KANDOK 15 - DAÜLANGPÜ LAIHING (BSI)

¹ Inyainyiami epai mongshihpü meitüknyeih, shejao shahwong epai mongshih nyeinya vamhünyeih.

² Kon kohpü shennyakei yeijaangi kon meipü vamhünyeih, shejao ngapalei ju kübü ngashahyoishah bhainyüpeih.

³ Shembüpalei müki lemphüli eenyüpeih; ten hi mei lemphü kü veishi nyunyüpeih.

⁴ Bampü shahthüyü yangnyu pü, shejao shahlüpshahlu epai laangha ngümtüknyeih.

⁵ Ngapai nyühipai nyuhpüvenpü yaktüknyeih, shejao yeanpü kü lipai kenhingmonghapü hunyüpeih.

⁶ Daülangpüthülei shem kü mophimo longi nyüpeih, shejao nemeipüthülei mopi shanghah koei peinyüpeih.

⁷ Kon kohpüthülei ju kübü nyingpühingpü yaannyüpeih; Ngapathülei thentoimongdang kü ha neshiü.

⁸ Shembüpai nemeipüthülei moila kü jiühitnyeih, shejao kangshangi nyupüthüi phoppü kü büpai mong hahnyeih.

⁹ Shembüpai nemeipü amei lem kü jiühitnyeih, shejao üami daülangpü yemnya, büpai hathü kü bamnyeih.

¹⁰ Lem bienei daipü am kü hanghihühen danei nyüke; Üpai yeanei epü kü jiühitnya, dihen.

¹¹ Dipü hatü mahpeyü Shembüpa touei aptüktü nyüke, mekei shennyak hüki deihpü Kahvang touei joaokhen?

¹² Nebahnevaipüthüi yeanei epü yaktüknyeih; jomi kon kohpü am touei nepeinyih.

¹³ Mongongpü mongdangi dhe ngaihünyeih, shejao mongmangpü mongdangi laangha mangtüknyeih.

¹⁴ Yao-aokpü mongdangi nyingpühingpü yemnyüpeih, shejao ngapalei jui ngashah enyüpeih.

¹⁵ Taopathülei nyihthü kemei tok vainyeih, shejao mongongpü mongdangü nedoh-i mopükei nyunyeih.

¹⁶ Mop longi angtü shanghah-i maei nyulei meyü, Shembüpa kü nyemshi maani angpü-üng meipüba.

¹⁷ Jiühitpai maei mohohbaong jüei mo molei meyü, bampai maei nükhüng hahpü-üng meipüba.

¹⁸ Mongdang nemeipü shennyaki dehilao vamhünyeih, shejao nenteiaokpü shennyaki dehilao nentükhünyeih.

¹⁹ Nehetpü shennyakei lemü hühhihangi phüngdainyeih, shejao daülangpüthülei lemü banghlem kei nyüke.

²⁰ Kon kohpü hapeüi laophülei pa mongonghünyeih, shejao ngapü shennyaki laophülei nyü yakphongnyeih.

²¹ Sholi neshiüpü shennyak shingvaishi ngadounganangü mongongbenüng, shejao danaokpü shennyak hükü sheshalei dainyüpeih.

²² Shahnying nehanteipheikü küpjanthü shaidainyeih, shejao shahnying epü longi nyujü aokpü dangnyüpeih.

²³ Jiüpü shahnyok shuohpai shennyak hük mongong dangnyüpeih; hepak kü jiüshi shahmei epeyü meshük meipüang!

²⁴ Kon kohpü shennyak shingvaishi yangnyu lemü dipü lemei nevai, shanglemei münyeih.

²⁵ Shembüpai changmeipü shennyakei bükhishem bentüknyeih, shejao büpai vaümnyülei viong khak jiüshi tuhnyeih.

²⁶ Shembüpai nemeipü küpjanthü kü jiühitnyeih, shah meipü kü büpai mongongnyeih.

²⁷ Hahnempü shennyaki laophülei shemong kü shanghah koei leinyüpeih, shejao üpai yawhdou kü jiühitnya, yemmü nyuhen.

²⁸ Daülangpüthülei mongdangi mekei shahnyok shuohhendeih-ei veinyüpeih, shejao nemeipüthülei ju kü ten bhaoei vamnyüpeih.

²⁹ Nemeipüthü toueipü Shembüpa taishi lüdaiteke, shejao daülangpüthüi phoppü büpai dannyeih.

³⁰ Dhe ngaiphah-i veipai mong kü mongong shuohnyüpeih, hatü shahjang meipai büm kü wongja vamhünyeih.

³¹ Yeanpü kü bangjema, nüngü kon kohpüthü mü nyuaokhen.

³² Üpai yeanpü kü ne-ienelemnya, laophü nyingi jiühithahnyüke, shejao üami yeanpü kü linya, danaokpü kon dangnyüke.

³³ Shembüpa kü nyempai shennyak hük kü kihikon nyuhnyüke, hatü dhüm dangshekü nenteiaokpü peinyüke.