KANDOK 19 - DAÜLANGPÜ LAIHING (BSI)

¹ Shahshem eshi ngapa hük vaileimeyü, shahhing eshi taopa vaipü-üng meipüba.

² Nyingpü neshiüi nyakpükenpeyü nemei, hatü üpai shülangi moknya, lem pungtüknyeih.

³ Shennyak hanei-i laophü nelipai vongshüh pongshingkü Shembüpa küang eelanyeih.

⁴ Mopi küphü anaü longi dangnyeih, shejao taopa hükü küphüthüi yakphongnyeih.

⁵ Shahshem denpü shuohpüthü nehanghi-i nenyupih, hatü shahshem epüthü neyangaokpih.

⁶ Longshi shingi lupülongpülei yahyang shinshang yemnyeih, hatü peüi thintho shuohbülei mongjem vaihünyeih.

⁷ Taopa hük kü laophülei nenhisheni dangkao jiühitjema, büpalei küphüthüi meshükang jiühithenang! Büpai jom kü nyükei müjajao jom meleiyao neheüpih.

⁸ Üpai kihikon dangnya, büpai laophü bamnyüke; Üpai nyingpühingpü kü kennya, angpüdeipü leinyüpeih.

⁹ Shahshem denpü shuohpüthü nehanghi-i nenyupih, hatü shahshem epüthü mahhen.

¹⁰ Ngapa hük bhashahshi nyuhen nebah-angpih; Aa hük ongthü shak kü vanglem lemhen nemei.

¹¹ Shennyak hüki laophü kü nyupü kihikoni nenteiaokei leinyüpeih; Hanei ami shaiyei dükphü shingkü chahmaoh shei tuhpeyü laophülei müknyinshekhang.

¹² Ongpa hük mongshihpeyü mailang hük mongshihpükei nyüke; shejao büpalei phahjiyü phenni shang kübü nyien kei nyüke.

¹³ Hanga hüki laophülei pa lomohhünyeih, hatü depülaopü nyüha hükü nedoh-i vangmangpükei nyüke.

¹⁴ Shem hatü mophimo-ü nyühipa leipü mükjüp; shejao kenhingpü nyühayü SHEMBÜPAleipü nyüke.

¹⁵ Nehetpü shennyaki shishi mon themnyeih; hatü neshünenyiükpü shennyaki aeipü eenyüpeih.

¹⁶ Üami nyuhpüvenpü kü bangnya, yemmü nyuhen; üami ha kü nelinya, dihen.

¹⁷ Üami taopathü kü phahji hunya, büpai Shembüpa kü lushuohpü vainyüke, hatü büpa kü hathü nyokei shuohhen.

¹⁸ Linghen hepak kü jiüshi hapeü ungei-aeituh; shejao jom lomohhühen nüngi teyem.

¹⁹ Mongshih nemeipü shennyaki hanghi danghen; nüngi büpa yangei tuhjema, nüngi shao ha dükhen vongbong.

²⁰ Shahnying epü bangtuh, hatü nyuhpüvenpü yahtuh, hatü shompülei nüng kon kohpü am leihen.

²¹ Shennyakei mongkü küpjan longi temhen aok, shejao Shembüpalei mükhong-üng jiüshasha.

²² Shennyak hüki bampü nanyüpeih; hatü shahshem eleimeyü taopü-üng meipüba.

²³ Shembüpa kü nyempeyü yangnyuyem; hatü hapa angpü ami mongongshi neshanghah-inyunyüpeih.

²⁴ Nehetpü shennyaki laophülei lak nükshungei haünyeih, hatü haleipü laophülei juleiyao noei neanaoknyih.

²⁵ Nebahnevaipü shennyak hük kü bheijü nyinghen ami kenhingdainyeih; Nahpülangpü shennyak hük kü lohshuohjü nyingpühingpü dangnyeih.

²⁶ Üpai laophülei pa kü nemei-i düknya, hatü hümlungnyü changtüknya, hapa hapeüi veüpong, hatü shanghah koei peinyüpeih.

²⁷ Ngelei hapeü, nyuhpüvenpü nebangi dohdaijema, nüngi nyingpühingpü kübü yandaihen.

²⁸ Ten denpü shuohpai shahhing küang eelanyeih; hatü mang jui ten lühnyüpeih.

²⁹ Eelapüthü shingvaishi hanghi, hatü ngapathü shingvaishi bheihen temei nyüpeih.