KAHBHAO 34 - DAÜLANGPÜ LAIHING (BSI)

Dinah Shüei Yahpü

¹ Nyih hük Jakob hatü Leah nyilei yiükha Dinah-i Kanan am nyühathü hanei thümhen dai.

² Mechem Hiv am Hamorlei cheha Shekhem, hapa moidoi kü longpü shennyaki pinnyü eepa, büpai pinnyü yepei douten dük.

³ Büpai Jakobei yiükha Dinah kü mong kempai bam hatü shahmei eyei pinnyü yawhhen khe

⁴ Hanangkü Shekhemi chepa Hamor kü, “Hapa nela ngelei nyüha vaihen yahhüangke” shei e.

⁵ Shaang Shekhemi büpalei yiükha Dinah tentükteke shei Jakobi dan, shejao chehathü kemei laophülei yemhimakthü müei kahlei shadaikempü nangkü büpai hathü mangaong thahshi meheyao nedük.

⁶ Shekhemei chepa Hamor-ü Jakob mü ha nang eteihen heih-ei nyu,

⁷ hatü Jakobei chehathü kah leipü aongei nyu. Mechem jomphongi ha danpa, jomphong longi mongshang hatü mongshihteke, mehenangkü büpai nedükhen dou dükei Jakobei yiükha tentükpai Israel am kü ne-ienelem veüpong shuohteke.

⁸ Hamor-i jomphong kü, “Hapeü Shekhemi ammei yiükha kü longi bamnyüke. Chingmeilemlingei büpa mü shem yemhütuh.

⁹ Jen aa kü yiükyah lashomteipü nyushah.

¹⁰ Am ham mü nyutuh; kahdokü am shing bhashahshi nyüke; halei nyuei bhei leih-ei angeideiyei nyutuh” shei e.

¹¹ Shekhemiyao Dinahlei chepa hatü jeihinaüthü kü, “Ammi ngei kü phahjiei deihshih, hatü ammi mehe yühen ngei ha yahphahen hih.

¹² Ammi mongpüshük yiükhalei lat hatü thintho yütuh; ammi meshük yü ngei shuohhen; ammei yiükha mon ngelei nyüha vaihen yahshih” shei e.

¹³ Jomei naüpeü Dinah mangtükpü nangkü Jakobei hapeüthüi Shekhem hatü chepa Hamor nyi kü ühing kohshi eteke.

¹⁴ Jomphongi jiji kü, “Hami shuw nejaptükpü am kü hamei naüpeü shem yemhühen neaokpih; mehenangkü hayü ham shing shanghah longpü hih.

¹⁵ Amao ham keiha baha kemei shuw japtükjü mon hami monghen.

¹⁶ Hapa dükjü mon hami hamei yiükhathü am kü shuohhen, hatü hami ammei yiükhathü yahhen, hatü hamao am mü nyuei nanglak hük leihen.

¹⁷ Shejao ammi ham epü nebangi shuw nejaptükjema, hami hamei yiükha yah-ei lüdaihen” shei e.

¹⁸ Jomphongi epü shah kü Hamor hatü Hamorlei cheha Shekhem nyiyü mongongei deih,

¹⁹ hatü hapa nethepai neka-i epükei dük; mehenangkü büpai Jakobei yiükha longi lüm. Büpayü jom shem kü peü mü shongnyü nanglak nyuteke.

²⁰ Hanangkü Hamor hatü cheha Shekhem nyi-i jomei chingnyü penyüshalei shahthai shingei peiyei shennyakthü kü,

²¹ “Hathü shennyakü jen mü longi küphü mei khih; jom jenei kahdokei nyuei halei bhei leih-ei nyemnyu; jom shingao kahdok changshi nyüke. Jeni jomei yiükha hatü jomi jenei yiükha yah-aokhen.

²² Shejao jomi jen mü nanglak hük leiyei nyuhenü laphen hük nyüke; hayü jen bahathüiyao jom kei shuw japhen vongbong shei enyüke.

²³ Jomei yemhimakthü, jomei mopthü hatü lebü yemhimak kemei jenei nevaihen je? Hanangkü jomi epü kü jeni bangshah hatü jom jen mü nyukahen” shei e.

²⁴ Hamor hatü cheha Shekhem nyi mü chingnyü penyüshalei thaipüthü peü ha nyi-i epü kü mong, hatü chingnyü kü nyupü peüi shuw japteke.

Dinahlei Chejei ami Bhüh Yempü

²⁵ Nyih jempabü mechem jom peü shuw jappü kü tüngei nyupa, Dinahlei chejei, Jakobei cheha Simeon hatü Levi nyi-i meheyao hakaei nenyupü hepak kü chingnyü khüei daiyei bahathü jütük.

²⁶ Jijinyi-i Hamor hatü Shekhem nyi jütüktü Shekhem am shem leipü Dinah müei leidai,

²⁷ hatü Jakobei lebü hapeüthü peiyei chenaü mangtükpü nangkü chingnyü leipü mop kemei yah-ei leilang.

²⁸ Jomi haleipü mi, mohoh, jomei gadu, ching hatü kahlei nyupü lemphü yahlang.

²⁹ Jomei mop, hashih naüha hatü nyühathü peü, shem leipü yahpü dou peü yah-ei lüdai.

³⁰ Hahepak kü Jakobi Simeon hi Levi nyi kü, “Anjinyi-i hapa kahdok kü nyupü Kanan hatü Perizz am touei ngei jiühitbenüng leihen mü shanghah koei leiküteke; jenü maani mon, hatü jomi jen khüei chemi thaitü jen hahjema, ngei hatü ngelei shem am peü mahdaikemhen khih” shei e.

³¹ Shejao jiji-i, “Hamei naüpeü-ü büm yupü am kü kei jomi dükhen je?” shei e.