KAHBHAO 9 - DAÜLANGPÜ LAIHING (BSI)

Kahvangi Noah mü Vangteishuwteipü

¹ Kahvangi Noah hi chehathü kü moihimanei e, “Hahimoi büh-ei daeisheyei kahdoknyü mahütuh.

² Kahdok shak kübü yemhimak, ouhiyüh hatü yungching kübü nyahthü peü am kü nyemei nyuhen. Hathü kemei ammei lak kü shuohnyeih.

³ Ngei am kü phenhavunglak shuohpükei yemmü kamteipü yem peü ammi hahhen shuohnyeih. Ngei am kü lemphü shuohnyeih.

⁴ Ammi nehahhen hükü iy kohshi phai tehah.

⁵ Shennyak hanei-i hangku yangnyu hanei jütükjema, ngei hapa iy yühen. Yemhimak hanei-i hangku jütükjema ngei hapa leipao iy yühen.”

⁶ Üpai hangkulei iy yenhühen, büpalei iy-ao yenhühen; Mehenangkü Kahvangi shennyakü Kahvang lepü kü lingpeih.

⁷ Nüngi hahimoi longi bühtuh, hatü daeisheyei kahdoknyü kü nyutuh.

⁸ Kahvangi Noah hatü büpa mü nyupü chehathü kü e,

⁹ “Shaang ngei nüng hatü nüng phei kübü hühihathü mü,

¹⁰ hatü nüng mü jahas leipü vamei daipü yemhimak, ouhiyüh hatü yemhamakha mü vangpüshuwpü hük lingnyüpeih.

¹¹ Sheyü hajük kü bünghiyangi shei yem nyupü lemphü nemahtükpih, hatü bünghiyangi shei kahdoknyü nemangpih shei ngei vangnyüpeih.”

¹² Kahvangi, “Hapayü ngei hatü nüng, nüng mü nyupü yem nyupü peü aa kü ngoikahen den kemei shingvaishi vangteishuwteipü nyangeihepü nyuhen.

¹³ Ngei phumshangei nyiamnyünyiamkang hük tuhnyüpeih; hayü ngei hatü kahdoknyü aa kü vangpüshuwpü nyangeihepü hük nyuhen.

¹⁴ Mechem ngei kahdoknyü kü phum vamhühen hatü phumei nyiamnyünyiamkang eehenshang,

¹⁵ ngei hatü nüng hatü nüng mü nyupü yem nyupü peü mü ngelei vangpüshuwpü ngei deih-ei danghen. Hajük kü bünghiyangi yem nyupü nemahhühen.

¹⁶ Mechem phumshangei nyiamnyünyiamkang vamhen, ngei ha kü veitü Kahvang hatü kahdoknyü leipü yem nyupü lemphü mü nedohnetenpü vangpüshuwpü deih-ei danghen.” shei e.

¹⁷ “Hapayü ngei hatü kahdoknyülei yangnyu nyupüthü aa kü vangteipü nyangeihepü hih” shei Kahvangi Noah kü e.

Noah hatü Chehathü

¹⁸ Jahas mongeipü vampü Noahlei chehathüyü Shem, Ham, Japheth nyu. (Ham-ü Kananei chepa nyu.)

¹⁹ Hathü Noahlei hapeüthü jom jem leipü li kahdoknyü peülei daei daipeih.

²⁰ Kahling am Noah-i shongpüba kü nyalingngupai sheiteke.

²¹ Mechem büpa haleipü yiü yingpa, büpai ha chokei shemei bümkong shükshi nyu.

²² Kananei chepa Ham-i chepa bümkong nyupü eeyei chingshelei nyupü chenaü nyi kao ejateke.

²³ Shejao Shem hi Japheth nyi-i ashak yahei bhagchongei beitü shinshongi shüei chepa bümkong nyupü kü jümteke. Chepa bümkong nyupü kü neveihen shingvaishi dhe lebü lemei lepdai.

²⁴ Mechem Noah-i yiü-i chokpü meiyei paopa, naüshompai büpa kü mehe dük ha nyingei,

²⁵ büpai eteke, “Kanan am kü thaüvaü hettuh! büpayü chenaü nyilei peü mü maanpü aa vaihen.

²⁶ Büpai shao Shembüpa, Shemei Kahvang moihimantuh! Kanan amü Shemei aa vaihütuh.

²⁷ Kahvangi Japheth longhütuh büpa Shemei ashakshemei nyuhütuh, hatü Kanan amü büpalei aa vaihütuh” shei e.

²⁸ Bünghiyang lenpheikü Noah bong 350 nyu.

²⁹ Peüshep Noah-i bong 950 nyutü büpa di.