KANDOK 10 - DAÜLANGPÜ LAIHING (BSI)

Solomonei Kandok Shahthü

¹ Hapayü Solomonei kandok shahthü: Kon kohpü hapeüi pa kü mongong koei leinyüpeih, shejao ngadaipü hapeüi nyü thenshang mongtünghünyeih.

² Shahhing ne-e-i dangpü mopü nanglei neshiü, shejao daülangshemshepai dihen kübü yangnyüpeih.

³ Shembüpai mechemao daülangpüthü aeiyeileyei netuhnyih, shejao büpai nemeipüthü napü kemei küptüknyeih.

⁴ Neshünenyiükpü laki shennyak hük taopa leitüknyeih, shejao shüeinyiükei dükpai shemmei leinyüpeih.

⁵ Üpa hapeüi shaonyü yangkü hahying thaiyei tuhhahnya, büpayü hingshangpü hapeü, shejao üpai hahvet hepak kü shidainya, hai dangnyeih.

⁶ Daülangpülei shangjing kü moihiman athen thennyüpeih, shejao nemeipü amei jukü ten jaoei tuhnyüpeih.

⁷ Daülangpüthüyü moihiman kei deih-ei danghen, shejao nemeipü amei menü betükhen.

⁸ Kon kohpüthüi epü shah mongei jaolangnyeih, shejao vapvappü ngapayü mahdaihen.

⁹ Üami shahhing kü kamnya, nenyemi kamnyüpeih, shejao üami lemkaok kü kamnya, yephahshasha.

¹⁰ Üami müki shah enya, vongshüh vamhünyeih, shejao vapvappü ngapayü mahdaihen.

¹¹ Daülangpülei ju kübü shah-ü yangnyu yunglok, shejao nemeipüthülei ju kü ten jaoei tuhnyüpeih.

¹² Jiühitpai dehilao vamhünyeih, shejao bampai ten peü jümlangnyeih.

¹³ Danaokpü shennyakei jubenyeijaang leipü kihikon dangnyüpeih, shejao sholi neshiüpü shennyaki nyiamlüngi bheiphahen.

¹⁴ Kon kohpü shennyaki nyingpühingpü jaoei tuhnyüpeih, shejao ngapalei shahvangjusha-i mahhen nyükhahnyeih.

¹⁵ Shemmeipalei mopü jomei penyüsha, shejao taopathü taopeyü jomei mahlem.

¹⁶ Daülangpülei lat-ü yangnyuyem dangnyüpeih, shejao mang shennyakei lat-ü hanghi dangnyüpeih.

¹⁷ Üami venpü shah kü kenhingnya, yangnyu lem kü dainyüke, shejao üpai yeanpü shah yaktüknya, lembien kü dainyüke.

¹⁸ Shahshem epü jubenyeijaangi jiühitnalai joei tuhnyeih, hatü üami lueilemei enya, hapayü ngapa khih.

¹⁹ Mechem shah ahshi enya, mang neomi nenyu, shejao laophülei yei yepei tuhpeyü kon kohpü.

²⁰ Daülangpü shennyakei shah-ü meipü ngin; shejao nemeipü amei mongdangü nanglei maani mon.

²¹ Daülangpü amei jubenyeijaangi mih nanglei danghünyeih, shejao ngapathüi kon neshiüi dinyüpeih.

²² Shembüpalei moihimani shemmei leihünyeih, hatü büpai ha kü shanghah neshuohnyih.

²³ Ngapa hüki ten dükpü kü mongongnyeih, shejao danaokpü shennyaki kihikon kü mongmeinyeih.

²⁴ Nemeipüthüi mepa kü nyemnya, hapaang jom kü peijahen, shejao daülangpüthü napeyü shuohhen.

²⁵ Mechem yinglükleisho peihen, nemeipüthü maolanghen, shejao daülangpüthü chongkhenei nyuhen.

²⁶ Bha kü thiok keiha, mük kü awshit keiha, nehetpü shennyak kü dou dükhen kangteipeyü nyüke.

²⁷ Shembüpa nyempü kü yangnyu ünyüpeih, shejao nemeipüthüi denshohvanloh pongnyüpeih.

²⁸ Daülangpüthüi monglempü kü mongong nyüpeih, shejao nemeipüthüi omdanpeyü angsha vaidainyeih.

²⁹ Daülangpüthü shingvaishi Shembüpalei lemü jom loishing, shejao nemeipü dükpüthü shingvaishi mahhen nyüke.

³⁰ Daülangpüthü mechemao nebhitükhen, shejao nemeipüthü hapa kahdok kü nenyuhen.

³¹ Daülangpü shennyakei jubenyeijaangi kihikon koei peinyeih, shejao shahnyong epülei ju dohtükhen.

³² Daülangpülei jubeni mehe jiü, ha enyüpeih, shejao nemeipülei jui mih lomohhen enyüpeih.