KAHBHAO 45 - DAÜLANGPÜ LAIHING (BSI)

Joseph-i Cheihinaüthü kü Shakei Vamei Epü

¹ Joseph-i büpalei mongei thephüei peipü yepei neaoki büpa mü yaongpü chongphobüthü kü, “Ngei toueipü amphong lüdaituh” shei e. Hanangkü Joseph-i chejei chenaüthü kü ngeiyü Joseph hih shei ngaiyei epü hepak kü büpa mü lebü mih üpayao nenyu.

² Büpai Ijip amao danshi wongmü thep, hatü ha Pharaohlei shemei nyupüthüi dan.

³ Joseph-i chejei chenaüthü kü, “Ngeiyü Joseph hih! Ngelei opa yemmü-üng nyüpa yo?” shei phe. Shejao cheihinaüthüi nyemei büpa kü shah neleiaok.

⁴ Hahepak kü Joseph-i, “Ngei yopailei heihkei” shei e. Mechem jomphong yoshi heihjapa, büpai, “Ngeiyü amphongi Ijiplei yutükpü Joseph hih!

⁵ Hanangkü shaang amphong mongteshang nevaijü ngei hatouei yutükpü nangkü am nyingi mongteshih; mehenangkü yangnyu longi yanghen nangkü Kahvangi ngei am shekü halei shompeih.

⁶ Kahdok kü münghishaü peipheikü bong nyi mon dainyüpa, shao bong nga thahshi kah nelinghen, hah nevethen aoei nyüpeih.

⁷ Kahvangi am shekü ngei hatouei shompeyü kahdoknyü kü am yangei tuhhen hatü ammei hühihathü yanghen shingvaishi shompü khih.

⁸ Hanangkü ngei hatouei shompeyü amphongi nevai, shejao Kahvangi shompeih. Büpai ngei peü mü longpü lakchongbü, Pharaohlei shem hatü Ijip kempülei shembü leihüpeih.

⁹ Shaang amphong shülangi opa touei leiyei büpa kü, ‘Anha Joseph-i hapakei enyüke: Kahvangi ngeiyü Ijip kempü kü shembü leihüteke. Nepheidai-i ngei yemei yiüdaikei.

¹⁰ Nüng yiüei Goshenei ngei yopailei nüng, nüngei hapeü hüpeüthü, nüngei yemhimakthü nüngi angpü peü ngei mü nyuhen.

¹¹ Ngei nüng kü hahying changshi shuohhen; mehenangkü shao-üng bong nga thahshi münghishaü aoei nyüpeih. Hei vaijema nüng hatü shem am hatü yemhimakthü aeipai nedihen’ shei etuh” shei eteke.

¹² “Shaang amphong mü shah eteipeyü ngei khih shei amphongei müki hatü ngelei naüpeü Benjaminei mükiyao eeteke.

¹³ Opa kü ngei mekei Ijiplei wong dangei hatü dhüm kohshi nyunya, hatü amphongi eepü peü opa kü eyeishuoh, hatü lomi opa müei hatouei yiükei” shei e.

¹⁴ Hapheikü büpai chenaü Benjamin kü khaaitü thep, hatü Benjaminiyao khaaitü thep,

¹⁵ hatü büpai cheihinaüthü peü kü om kü jüptü jomphong mü thep. Haphei küang cheihinaüthüi büpa mü shah etei.

¹⁶ Mechem Pharaohlei shemei, “Josephei cheihinaüthü yiüei nyükeja” shei danpa, Pharaoh hatü büpalei lakchongbüthü peüi mongong.

¹⁷ Pharaoh-i Joseph kü, “Nüngei cheihinaüthü kü ha düktuh shei etuh: Ammei gaduthü kü hahying changshi kotü Kananei leituh,

¹⁸ hatü ampa hatü shem am peü müei ngei touei yiüdaikei. Ngei Ijip kü peü mü meipü kahdok shuohhen, hatü ammi halei vampü hahyingi hüshemei nyuhen.

¹⁹ Nüngi shao jomphong kü ha düktuh shei etuh: Ijip leipü mohoh khari hanei yah-ei ammei nyühihathü shing leituh, hatü ampa-ao müei yiüdaikei.

²⁰ Am meshük ang, ha kü mongte-aa; mehenangkü Ijip kü peü mü meipeyü am shing vaihen” shei e.

²¹ Israelei chehathü hapakei dük. Joseph-i jomphong kü Pharaoh-i epükei khari shuoh, hatü lemei hahhen hahyingao shuoh.

²² Jom peü kü büpai büm-ow jeiteihen omshi shuoh, shejao Benjamin kü ngin kho jem hatü ashakviha jeiteihen lem nga shuoh.

²³ Büpai chepa kü Ijiplei vampü meipü douthü gadu an kü shih, hatü hahying, aan hatü lemei hahhen hahying gadu chebaong an kü shihtü shom.

²⁴ Hapheikü büpai cheihinaüthü leishih, hatü jomphong leishingkü büpai, “Amphong lemei tedetelao” shei etü leishihteke.

²⁵ Hanangkü jomphong Ijip leipü leiyei Kanan kahdok chepa Jakob nyushing ngoi.

²⁶ Jomphongi büpa kü, “Joseph-ü yemmü nyüke! Büpayü Ijip kahdok kempü kü vanglem lembü vainyüke” shei e. Jakob yashanei deih, hatü hathü kü hingnelem.

²⁷ Shejao mechem Joseph-i jomphong kü eshuohpü peü ejapa, hatü mechem Joseph-i büpa müei yiühen khari shompü eepa, Jakobei laangha mongyangei lei.

²⁸ Hahepak kü Israeli, “Ngei yempeyü ha-ü! Ngelei ha Joseph yemmü nyüke. Ngei dishekü ngei yiüei büpa mü pongteihen hih” shei e.