KANDOK 1 - DAÜLANGPÜ LAIHING (BSI)

Shahsha Appü

¹ Hapayü Israel amei ongpa, Davidei cheha Solomonei kandok shahthü nyüke:

² Kihikon hatü lem hupü nyinghen shingvaishi, hatü chüpü shahthü yao-aokhen shingvaishi;

³ Kenhingmonghapü yangnyu, jiüpü, shahhing hatü meipü danghen shingvaishi;

⁴ Nenyingpüthü kenhingmonghahühen; hashih naüha kü nyingpühingpü, hatü lihenhahen nyuhhen shingvaishi;

⁵ Nahpülangpüthüiyao bangtuh, hatü shao nyingpü ühahtuh; hatü yepaokpüthüi lem müpü shah nyinghahtuh;

⁶ Kandok hatü shahlapthü, hatü nahpülangpüthüi epü chüpü shahjothü nyinghenshingvaishi;

⁷ Shembüpa nyempeyü nyingpühingpü chongpangpü; shejao ngapai kihikon, hatü nyuhpüvenpü yaktüknyeih.

Küphüten Mü Nejemhen Epü

⁸ Ngelei hapeü, ampai nyuhpü bangtuh; anyüi venpü teyakphong.

⁹ Hathüyü nüngei shangjing kü chübongale shihpükei, hatü üngkam baongei honyük yükpükei nyüke.

¹⁰ Ngelei hapeü, mang shennyakthüi nüng kü yawhphüjü, jomei yawh kü teshü.

¹¹ Jomphongi, “Ham mü daishah; hanei am jühen tapshah; meheyao ten neshiüjao hanei am lomohtükshah;

¹² Mahngchongi kei jeni hanei am yemmü lühtükshah; hatü kahsha kü dempükei dhaomü lühtükshah;

¹³ Shejüang doumeinangmei longi danghen; aetpüshepü douhinangi jenei shem matükhen.

¹⁴ Nüng ham mü haokei, hatü jeni dangpü lemphü hanteihen” shei ephüjema;

¹⁵ Ngelei hapeü, nüng jom mü tedai; jomei lem kü nüngei la-i teshoup;

¹⁶ Mehenangkü jomei layü mang lemei, hatü shennyak jühen moknyüke.

¹⁷ Outhüi eeshi tai haenpeyü angsha dou hih;

¹⁸ Hathü shennyakthüi laophü nyingi mahhen; hatü laophülei yangnyu lomohhen shingvaishi tapei dannyüke.

¹⁹ Shahhing ne-e-i mop napüthü peü kü hapakei dohpü peinyüke. Gühpai-üng gühpa heüei jütüknyüke.

Kihikoni Nyükpü

²⁰ Bangtuh! Kihikoni wongmü chingshongei, hatü banghjüm shingei lenei nyüknyüke;

²¹ Pinnyüi banghthai shingei lennyüke; hatü chingnyü penyüsha leipü enyüke:

²² Ngapathü, hepak meshük am ngalem kü nyuhenang? Hepak meshük eelapüthüi eelahen kü mongmeihen?

²³ Ngei lohpü kü lihahtuh; Ngelei mongdang leipü shahnying meipü, hatü ngei deihpü kemei ngaiyei am kü ephüshah.

²⁴ Ngei am kü nyükjü ami ha nebang; mechem ngei ngelei lak nopa, üpaiyao ha kü neli.

²⁵ Ammi ngelei shahnying kü ne-ienelempü nangkü, hatü lohpümangpü neyahpü nangkü;

²⁶ Am ponghahpü nyih kü ngei am kü nyihen; am shangpong yakying shingkü;

²⁷ Mechem yinglükpalei keiha ammi hanghi ponghen, hatü alüngleple keiha shanghah peihen, mechem tokvai hanghi am touei peihenshang, ngei am kü eelahen.

²⁸ Hahepak kü ammi ngei kü nyükhen; shejao ngei am kü nejanghen; Ammi ngei yemhen, shejao ngei nedanghen.

²⁹ Mehenangkü ammi kihikon kü jiühit; hatü Shembüpa kü nyemhen nejehah;

³⁰ Ammi ngelei shahnying meipü neyahpü nangkü, hatü ngei lohpümangpü yaktükpü nangkü;

³¹ Ammi ammei betjük danghen; hatü ammi temhahpü küpjani am lomohhen.

³² Mehenangkü kihikon kü venlepüthü laophü nyingi yemei dinyeih; Laophü kü laophüi monglempü ngapathüi mahpü pongnyüpeih.

³³ Shejao üami ngei epü bangnya, yangei nyuhen; büpa nyempühanpü neshiüi nyiushemmei kü nyuhen.