KAHBHAO 38 - DAÜLANGPÜ LAIHING (BSI)

Judah hatü Tamar

¹ Hahepak kü Judahyü cheihinaüthü tuhphongtü Adullam am Hirah mü nyuhen yiü.

² Halei Judah-i Kanan am Shualei yiükha hük pongteke. Büpai pinnyü mü shem yem,

³ hatü pinnyü büm nekongi lei, hatü yeshang hük büh, hatü ha naü kü Er shei men.

⁴ Shao pinnyü büm nekongi lei, hatü yeshang hük büh, hatü pinnyüi naü kü Onan shei men.

⁵ Shao pinnyü büm nekongi lei, hatü yeshang hük büh, hatü pinnyüi naü kü Shelah shei men. Keziblei nyushi pinnyüi büpa büh.

⁶ Judah-i hashongpa Er shing nyüha hük yem, hatü pinnyülei menü Tamar nyu.

⁷ Shejao hashongpa Er-ü Shembüpa touei nemei-i nyu, hanangkü Shembüpai büpa jütük.

⁸ Hahepak kü Judah-i Onan kü, “Nüngi anjeilei nyüha touei heih-ei paümtuh hatü anjeilei men kü hühiha tuhhen shingvaishi jeihinaü aa kü dükhen jiüpü dou dükei hapeü vamhütuh” shei e.

⁹ Shejao Onani hapeüthü büpalei nevaihen shei nyingei mechem büpai chejeilei nyüha mü jemhenshang, hapeü nevamhühen shangmü büpai kong kü shakei yentük.

¹⁰ Büpai mehe dük, hayü Shembüpa touei nejiüpü vaipü nangkü büpai büpayao jütük.

¹¹ Hapheikü Judah-i laophülei hapeülei yiük Tamar kü, “Ngelei hapeü Shelah, nethe manglei thahshi nüng ampalei shemei vaümnyü keiha nyutuh” shei e. Mehenangkü büpai, “Büpayao chejei am kei didaishasha khih” shei deih. Hanangkü Tamar-i chepa am shemei nyunüng heih.

¹² Hepak luangi daipheikü Judahlei chenyüha, Shualei yiükha di. Mechem Judah mahng theppü nyeü lompa, büpai Timnahlei büpalei mimum jappüthü touei aong, hatü Adullam am büpalei küphü Hirah-ao büpa mü aong.

¹³ Mechem Tamar kü, “Ampayü Timnahlei mimum japhen aongdainyüke” shei eshuohpa,

¹⁴ pinnyüi vaümnyü ow bintüktü lebü ashaki shokuh kuh, hatü büm kü jümtü Timnahlei aongpü lem, Enaimei shüpü lembaongei uoshi nyu. Pinnyüi Shelahyü nethe leiteke shei nying, shejao pinnyü büpa mü shem mangyemi nyu.

¹⁵ Mechem Judah-i pinnyü eepa, pinnyü-ü büm yupü am khih shei büpai deih; mehenangkü pinnyüi dhe kü jümtü nyuteke.

¹⁶ Büpai pinnyü touei lemhaoei heihtü, “Heihkei, ngei nüng mü shishah” shei e. Mehenangkü büpai pinnyü-ü hapeülei yiük khih shei nenying. Pinnyüi, “Nüng peiyei ngei mü shijü nüngi ngei kü mehe shuohhenang?” shei phe.

¹⁷ Büpai, “Ngelei yem khong kübü nüng kü yum baongha hük shomphahen” shei e. Pinnyüi, “Nüngi ha mangshom shekü vangpü hük leshi lemhük yahphüjü mon vaihen” shei e.

¹⁸ Büpai, “Menüng keipü vangpü hük ngei nüng kü shuohhen?” shei e. Pinnyüi, “Nüngei füoshang hatü vü hatü nüngi nopü lenshuoh yahkei” shei e. Hanangkü büpai pinnyü kü hathü shuohtü pinnyü mü shi, hatü büpa homei pinnyü büm nekongi lei.

¹⁹ Büpa lüdaipheikü pinnyüi shokuh aptüktü pinnyüi vaümnyülei ow shao owteke.

²⁰ Mechem Judah-i hapa nyüha leipü büpai vangei shuohpü dou yahhen nangkü büpalei küphü Adullam mü yum baongha shompa, büpai hapa nyüha nepong.

²¹ Büpai haleipü shennyakthü kü, “Hapa Enaim lemhaoei shepü büm yupü nyüha melei daipa?” shei phe. Shejao shennyakthüi, “Hatouei büm yupü shennyak nenyuangpih” shei e.

²² Hanangkü büpa Judah touei nyokei leiyei, “Ngei pinnyü neheü, hatü anyei vaishi haleipü shennyakthüi, ‘Hatouei büm yupü shennyak nenyuham’ shei ephopeih” shei e.

²³ Judah-i, “Jahmao, pinnyüi hathü dou pinnyülei vaiyei nyemtuhhah, hei nevaijema mihnyiyangnyai ponghen khih. Veihümao, ngei pinnyü kü yum baongha shompü khih, shejao nüngi pinnyü nepong” shei e.

²⁴ Len jem hükshing angpheikü hanei ami Judah kü, “Nüngei hapeülei nyüha Tamar-ü büm yupü am kei dükpü khih, hatü shaang pinnyü büm nekongi nyüke” shei eshuohteke. Judah-i, “Pinnyü ngaiyei aw kü jaktüktuh” shei e.

²⁵ Pinnyü müei ngaishingkü pinnyüi chepahalei chepa kü, “Ngei büm nekongi leihüpeyü hathü douei shembü ha hih” shei e. Pinnyüi, “Meishi veituh, hapa füoshang, vü hatü hapa lenshuoh üpaleiang?” shei e.

²⁶ Hahepak kü Judah-i hathüyü büpalei douthü khih shei nying, hatü, “Ngei meyü pinnyü-üng longi jiüshi nyüke; mehenangkü ngei lahtükpü nedükshuoh; ngelei hapeü Shelah pinnyü mü shem yemhen neshuohpü khih” shei e. Hapheikü büpai pinnyü mü nejem.

²⁷ Mechem hapeü anghen ngoipa, naü nyi peetei nyuteke.

²⁸ Pinnyü hapeü anghen tüngei nyushingkü naü hükei lak laoteke, hatü ha kü jungpü nyühathüi hapa naüei lak-üng kü vi hakla-i hintü, “Hapa shong bühpeih” shei e.

²⁹ Shejao hapa naü-i lak mongei shülang, hatü chenaü shong vamteke, hatü pinnyüi, “Hapakei nüngi nüngei lem manghahteke!” shei e, hatü hapa naü kü Perez shei men.

³⁰ Hapheikü chejei, üpalei lak-üng kü vi hakla shenshi nyu, büpa vam, hatü büpa kü Zerah shei men.