeih.

¹⁷ Laophülei nang nevaipü kü mih depü kü laophüang shihlangei depeyü, shidhaong kü dükpükei nyüke.

¹⁸ Shennyak hük chingyowpa kü lueilemtepü, “Ngei nyienei epeih” shei epeyü,

¹⁹ Ngapa hük awjung nevaijü leü kohpü lahhan mü ngateipükei nyüke.

²⁰ Pü neshiüjema aw metdainyeih, mihla epü neshiüjema, dehilao dohdainyeih.

²¹ Awtao kü awkhin üpükei, aw kü pü jakpükei, dehilaohüpü shennyaki dehilao vamhünyeih.

²² Mihla epeyü ahshi-üng vüngnyangi nyüke; hapayü longi lümshi lüh-ei shanshihnyeih.

²³ Mongdangei ten tuhtü julei mon shahmei epeyü, haümdük kü honyungi howpükei nyüke.

²⁴ Akhümmong-üm shennyaki julei mon shahmei enyüpeih, shejao mongei mih lomohhühen khenyüpeih.

²⁵ Büpalei shah longi bangnyuhüshi nyulangmao, hapa kü hingtelem; Mehenangkü büpalei mongei jiühitbenüng lem nyet joshi nyüke.

²⁶ Büpalei jiühitnalai lueilemei jolanghen aok, shejao büpalei mang banghthai shingei ngaikahen.

²⁷ Shennyak hüki kahsha shojema, hapa kü büpa-üng vühen; shennyak hüki yaong ngowjema, hapai büpa kü-üng jeephen.

²⁸ Shahshem epü yeijaangi mongkü ma yahpüthü kü jiühitnyeih, hatü yawhpüyangpü jubeni lomoh danghünyeih.