KANDOK 18 - DAÜLANGPÜ LAIHING (BSI)

¹ Mih mü nekünejempü shennyakü laophü shing mon deihnyeih; Mih peüi jiüpeih shei epü kü nejiüang shei mon enyeih.

² Ngapa hüki nyinghahhen kü mongneongnyih, shejao laophüi deihpü mon ehen kennyüpeih.

³ Mechem mang peihenshang, nyonghühenao peinyüpeih, hatü veüpong mü lomoh-ao peinyüpeih.

⁴ Shennyakei ju kübü shahthüyü yungching ilangmong kei nyüke; hatü kihikon vamshingü yunglok bhaoshing kei nyüke.

⁵ Pungpüthü kü khüam bakhen napü neshiü; nevaijü nepungpüthü kü jiüpü nedüki tetuh.

⁶ Ngapa hükei jubenyeijaangi dehilao koei peinyeih, hatü büpalei jui lak-ap püshow yemhahnyeih.

⁷ Ngapa hükei jubenyeijaang homei laophü-üng lomohnyeih, hatü laophülei yeijaangi-üng laophü kü hühhihang vaihahnyeih.

⁸ Mih-ei la epeyü ahshi-üng vüngnyangi nyüke; shennyaki hapa vüngnyangi lühnyüpeih.

⁹ Nehetpü shennyakü dou mangteipü shennyakei jeihinaü.

¹⁰ Shembüpalei menü wong kohpü shangdü; daülangpüthü halei mokei shünyeih hatü yangdainyeih.

¹¹ Shemmeithüi jomei mophimo-ü penyü showtükpü chingnyü; mechemao nelaamdainüng kei deihnyeih.

¹² Lomoh mangpong shekü shennyakei mongkü changmeiyei deihnyeih; shejao nenteiaokpüthü kü dhüm shuohnyüpeih.

¹³ Hanei-i banghen shekü shah leijema, büpayü ngapa hatü hai danghen.

¹⁴ Tüngpü hepak kao ngei meihen shei laang monglongjema, meihen; shejao ngei sheyü hajük khih shei laang mahdaijema, monglemhenü jaangdaiteke.

¹⁵ Nahpülangpü sholi-i nyingpühingpü yahnyüpeih, hatü kon kohpülei dhaongi kihikon yemnyüpeih.

¹⁶ Thintho hüki lem apnyüpeih; hapai lupülongpü mü pongei eteiaoknyeih.

¹⁷ Shahphen shingei khüei yaongpü shennyaki khüei shah mange thahshi shongei epü shennyak jiüpükei deihnyüpeih.

¹⁸ Phongyompai pa nyi depü nentükhünyeih, hatü depü nyi yantüknyeih.

¹⁹ Jeihinaü hük mü mongmangteipeyü wong kohpü chingnyü kei; hatü büpa mü depeyü chingnyü hük penyüsha küplangpükei nyüke.

²⁰ Shennyak hükei ju kübü vampai shümoh meiyei nyunyeih; hatü laophülei yeijaang homei hüshemei nyunyeih.

²¹ Yangnyu nyuhen hatü dihenü laophülei yeijaang kü kohshi nyüke; Üami ha kü bamnya, hapalei betjük danghen.

²² Üpai nyüha hük dangnya, büpai doumei hük dangnyüke, hatü SHEMBÜPAleipü phahji dangnyüke.

²³ Taopa shennyaki inyainyiami khümei yünyüpeih, shejao shemmeipai shahlong enyüpeih.

²⁴ Küphü haneiyü neshennejungnyih; Küphü haneiyü laophülei cheihinaü mao mongkhen-püba nyunyüpeih.