KANDOK 16 - DAÜLANGPÜ LAIHING (BSI)

¹ Hangkui mongei küpjan temnyüpeih, shejao hapa kü jangpeyü SHEMBÜPAleipü peinyüpeih.

² Peüi laophülei lemthüyü jiüpeih shei mon deihnyüpeih, shejao Shembüpai mongdeih doknyüpeih.

³ Nüngi dükpü lemphü Shembüpa kü lanei shuohtuh, shejüang nüngei küpjanthü kü aokpü danghen.

⁴ Shembüpai lemphüli mükhong tuhtü lingpeih; nemeipüthüao shangpongpü nyih shingvaishi lingpeih.

⁵ Changmeipüthü kemei Shembüpa touei jiühitbenüng nyüke; hathü nehanghi-i nenyupih shei nyingtuh.

⁶ Bampü hatü hinglempai mang tükpü dangnyeih, Shembüpa kü nyempü homei shennyak hüki ten kübü yangdainyüpeih.

⁷ Mechem shennyak hükei lemthüi Shembüpa mongmeihühen, büpai laophülei vepa-ao chingmei kü tuhnyeih.

⁸ Shahhing ne-epü mop longi anglei meyü, shahhing eshi maani angpü-üng meipüba.

⁹ Hangkulei mongdangi küpjan temnyüpeih, shejao lakham ieyei kü Shembüpai münyüpeih.

¹⁰ Ong hüki shahphen shuohpeyü Kahvang leipü kei enyüpeih; shahphen shuohshingkü büpai mang nethahnyih.

¹¹ Dok jiüshangi dokpeyü Shembüpalei, shahhingi bhei leihpeyü büpalei.

¹² Ongthüi douten dükhenü jiühitbenüng; mehenangkü ong uoshingü daülangshemshepai lingpeih.

¹³ Shahhing epü jubenyeijaang kü ongthüi monghahnyeih, hatü shahhing epüthü kü büpai vihheki nonyüpeih.

¹⁴ Ongpa hükei mongshih-ü dipülei phongmokbü; shejao kon kohpü shennyaki mongonghüei tuhnyüpeih.

¹⁵ Mechem ongpa hükei dhe ngaihühen, halei yangnyu nyüpeih; büpa shinshangpeyü ühilem baong kü vang keipü kei nyüke.

¹⁶ Hon mao kihikon danghen-üng mekei meipa! Ngin mao nyingpühingpü yahhen mekei meipa!

¹⁷ Kangshangpü amei lem kü mang neshiü; jomi laophülei laangha yaongei tuhnyüpeih.

¹⁸ Changmeipai mahlemei münyüpeih, maühepai donyüpeih.

¹⁹ Changmeipüthü mü dounyünangba hantei leimeyü, taopathü mü maanpü leiyei nyupü-üng meipüba.

²⁰ Üami nyuhpüvenpü kü kenhingei nyunya, dapüshepü leinyüpeih. Üami Shembüpa kü hinglemnya, jomphong mongong.

²¹ Kon kohpülei mongdang kü yao-aokpü kon nyüpeih; shahhingü meipai yawh-eiyangei leiaoknyeih.

²² Kon kohpüthü shingvaishi kihikonü yangnyu yunglok; shejao ngapa kü nyuhteipai lomoh pongnyüpeih.

²³ Kon kohpü shennyaki ehen shekü düktü enyüpeih, hatü jomei jubenyeijaangi yawh-eiyangei enyüpeih.

²⁴ Shahmei epeyü nyahjiü kei, nüngei laangha kü vüngnyangi, büm shingvaishi meishi nyüke.

²⁵ Shennyak hüki jiüpeih shei deihpü lem hanei nyüke, shejao dohpülei hapa lemü dipü touei münyüpeih.

²⁶ Dou dükbü hüki aeihen deihtü dou kheyei düknyüpeih; mehenangkü büpai shümoh meihünyüke.

²⁷ Nemeipüthüi mih kü ten dükhen temnyüke, hatü büpai epüsheipeyü aw shaampükei nyüke.

²⁸ Shahnyong epü shennyaki nekünejem vamhünyeih, hatü la-ejomshopai küphü yantüknyeih.

²⁹ Mih kü iy-aongmashateipü shennyaki laophülei küphü yawh-ei ten lemei mülangnyeih.

³⁰ Üpai müki shah enya, büpai ten temnyüke; Üpai juben yowteinya, büpai mang vamhünyeih.

³¹ Shosho pungshi yangnyu nyupeyü müknyinshekhang athen; hapayü hingshangpü yangnyui dangnyüpeih.

³² Ve hokbü vaileimeyü nenmünyupü-üng meipüba; chingnyü hük hahpü meyü laophülei mongshih ungei aokpü-üng meipüba.

³³ Kahvangi mongpü nyinghen shingvaishi phongyomnyeih, shejao ha nyinghenü Kahvang leipü jangpü peinyüpeih.