KANDOK 23 - DAÜLANGPÜ LAIHING (BSI)

-6

¹ Mechem nüngi vanglem lembü hük mü hahyingnüng uohenshang, nüng touei mehe haüshi nyüpa ha meishi veituh.

² Nüngü hahhüyinghaüpü shennyak vaijema, nüngei üng kü longkhoih-i linhahtuh.

³ Nüngi büpalei jiühijaü kü tevaü; mehenangkü hathüyü nüng kü lueilemhen hahying khih.

-7

⁴ Nüng nyingi shemmei leihen tekhe; ha kübü shounglanghen mü kon kohtuh.

⁵ Chem mon eetü hayü nyadaihen; mehenangkü ha kü yang kohtü alang kei phumshangei pidaiphahen.

-8

⁶ Kaungtut shennyakei hahying nüngi tehah; nüngi jomei hetmeiyungma hahhen tevaü.

⁷ Mehenangkü büpai düngei hapalei bhei itei nyunyeih. Büpai nüng kü, “Hahtuh, yingtuh” shei ephahen, shejao büpai hayü hingshangi enyu nevaipih.

⁸ Nüngi maani hahpü kemei bhaitükhen, hatü nüngi shahmei etükpü angsha vaidaihen.

-9

⁹ Ngapa hük danshi nüngi shah te-etei, büpai nüngei kihikon yaktükshasha.

-10

¹⁰ Ammei shongpü viong lemchang kü tephintei, nevaijü hashihhathülei kah lenei teyah;

¹¹ Mehenangkü jomei Yangbü-ü wong kohshi nyüke, hatü büpai jom khüambakahen.

-11

¹² Nyuhpüvenpü kü nüngi mong shuohtuh, hatü nyinghenhinghen kü nüngei dhaong shaangtuh.

-12

¹³ Nüngei hapeü hashih mebü-üng ungei-aeihen shuongei tetuh; Nüngi hanbhi-i bheishuohjao jom nedidaipih.

¹⁴ Nüngi hapakei bheijüang nüngi jom dihen kübü yanglanghen.

-13

¹⁵ Ngelei hapeü, nüngi kon kohshi nyuküjema, ngeiyao mongonghen.

¹⁶ Nüngei jubenyeijaangi mehe jiü, ha eküjema, ngei ngelei mongei mongonghen.

-14

¹⁷ Nüngei mongdangi mang shennyakthü kü mük tehüh, shejao nüngei Shembüpa nyempü kü nyutuh.

¹⁸ Hingmei nüng shingvaishi monglem hük nyüpeih, hatü nüng monglempü angsha nevaidaipih.

-15

¹⁹ Bangtuh, ngelei hapeü, hatü kon kohtuh, hatü nüngei mong jiüshangpü kü kamtuh.

²⁰ Nükchokyiümokpüthü mü tekü, nevaijü hahnempüthü mü tejemtei;

²¹ Mehenangkü nükchokyiümok, hatü hahnempüthü taopa leihen, hatü hahtü shi mon shipai ashakten ümshi nyuhen.

-16

²² Nüngbüh nüngpaümpü ampalei ven dantuh, hatü viünyü leidaijü anyü kü ne-ühneyingi teyakphong.

²³ Shahhing shaklangtuh, hatü hapa teyutük; Kihikon, nyingpühingpü, hatü danaokpü kon shaklangtuh.

²⁴ Daülangpü shennyakei payü longi mongonghen; Üpai kon kohpü hapeü bühhahnya, hapa hapeü kü mongongnyeih.

²⁵ Anyü ampa mongonghütuh; nüngei hümlungnyü mongmeihütuh.

-17

²⁶ Ngelei hapeü, nüngei mongdang ngei kü yahshih, hatü nüngei müki ngelei lemthü kü veituh.

²⁷ Mehenangkü büm yupü nyühayü chülohpü kahsha, hatü mükbongjuyunglayü shoshippü yungkuk.

²⁸ Pinnyü-ü gühpa kei tapei nyunyüke, hatü bahathü longi hingnelempü dahünyüke.

-18

²⁹ Üpai, “Onyükei” shei enya? üpai mongmangnya? Üpai dehilaonya? üpai eelanya? ten nedükpü kü üpai mih ma yahhünya? Üpai mükhaknya?

³⁰ Hathüyü yiü danei nyupüthü; vuktükpü yiü jepei kamteipüthü nyüke.

³¹ Yiü hakpüh-i nyujao nüngi hapa kü tevei, mechem ha pati mongei laukei aonghen, ha inyainyiami lühdainyeih.

³² Shompülei hapai biüi kaokpükei, hatü biütam leü kei nyukahen.

³³ Nüngei müki thamabenüng dou eehen, hatü nüngei mongkü mongongbenüng dou lekahen.

³⁴ Nüngü yungching shangkü shipü keiha deihkahen; Yungching yungmok shangkü lempü keiha deihkahen.

³⁵ “Jomi ngei kü bheiteke, shejao ngei kü nesheüpha; jomi ngei kü üpteke, shejao ngei kü ha leyei nepeinyu. Ngei mechem paohenshang shao-üng yiü danghen” shei nüngi ehen.