KAHBHAO 47 - DAÜLANGPÜ LAIHING (BSI)

¹ Hanangkü Joseph Pharaoh touei peiyei, “Opa, cheihinaüthü, yemhimakthü mü jomi angpü kemei koei Kanan leipü yiüei shaangü Goshenei nyüke” shei e.

² Büpai cheihinaüthü jom nga jetü Pharaoh touei müei pei.

³ Pharaoh-i büpalei cheihinaüthü kü, “Amphongü menüng dousho keipü düknya?” shei e. Jomphongi, “Nüngei chongphobüthüyü obü opa am keiha mi haümpü am hih” shei e.

⁴ Jomphongi Pharaoh kü, “Hamphongü hapa kahdokei yenpa kei kanja nyunüng peiküpeih; mehenangkü Kanan kahdokei münghishaü longi nemei-i peipü nangkü nüngei chongphobüthülei yemhimak kü het ühshing neshiü. Shaang, hami nüng kü khümei phehüpeyü nüngei chongphobüthü kü Goshenei nyuhen hanshih” shei e.

⁵ Hahepak kü Pharaoh-i Joseph kü, “Ampa hi nüngei cheihinaüthü nüng yemei peiküteke.

⁶ Ijip kahdokü nüngei lakei nyüke; ampa hatü nüngei cheihinaüthü-ü meipü kahdok kü Goshenei nyemnyu; hatü nüngi jomphong khongkü dou aokhen hanei nyingjema ngelei yemhimak kü veihenao haneishuoh” shei e.

⁷ Hapheikü Joseph-i chepa Jakob Pharaoh touei müei dei, hatü Jakobi Pharaoh kü moihimanshuoh.

⁸ Pharaoh-i Jakob kü, “Nüngü nyübüh bong meshük vaihenang?” shei phe.

⁹ Jakobi Pharaoh kü, “Ngei paüeiyonei longteipü vangbongü kho hük mü hapüan hih. Ngelei yangnyu-ü obü opa am longteipü kü shetteijü maani hatü ponghah-ei nyupeih” shei e.

¹⁰ Hapheikü Jakobi Pharaoh kü moihiman shuohtü büpa toueipü lüdai.

¹¹ Joseph-i chepa hatü büpalei cheihinaüthü kü Pharaoh-i epü keiha Ijip kahdok kü peü mü meipü kahmük Rameses kahdok hanshuoh,

¹² hatü Joseph-i chepa, büpalei cheihinaüthü hatü chepalei shem am shennyak meshük nyu, ha ittü hahying shuoh.

Ijiplei Münghishaü Peipü

¹³ Shaang kahmük peülei hahying neshiüi nyu; mehenangkü münghishaü longi nemei-i nyu. Ijip hatü Kanan kahdok kü münghishaüi wong nekoh-i lei.

¹⁴ Ijip hatü Kanan kahdok kübü nanglakthüi hahying shakpü lop kemei Joseph-i thaitü Pharaohlei shemei yah-ei pei.

¹⁵ Mechem Ijip hatü Kanan kahdok kübü lop kemei tükei kempa, Ijip am kemei Joseph touei peiyei, “Ham kü hahying yahshih! Ham teditükhü. Mehenangkü hamei lop kemdaiteke” shei e.

¹⁶ Joseph-i, “Ammei yemhimak deikei; am lop neshiüjema yemhimak nangjei hahying yahphüshah” shei e.

¹⁷ Hanangkü jomi yemhimakthü deiyei shuoh, hatü Joseph-i koyei, mi, mohoh, hatü gaduthü kü jeiyei hahying shuoh. Hapa bong büpai yemhimakthü nangjei hahying shuoh.

¹⁸ Mechem hapa bong dohpa, vangphei jomi büpa touei peiyei büpa kü, “Hamei lop kemdaipü hamei shembü touei johen neaoknyu; sheyü hamei yemhimak kemei hamei shembülei leidaiteke. Sheyü hamei büm hatü kahdok mü lenei lebü meheyao aoei neshiü.

¹⁹ Ham teditükhü. Hamei kahthüao lavüngtoiyei teyakphong. Ham hatü kahdokao omshi hahying nangjei shakhahtuh, hatü ham mü kahdokao omshi nüngei aa vaihen hih. Ham nedi-i yemmü nyuhen nangkü, hatü kahdokao lavüngtoiyei netuhhen shingvaishi sheili yahshih” shei e.

²⁰ Hanangkü Joseph-i Ijip kahdok kempü Pharaoh shing shakteke. Münghishaü longi mangshi peipü nangkü Ijip am peüi laophülei kahthü yutük. Kahdok kemei Pharaohlei leidai,

²¹ hatü Joseph-i Ijip kahdok jung hük kübü hük thahshi nanglakthü peü aa leihü.

²² Shejao büpai ngongpathülei kahdok neshak; mehenangkü jomphongü düngei Pharaoh leipü hahying dang, hatü jom shing Pharaoh-i shuohpü hahying changshi nyu. Hanangkü jomi kahdok neyutük.

²³ Joseph-i nanglakthü kü, “Shaang ngei amphong hatü ammei kahdok kemei Pharaoh shing shinnyih shaklangteke; hapa sheili yah-ei daiyei kah lingtuh.

²⁴ Shejao mechem hah vethenshang phaihan nga kübü hük Pharaoh kü shuohtuh. Phaihan nga kübü shing aliyü sheili hatü ammi hahhen tuhtuh” shei e.

²⁵ Nanglakthüi, “Nüngi hamei yangnyu yangteke. Nüngi ham kü longi phahjipeih; hanangkü hamphongü ongpalei aa vaihen” shei e.

²⁶ Hanangkü kahdok kü vampü mop phaihan nga kü hükü Pharaohlei vaihen shei Ijip kahdok kü shahkung lingei Joseph-i tuh, hatü ha shinnyih thahshi düknyeih. Ngongpathülei kahdok mon Pharaohlei kahdok nevaiang.

Jakobi Shahshom Epü

²⁷ Hapa keiha Israel am Ijip kahdok Goshen shinpü moidoilei nyu, hatü jomi halei shemmei leiyei hüpeü hapeü büh-ei daeisheyei nyu.

²⁸ Jakob Ijip kahdokei bong anpünyet nyu; hanangkü Jakobei yangnyu bong kho hük mü pinyipü nyet nyu.

²⁹ Mechem Israel dihen hepak ngoipa, büpai cheha Joseph kü nyüktü büpai, “Nüngi ngei kü phahjiei deihjema, nüngei lak ngelei shüngdok shangkü haütuh, hatü bampü huhen hatü shahhing kü dükhen shei lahshih. Nüngi ngelei mangh Ijiplei tevüphong.

³⁰ Ngei opa hi pa am vüpü mahngchongei vüshih; mechem ngei dihen, Ijip leipü anei opa am vüpü mahngchongei vüshih” shei e. Joseph-i, “Ngei ha dükhen” shei lah.

³¹ Jakobi, “Ngei kü lahshih” shei e. Hahepak kü Joseph-i büpa kü lah, hatü Israeli büpalei lüngei lemshi menvih shuoh.