KAHBHAO 48 - DAÜLANGPÜ LAIHING (BSI)Jakobi Joshephei Hapeüthü kü Moihimanpü 1 Hapheikü Joseph kü, “Ampa tüngei nyüke” shei eshuohteke. Hanangkü büpai cheha Manasseh hatü Ephraim nyi büpa mü müei dei. 2 Mechem Jakob kü, “Anha Joseph peiyei nyüke” shei eshuohpa, büpai wong antü lüngei paoei uo, 3 hatü Jakobi Joseph kü, “Jeiyong Kahvangi Kanan kahdok Luzlei ngei touei vamei, 4 ngei kü, ‘Ngei nüng betjük jükhühen, hatü lihila longi dahühen hatü jat longi leihühen, hatü ngei hapa kahdok nüng pheikü nüngei hühihathü kü denshing shuohhen’ ephopeih. 5 Ngei nüng yemei Ijiplei yiükei shekü Ijiplei nüng kü bühküpü hapeü Manasseh hi Ephraim nyiyü Reuben hatü Simeon nyi kei-üng ngelei hapeü vaihen. 6 Jiji pheikü angpüthü peü nüngei hapeü vaihen. Jiji kü mükjüp nangkeyü chejeihijei am mü aihük mü men nyanghen. 7 Ngei mechem Paddan leipü peipa, Rachelü Kanan kahdok lemei Ephrah ngoihen maani taishi nyushi mongkü tüngshi didaipeih, hatü ngei pinnyü Ephrathlei (hayü Bethlehem) aongpü lemei vüphongpeih” shei eteke. 8 Mechem Israeli Josephei hapeü nyi eepa, büpai, “Ha nyi üamang?” shei phe. 9 Joseph-i chepa kü, “Kahvangi ngei kü hatouei yahphopü hapeü nyi khih” shei e. Büpai, “Ngei moihiman shuohnüng ngei touei deikei” shei e. 10 Shaang Israelü viüei mük pumdaitü meishi ne-eeaoki nyu. Hanangkü Joseph-i jiji büpa yopailei deija, hatü büpai jiji kü khaaitü jüpteke. 11 Israeli Joseph kü, “Ngei nüngei dhe eehen shei nedeih-angpih, shejao halei Kahvangi ngei kü nüngei hapeüthüao eehüteke” shei e. 12 Hapheikü Joseph-i jiji chepalei shüngdok leipü yahlangtü büpai büpa touei kahdokei aümei sha. 13 Joseph-i jijiphen müei dei; Ephraimü büpalei lakdah philei shejao Israel kü laknyongphi lemei, hatü Manasseh-ü büpalei laknyongphi lemei shejao Israel kü lakdahphi lemei jiüshi büpai müei dei. 14 Shejao Israeli büpalei lak anei aitü naü-eepa Ephraim kü büpalei lakdahphi-i dük, hatü hashongpa Manasseh kü büpalei laknyongphi-i shangjing kü düktü, 15 Joseph kü moihimanei hapakei e: “Kahvang üpa kü ngelei bühipai chongphopa, Kahvang üpai shinnyih thahshi ngelei yangnyu müpa, 16 ngei vongshüh peü kübü yangpü vangsho phongshani hapa naü nyi kü moihimantuh; Ngelei men hatü ngelei bühipa Abraham, Isakei men ha naü nyi homei nyuhütuh, hatü kahdoknyü kü hühihathü longi dahütuh.” 17 Mechem chepai Ephraimei shangjing kü laknyongphi-i dükpü Joseph-i eepa, büpa mongneongi deih. Hanangkü büpai chepalei lakdahphi Ephraimei shangjing kübü yah-ei Manassehlei shangjing kü haüshuoh. 18 Joseph-i chepa kü, “Opa, hei nevai! Büpayü ngelei hashongpa vaipü nangkü nüngei lakdahphi-i büpa kü düktuh” shei e. 19 Shejao chepai ha nemongi büpa kü, “Ngei nyingnyeih, hapeü ngei nyingnyeih; Manassehlei hühihathüao nanglak longi dahen; büpa-ao longpü leihen. Shejao naü-eepa büpa mao longpüba leihen, hatü büpalei hühihathüyü longpü jat leihen” shei e. 20 Hanangkü büpai ha nyih jomphong kü moihimanei hapakei e: “Nüngei men noshi Israel ami hapa moihiman baonghen: ‘Kahvangi am Ephraim hi Manasseh kei leihütuh’ ” shei ehen. Hanangkü Jakobi Manasseh shekü Ephraim noteke. 21 Hapheikü Israeli Joseph kü, “Ngei sheyü didaihen khih, shejao Kahvang nüng mü nyuhen hatü nüng shao nüngei bühipalei kahdokei müei leihen. 22 Shaang ngei anjei anaüthü mü nyeishi ngei nüng kü phaihan hük nyeinya shuohnyeih; hapayü ngelei yan hatü lahhilaongi neüei yahpü Amor amei kahdok ha yahphünyeih” shei e. |
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
Bible Society of India