KANDOK 13 - DAÜLANGPÜ LAIHING (BSI)

¹ Kon kohpü hapeüi laophülei pa-i venpü kü bangnyüpeih, shejao venlepü hapeüi yeanpü neyahnyih.

² Jomei shah kübü vampü betjüki meipü shennyakthüi doumei dangnyüpeih, shejao nemeipü shennyakthüi ten dükhen kennyüpeih.

³ Üami laophülei jubenyeijaang shümaoknya, jomi laophülei yangnyu yangei tuhnyüpeih, üami nelineha-i vapvapnya, mahpü pongnyüpeih.

⁴ Nehetpü shennyaki lemphü kü vaaüei deihnyüpeih, shejoong meheyao nedangnyih, shejao dhaümshi dükpü ami laophüi napü hüshemei dangnyüpeih.

⁵ Daülangpü ami shahshem kü jiühitnyeih, shejao nemeipü ami neveüi hatü nephahji-i düknyüpeih.

⁶ Daülangshemshepai hingshangpü shennyak yangnyüpeih, shejao mangi mang shennyakthü lomohhünyüpeih.

⁷ Hanei ami meheyao neshiüshiüi lemphü angpükei hunyüke; shejao lebü hanei-i lemphü angtü taopa kei hunyüke.

⁸ Shemmeipai laophülei büm yanghen nangkü mophimo nonyüke, shejao taopa kü üpaiyao nyem neshaonyih.

⁹ Daülangpüthüyü vangngai kei nyanyüpeih, shejao nemeipüthülei awdük metdainyeih.

¹⁰ Changmeipai dehilao vamhünyeih, shejao mih-i venpü yahpüthü mü kihikon nyüpeih.

¹¹ Shahhing ne-epü mop shodaihen, shejao maani maani thaipü amei mop longnyüpeih.

¹² Monglempü nejiüjü mong kü tüngnyüpeih, shejao monglempü jiüpeyü yangnyu pü nyüke.

¹³ Üami nyuhpüvenpü yaktüknya, laophü nyingi mahhen koei peihahnyüke, shejao üami shahkungnyü kü dhüm shuohnya, thintho danghen.

¹⁴ Kon kohpü shennyaki nyuhpeyü yangnyu yunglok; hapai shennyak hük dihen kübü yangdainyeih.

¹⁵ Danaokpü meipai phahji yahyang dangnyüpeih, shejao hingnelempü amei lemü mahlem nyüke.

¹⁶ Kenhingmonghapü shennyak peüi nyingpühingpü homei dou düknyüpeih, shejao ngapa hüki laophü ngapü hunyüpeih.

¹⁷ Nemeipü phongmokbüi vongshüh koei leinyüpeih, shejao hingshangpü phongmokbüi chingmei shah konyüpeih.

¹⁸ Taohinang hatü lomoh aühaü peü venlepüthü shing nyüke, shejao yeanpü kü lipü shennyaki dhüm dangnyeih.

¹⁹ Napükenpü jiüpeyü laangha kü vüngnyangpü dangpü nyüke, shejao ngapa hük nemeipü kübü yanhenü jiühitbenüng nyüke.

²⁰ Üami kon kohpüthü mü kamnya, nah-eilangei leidainyeih, shejao nemeipü am mü mongjem pongpai lomoh heünyüpeih.

²¹ Mangthü kü shanghah vongshüh-i changnyüpeih, shejao daülangpüthüi moihiman thintho dangnyüpeih.

²² Shennyakmei hüki hüdenhalenshi mükjüp tuhnyüpeih. shejao mangthülei mopü daülangpüthü shing jaopüvaidainyüpeih.

²³ Taopalei kah kü betjük longi jükhen aok, shejao shahhing ne-ejema maodaihen.

²⁴ Üami laophülei hapeü kü hanbhi nebheinya, jiühitpü leinyüke, shejao bampüthüi hapeüthü ungei-aeinyüpeih.

²⁵ Daülangpüthüi mong hüshemei hahnyüpeih, shejao nemeipüthü düngei aeiyei nyunyüpeih.