KANDOK 2 - DAÜLANGPÜ LAIHING (BSI)

Kihikonei Thintho

¹ Ngelei hapeü, nüngi ngelei shahthü yahjema, hatü ngelei shahkungthü nüngei mongei jaojema;

² Kihikon kü nüngei dhaong shaangjema, hatü danaokpü kon kü nüngei mongdang meejema;

³ Nüngi yao-aokpü kon kü nyükjema, hatü danaokpü kon kü lenjema;

⁴ Nüngi hapa ngin keiha, hatü joshi nyupü mophimo keiha yemjema,

⁵ Nüngi Shembüpa kü nyemhen nyinghen, hatü Kahvang nyinghen kon dangaokhen.

⁶ Mehenangkü Shembüpai kihikon shuohnyüpeih; Büpalei ju kübü nyingpü, hatü danaokpü kon vamnyüpeih;

⁷ Büpai kangshangpüthü shingvaishi kihikon jaoei nyüpeih; Eela neshiüi kampüthü shingvaishi büpayü inyüshung nyüke;

⁸ Mehenangkü büpai kangshangpüthülei lem yomnyüpeih; hatü büpa kü hinglempüthülei lem yangei tuhnyüpeih.

⁹ Shejüang nüngi daülangshemshepü, shahhing, hatü meipü nyingaokhen;

¹⁰ Mehenangkü nüngei mongdangei kihikon shükahen; hatü nüngei laangha mü nyingpühingpai mongmeihen.

¹¹ Kenhingpübai nüng kü veihen, hatü danaokpübai nüng yomhen.

¹² Hapai nüng nemeipü mang lem kübü, hatü shahnyong epüthü kübü yangphahen.

¹³ Kangshangpü lem yakphongtü vangnyak kü kampüthü,

¹⁴ Ten dükpü kü mongongpü, hatü ten lawlüppü kü mongongpüthü;

¹⁵ Lemkaok lemnaok kü kampüthü, hatü lemnuk lemnai kü longteipüthü kübü yangphahen.

¹⁶ Hapai nüng mongnehingpü nyüha, hatü inyainyiami yawhpüyangpü mükbongjuyunglalei jucheü kübü,

¹⁷ laophülei la den kübü baha yakphongpü, hatü Kahvang mü vangpüshuwpü mangtükpü nyüha kübü yangphahen.

¹⁸ Mehenangkü pinnyülei shem dipü lemei münyüke; hatü pinnyülei lemü yimchingei münyüke.

¹⁹ Üami pinnyü touei heihnya, nyokei neleinyu, nevaijü yangnyu lem nedangnyu.

²⁰ Hanangkü shennyakmeilei lem kü kamtuh, hatü daülangpülei lemshong kü daituh.

²¹ Mehenangkü kangshangpüthü hapa kahdok kü nyuhen, hatü daülangpüthü halei nyuhen.

²² Shejao mang shennyakthü hapa kahdok kübü mahtükhen, hatü nemeipüthü haleipü bhitükhen.