KAHBHAO 37 - DAÜLANGPÜ LAIHING (BSI)

Joseph-i Mangh Manghpü

¹ Jakobü chepa benha kei nyupü Kanan kahdokei nyu.

² Hapayü Jakob am shemei büshah. Joseph bong anpünyet kü chejeihijei am Bilhah hatü Zilpah nyilei hapeüthü kü sheühteiyei mi yomei nyu. hatü büpai hathü jung shahjang nemeipü chepa touei koei leiteke.

³ Shaang Israeli büpa viüdaitü angpü hapeü vaipü nangkü büpalei lebü hapeüthü meyü Joseph kü-üng nyeishi bam, hatü büpai büpa shing ow shihpü bhagthuh laklu thüngteke.

⁴ Mechem chejeihijei ami jomphong meyü chepai büpa kü-üng nyeishi bamnyüke shei nyingpa, jomi büpa kü neveihü hatü shahmei hükao büpa kü ne-e.

⁵ Chem Joseph-i mangh hük manghteke, hatü mechem büpai ha chejeihijei am kü ejapa, nyeinya jomphongi büpa kü jiühit.

⁶ Büpai jomphong kü, “Ngei manghpü mangh kü banghümao:

⁷ Jen peü kahlei hahbhaong shaei nyuteke. Ngangahük kü ngelei hahbhaong yaongteke, hatü amphongei hahbhaong kemei shonei aümei shaei khümei manghküpeih” shei e.

⁸ Chejeihijei ami büpa kü, “Nüngü hamphong shak kü ong vaihen deihpü je?” shei e, hatü jomphongi nyeinya büpalei mangh ejapü nangkü jiühit.

⁹ Hapheikü shao büpai mangh hük mangh, hatü ha büpai chejeihijei am kü ejateke. Büpai, “Banghümao, ngei shao mangh hük manghpeih, vanghe, lennyü hatü litha anpühük ngei kü khümei manghküpeih” shei e.

¹⁰ Mechem büpai manghthü chepa kü hatü chejeihijei am kü ejapa, chepai büpa kü loh, hatü, “Nüngi hayü mehe mangh manghküpa? Hingmei anyü henji hatü anjeihijei am peü peiyei nüng kü kahdokei aümei khümhen je?” shei e.

¹¹ Chejeihijei ami büpa kü mükhak, shejao chepai ha nang mongei mon tuh.

Chejeijei ami Joseph Yutükpü

¹² Shaang chejeihijei amü chepalei mithü kü het ühshing Shekhem yopailei heih-ei nyu,

¹³ hatü Israeli Josheph kü, “Anjeihijei am peü Shekhem yopailei mithü het üh-ei nyupü nüngi nyingei nyüke. Heihkei, ngei nüng jomphong touei shomshah” shei e. “Meiteke” shei büpai e.

¹⁴ Büpai büpa kü, “Anjeihijei am hatü mithü mekei nyüpüshang shatuh, hatü shahom koei aongkei” shei e. Hapheikü büpai büpa Hebron Kahjilei shanshihteke. Büpa Shekhem ngoi,

¹⁵ hatü shennyak hüki büpa kahlei kamteiyei eeyei hapa shennyaki, “Nüng mehe yemnya?” shei phe.

¹⁶ Büpai, “Ngeiyü ojeihijei am yemnyeih, jomphong melei het ühnyushang eshih” shei e.

¹⁷ Hapa shennyaki, “Jomphong lüdaiteke; mehenangkü ngei jom hi jom, ‘Jenphong Dothanei daishah’ shei eteiyei ngei danpeih” shei e. Hanangkü Joseph-ao chejeihijei am yemei heih, hatü büpai jomphong Dothanei heüteke.

¹⁸ Jomphongi tailei büpa eeyei büpa jomphong yopailei mangngoija-i büpa jütükhen showteke.

¹⁹ Jomphong hüki hük mü, “Mangh manghteipü shennyak halei heihkünyüke.

²⁰ Kei, jeni büpa jütü kahsha hükei shükphongshah; jeni büpayü phaüyemi hahtükpü khih shei ehen, hatü büpalei mangh mehe vaikahen veishah” shei etei.

²¹ Shejao mechem Reubeni ha danpa, büpai hathülei lak leipü büpai, “Jeni büpa nejüshah” shei etü yang.

²² Reubeni jomphong kü, “Iy teyenhü, phaüei deiyei büpa hapa kahshalei hüphongtuh, büpa kü lak teshih” shei e. Reubeni hapayü jomphongei lak kübü chepa touei müei leihen nangkü eteke.

²³ Hanangkü mechem Joseph chejeihijei am touei ngoijapa, büpai thuhpü bhagthuh laklu shaaktüktü,

²⁴ jomphongi büpa yah-ei kahshalei shükphong. Hapa kahshayü kong hatü yung neshiüi nyu.

²⁵ Hapheikü jomphong hahyingei nyushing kü jomi veishuohjü Ishmael am ut kü uotü Gilead leipü müh, meli hatü nyalingngupai van kotü Ijiplei yiüjapü eeteke.

²⁶ Hahepak kü Judah-i cheihinaüthü kü, “Jeni jenei naüpeü jütü büpalei iy jojü mehe nanglei nyüpa?

²⁷ Kei, jeni büpa kü lak neshihshah, shejao Ishmael am kü büpa yutükshah; mehenangkü büpayü jenei naüpeü, jenphongei iy” shei e. Cheihinaüthü peüi ha kü mongteke.

²⁸ Mechem Midian am bhei leihpüthü peijapa, jomi Joseph shüei kahsha leipü ngaiyei jomphongi büpa Ishmael am kü ngin kukha kü yutük, hatü jomi Joseph Ijiplei yah-ei lüdai.

²⁹ Mechem Reuben nyokei leiyei kahshalei veipa, büpai Joseph ne-eepü nangkü büpai laophülei ashak shaaktük.

³⁰ Büpai chenaüpeüthü kü, “Naü lüdaiteke, ngei melemei daihenang?” shei e.

³¹ Hahepak kü jomphongi mi hük jütü hapalei iy kü Josephei bhagthuh hüngteke.

³² Jomphongi bhagthuh laklu yah-ei leiyei chepa kü, “Hamphongi ha dangpeih, hayü anhalei bhagthuh vailashang veituh” shei e.

³³ Büpai ha vaiteke shei nyingei, “Hayü hapeülei bhagthuh khih! Phaüyemi büpa hahtükpü khih; Joseph-ü khih mü shaaktüki shiühen khih” shei e.

³⁴ Hahepak kü Jakobi laophülei ashak shaaktük, hatü shüng kü dhoila ashak ngeihtü nyih longi mahng thep.

³⁵ Chehapeüthüi büpa mong nyiushem meihühen khe, shejao büpai ha kü nemong, “Anyoh, ngei ngelei hapeü nangkü mahng thepyaki Sheolei shühen khih” shei e.

³⁶ Hahepak keyü Midian ami büpayü Ijip am Pharaohlei lakchongbü, veshan mübü Potiphar kü yutüktü nyuteke.