KAHBHAO 44 - DAÜLANGPÜ LAIHING (BSI)

Joseph-i Benjamin Tuhlangpü

¹ Joseph-i büpalei shemei chongphobüthü kü hapakei eteke: “Hathülei hanggo kü jomi koaokpü thahshi hahying hüeishuoh, hatü halei jom peüei lop hüeishuoh.

² Hatü ngelei yungshong, ngini lingpü yungshong naüshompalei hanggolei büpalei lop mü hüeishuoh” shei e, hatü chongphobüi büpai epükei dük.

³ Vangngaihinüng jomphongi laophülei gadu mütü layaongei leishih.

⁴ Jomphong chingnyü kübü luangi yanei mangdai-i Joseph-i büpalei chongphobü kü, “Nüngi jomphong phei changei daituh, hatü nüngi jomphongei she yeiyei heihtü hathü kü, ‘Hami mei dükjü mehekei ten shuohnya? Ngelei ngin yungshong mehekei gühpa?

⁵ Hapa kü ngelei shembüi yingteinyeih, hatü phongyomhen nangkü büpai hapa noteinyeih. Amphongi douten dükteke!’ shei etuh” shei etü shom.

⁶ Büpai jomphong she yeitü büpai hapa shah shao nyokei e.

⁷ Jomphongi büpa kü, “Longpübai mehekei hapa keipü shah enya? Ammei chongphobüthü hamphongi hapa keipü dou-ü lanshei nedüknyih.

⁸ Hami hamei hanggolei hüshi leipü lop nyokei koei leiyei shuohpeih. Hami nüngei shembülei shem leipü hon hi ngin mehekei gühhenang?

⁹ Nüngei chongphobü hamphong hükei dangkao ha hüshi chongküjema büpayü jütükhen, hatü aopü ham peü nüngei aa leihen hih” shei e.

¹⁰ Büpai, “Shejema meiteke, nüngi epükei nyemvai. Üpalei hapa danghenshang, büpa mon ngelei aa vaihen, aopü am peü leishihhen” shei e.

¹¹ Hanangkü jom peüi hanggo kahdokei yah-ei haütü apteke.

¹² Hapa chongphobüi behepa kübü pangei naü-eepa aimü veiyei daishingkü hapa yungshongü Benjaminei hanggolei hüshi dangteke.

¹³ Hanangkü, jom peüi laophülei ashakviha shaaktük, hatü gadu kü hanggo shihtü chingnyü yemei nyokei lei.

¹⁴ Mechem Judah hatü chenaüthü Josephei shemei shüjapa, Joseph-ü shemei nyu, hatü jom peüi büpa touei aümei sha.

¹⁵ Joseph-i jomphong kü, “Amphongi dükpü hayü meheang? Ngei shenshenpü shennyaki phongyomei hapa keipü dou dangaokhen shei amphongi nenyingpü je?” shei e.

¹⁶ “Hami nüng kü mehe eaoknüng, longpüpa” shei Judah-i jangei e. “Hami mehe eaoknüng? Ham nepung shei mekei eaokhen? Nüngei chongphobüthüi pungpü Kahvangi shakei vamhüpü khih. Sheyü hamphong hatü yungshong hüshi dangpü shennyakao nüngei aa vaihen hih” shei e.

¹⁷ Shejao Joseph-i, “Ngei henüng dou nedükpih! Yungshong hüshi dangpü shennyak mon ngeilei aa vaihen. Aopü am peü ampa touei meishi leijatuh” shei e.

Judah-i Benjamin Nangkü Khümpü

¹⁸ Judah-i Joseph touei heih-ei, “Oh ngeilei shembü, nüngei chongphobüi nüngei dhaongi danshi shah phahük eküshah; nüngi ha kü mongshih-ei tedeihkei; nüngü Pharaoh keipü khih.

¹⁹ Ngeilei shembü nüngi nüngei chongphobü kü, ‘Ampa nevaijü anaüpeü nyüla?’ shei phephopeih.

²⁰ Hatü hamphongi nüng kü, ‘Hamei opa viüdaitü nyüpeih, hatü büpa viüdai pheikü bühpü naüshompa nyüpeih. Nyü hüki bühpü chejeipa didaitü büpa mon nyüpeih, hatü opai büpa kü longi bamnyüpeih’.

²¹ Hahepak kü nüngi, ‘Ngelei müki veihen büpa müei yiükei’ shei epeih.

²² Shejao hami nüng kü, ‘Naü-ü chepa toueipü yanei nedaiaokpih; büpa chepa toueipü lüdaijema chepa dikahen hih’ shei epeih.

²³ Shejao nüngei chongphobüthü kü nüngi, ‘Naüshompa müei mangyiükei thahshi amphongi ngelei dhe neeepih’ shei ephopeih.

²⁴ Hamphong nyokei leiyei nüngei chongphobü opa kü nüngi epü shah eshuohpeih.

²⁵ Mechem opai, ‘Shao yiüei hahying maani shakkütuh’ shei ephopa,

²⁶ hamphongi, ‘Hamphong neyiüaokpih. Naüshompa müjü mon hamphong yiühen; mehenangkü hamphong mü büpa nemüpheikü hapa shennyakei dhe ne-eeaokhen’ ” shei eshuohpeih.

²⁷ Nüngei chongphobü opai hamphong kü, “Ngelei shembünyüi hapeü nyi bühpeih;

²⁸ hükü ngei tuhphongteke. Hingmei büpayü phaüyemi khih mü shaaktük, hatü ha nyih mü leitü ngei büpa ne-ee.

²⁹ Amphongi büpaao ngei toueipü müei lüdaijema, hatü büpa vongshüh vaijema, amphongi ngei kei viüdaipü shennyak mongshang kü dihühen khih” shei ephopeih.

³⁰ Hanangkü mechem nüngei chongphobü ngei opa touei nyokei leihen naüpeü hamphong mü nenyujema, büpalei yangnyu-ü naüpeü mü longi shenteishi nyupü nangkü,

³¹ büpai naüpeü hamphong mü ne-eejü büpa dikahen hih, hatü nüngei chongphobü hamphong homei hajük viüdaipü opayü mongshang kü dihühen mü vamkahen khih.

³² Mehenangkü ngei, nüngei chongphobüi hapa naüpeü shing opa touei vangei, “Ngei nüng touei naüpeü müei neleiküjema, opa touei ngelei den kemei thaüvaü ngei kohen” shei etüktih.

³³ “Hanangkü chingmeilemlingei naü nangjeiyei nüngei aa vaishi ngei tuhhahtuh, hatü ngelei naüpeüthü mü naüpeüao leishihtuh.

³⁴ Naüpeü nemüi mekei etü ngei opa touei leihenang? Opa mongshang küpü kü ngei veishi nyuhen neaok-ükhih” shei e.