KANDOK 25 - DAÜLANGPÜ LAIHING (BSI)

Nedoh-i Solomonei Kandok Shah

¹ Hathüyü Solomoni epü lebü kandok shahthü Judah amei ongpa Hezekiahlei lakchongbüthüi nyangei tuhpü nyüke:

² Kahvangei müknyinshekhangü shahhidouthü joei tuhhen ha nyüke, shejao ongpalei dou-ü hathü yemei danghen nyüke.

³ Vangsho shaopü keiha, kahdoknyü chüpü keiha, ongpalei mongü neyepaoki nyüke.

⁴ Ngin kü nyupü nedaüpü yaktüktuh, shejüang ngin shükbüi doumei leiyei lingkahen.

⁵ Ongpa toueipü nemeipü yaktüktuh, shejüang büpalei ongching shahhingi lingkahen.

⁶ Ongpa touei nüng nyingi longpü keiha tehu, hatü longpüthü thaishingei uoshing meipü tekhüam;

⁷ Lupülongpüthü touei hai dangpü meyü, “Nüng halei aongei uotuh” shei ehahpü-üng meipüba.

⁸ Nüngi mehe eepa, ha shülangi shahphen shingei tedei; Mih hanei-i nüng veühüshingkü, nüngi dohpülei mehe dükhen?

⁹ Nüngei chingyowpa mü shah kü dakteishingkü mih-ei shahjo ngaiyei te-e;

¹⁰ Hei nevaijema nüngi epü shah danpü hanei ami nüng veühühen, hatü nüngi dangpü menten mechemao nemahdaihen.

¹¹ Jiüshangpü shah epeyü ngin kü hon lükpükei nyüke.

¹² Nyinghahhüpü shennyak kü kon kohpü shennyaki lohpeyü honchü, hatü hon-ow kei nyüke.

¹³ Hahvet hepak kü shü kaongpü keiha, shahhing epü phongmokbü-ü büpa shompüthü touei nyüke; Büpai laophülei shembüthü kü nyiumei koei peinyeih.

¹⁴ Laophüi thintho neshuohhen kü lahtü changmeipüthüyü vang nekei-i phum thih-ei vanglük lükpükei nyüke.

¹⁵ Nenteiaokpai vanglem lembü hük yawhlangnüng aok, inyainyiami shah epai vangao bhagtükaoknyeih.

¹⁶ Nüngi nyahjiü dangjema, nüngi hah-aoksham mon hahtuh; nyeishi hahjema hapa bhaitükhen.

¹⁷ Nüngei chingyow amei chengei tepei; chengei peijema jomi nüng kü tenghen hatü jiühitphahen.

¹⁸ Chingyow khüei shahshem denpü shuohpeyü phung, yanlu hatü lahhan kei nyüke.

¹⁹ Shanghah nyih shahhing ne-epü shennyak kü monglemteipeyü, mangdaipü bha hatü khodaipü la kei nyüke.

²⁰ Mongshangpü shennyak kü kesho lokshuohpeyü, haongket kü ashak nyiuktükpükei, hatü ma kü hüm shihpükei nyüke.

²¹ Nüngei vepathü aeiyei eejema hahhen yah-eishuoh; jomphong yung leyei eejema, yinghen yung yah-eishuoh;

²² Hapakei dükpai nüngi jomei shangjing kü awtao haüshuohnyüke; hatü Shembüpai moihimanphahen.

²³ Pehe vanglüki vang keipü keiha, shah luteipü shennyaki mongshihpü dhe hunyeih.

²⁴ Depülaopü nyüha hük mü shem hük kü nyulei meyü shem adokei aongei dhetshi nyupü-üng meipüba.

²⁵ Tailu kahmük leipü shahjangmeiyü yung leyei üng üdaipü kü yungthüng yingpükei nyüke.

²⁶ Daülangpü shennyak hüki nemeipü am kü lem hupeyü nyaühut nyupü yunglok, nevaijü mak dungdaipü yunglok kei nyüke.

²⁷ Nyahjiü ahshi hahpao nemei; ahshi menlong ngampai yahhen yempao nemei.

²⁸ Laophü nyingi ne-ungne-aeipeyü bham laamdaipü chingnyü kei nyüke.