KAHBHAO 8 - DAÜLANGPÜ LAIHING (BSI)

Yung Jeppü

¹ Shejao Kahvangi Noah hatü büpa mü jahas mongei nyupü yemhimakthü deih-ei dang, hatü Kahvangi vanglük lükhüei yung jepei leishih.

² Sheyü kahmong yung hatü phumshang vang shaden küptüktü vang nekei-i dohhü.

³ Sheyü youngmü youngmü yung jepteke. Nyih 150 dohpü lemei yung jepei lei,

⁴ hatü len nyetpabü nyih anpünyetpabü kü Ararat Kahshangei jahas maangteke.

⁵ Len anpabü thahshi yung jepei jepei lei, hatü lenyang anpabü shongpü nyih kü kahshang teppü eeteke.

⁶ Nyih pinyi pheikü Noah-i ümha shaden aptü,

⁷ ashaba hük shom, shejao hapa ashaba nyokei nelei-i yung mangjep thahshi piteiyei nyudai.

⁸ Hapheikü büpai kahdok leipü yung jeplashang shei veinüng athuba hük shom.

⁹ Shejao kahdok shak kü yung maei nyupü nangkü bakhen shing nedangi shao Noah touei jahaslei piyei lei. Hanangkü büpai athuba yepei yah-ei jahas mongei shülang.

¹⁰ Büpai nyih nyet danei nyutü shao athuba shom.

¹¹ Om mü athubai julei olive pünien hük japtü büpa touei leijateke. Hahepak küang Noah-i kahdoknyü leipü yung jepteke shei nying.

¹² Büpai shao nyih nyet angtü nyipabü athuba shom shejao hapa hepak keyü athuba nyokei neleija.

¹³ Noahlei bong kho vok mü hük shongpü len shongpü nyih kü kahdoknyü leipü yung jepdai. Hahepak kü Noah-i jahas kübü adok aptü veishingkü kahdokü üdaitü eeteke.

¹⁴ Len nyipabü nyih hapünyetpabü kü kahdokü meishi üdaitü nyu.

¹⁵ Hahepak kü Kahvangi Noah kü,

¹⁶ “Nüng, anyüha, hapeüthü hatü hathülei nyühathü peü jahas mongeipü vamkei.

¹⁷ Nüng mü nyupü yem lemphüouhiyüh, yemhimak hatü kahdok leipü yemhamakha peü vamhütuh; shejüang jomi cheha shaanei li daei kahdoknyü makahen” shei e.

¹⁸ Hanangkü Noah, chenyüha, hapeüthü hatü hathülei nyühathü peü vamteke.

¹⁹ Jahas mongeipü yemhimak, ouhiyüh peü lem hük pheikü hük shei vamteke.

Noah-i Jakpü Moila Shuohpü

²⁰ Hapheikü Noah-i Shembüpa kü moidü hük ling, hatü daülangpü yemhimak hatü ou hanei yah-ei halei jakpü moila shuoh.

²¹ Hapa vong meipü jakpü moila Shembüpa kü büjapü kü büpai büpalei mongei, “Sheyü shinnyih pheikü shennyak hük hashih mebü mongdang kü ten mon deihjao, shennyak tata kü ngei kahdok kü nethaüvaüpih; nevaijü ngei shelei mahtükpükei sheyü yemhimakthü nemahtükpih.

²² Kahdoknyülei nyupü thahshi sheili haihen hepak, vethen hepak, kaongpü, shaampü hepak, shao hatü ünyü hepak, nyihnüng yanüng nedoh-i nyuhen” shei e.