KAHBHAO 30 - DAÜLANGPÜ LAIHING (BSI)

¹ Mechem Racheli Jakob kü naü hükao nebühja shei veiaokpa, pinnyüi chenya kü mükhakei deih. Hanangkü pinnyüi Jakob kü, “Ngei kü naü yahshih, hei nevaijema ngei didaihen hih” shei e.

² Jakobi Rachel kü mongshih-ei, “Nüngi hapeü nekohen mü shümei tuhhen mü ngeiyü Kahvang je?” shei e.

³ Hapheikü pinnyüi, “Ngelei aa lanyü Bilhah ha khih. Nüngi pinnyü mü jemtuh, hatü pinnyüi ngei shing naü nyembühkei, hatü ngeiyao pinnyü homei hapeü danghen” shei e.

⁴ Hanangkü pinnyüi büpa kü Bilhah deiyei nyüha vaihen shuoh, hatü Jakobi pinnyü mü jem,

⁵ hatü Bilhah büm nekongi lei, hatü Jakob kü yeshang hük bühjateke.

⁶ Hahepak kü Racheli, “Kahvangi ngei dah shakhüteke; büpai ngei khümpü danei yeshang hük shuohteke” shei e. Hanangkü pinnyüi naü kü Dan shei men.

⁷ Rachelei aa lanyü Bilhah-i shao büm nekongi lei, hatü Jakob kü yeshang hük bühjateke.

⁸ Hahepak kü Racheli, “Ngei onya mü mangpü vehok hokpeih, hatü ha ngei neüpeih” shei e. Hanangkü pinnyüi naü kü Naphtali shei men.

⁹ Mechem Leah-i sheyü pinnyü hajük kü hapeü neshiü shei nyingpa, pinnyüi pinnyülei aa lanyü Zilpah deiyei Jakob kü nyüha vaihen shuoh.

¹⁰ Leahlei aa lanyüi Jakob kü yeshang hük bühjateke.

¹¹ Hahepak kü Leah-i, “Meshük lashüh meipüang!” shei e. Hanangkü pinnyüi naü kü Gad shei men.

¹² Leahlei aa lanyü Zilpah-i Jakob kü nyipabü yeshang hük bühjateke.

¹³ Leah-i, “Ngei meshük mongongpüang! Nyüha peüi ngei kü mongongpü” nyükphahen shei e. Hanangkü pinnyüi naü kü Asher shei men.

¹⁴ Wheat hah vetpü hepak kü Reuben kahlei sha, hatü moipaipü dangei koei chenyü Leah kü shuoh. Hahepak kü Racheli Leah kü, “Anhai kopü moipaipü ngei kao maani yahshih” shei e.

¹⁵ Shejao pinnyüi pinnyü kü, “Nüngi ngelei baha yahlangpü hapaiyao nechangang je? Nüngi ngelei hapeüi kopü moipaipü-ao yahhen je?” shei e. Racheli, “Meiteke, anhai kopü moipaipü nangjei sheya nüngi Jakob mü shituh” shei e.

¹⁶ Hanangkü mechem Jakob om mü kah leipü aongjapa, Leah-i büpa mü pongteinüng heih-ei pinnyüi, “Sheya nüng ngei mü shihen; mehenangkü ngelei hapeüi kopü moipaipü shuohtü ngei nüng shaklangtih” shei e. Hanangkü ha ya büpai pinnyü mü paüm.

¹⁷ Leah-i phoppü Kahvangi dan, hatü pinnyü büm nekongi lei, hatü Jakob kü ngapabü yeshang hük bühjateke.

¹⁸ Hapheikü Leah-i, “Ngei ngelei aa lanyü ngelei baha kü shuohpü nangkü Kahvangi ngei kü hapa shuohpeih” shei e. Hanangkü pinnyüi naü kü Issakhar shei men.

¹⁹ Leah-i shao büm nekongi lei, hatü Jakob kü vokpabü yeshang hük bühjateke.

²⁰ Hahepak kü Leah-i, “Kahvangi ngei kü douvang thintho hük shuohteke. Sheyü ngelei bahai ngei kü dhüm kohshi nophahen; mehenangkü ngei büpa kü yeshang vok thahshi bühtepih” shei e. Hanangkü pinnyüi naü kü Zebulun shei men.

²¹ Kanja angpheikü pinnyüi yiükha hük büh, hatü pinnyü kü Dinah shei men.

²² Hapheikü Kahvangi Rachel deih-ei dang; büpai pinnyü phoppü dan, hatü pinnyülei naü uoshing apteke.

²³ Pinnyü büm nekongi lei, hatü yeshang hük büh, hatü pinnyüi, “Kahvangi ngei kü lohpü yahlangteke” shei e.

²⁴ Pinnyüi naü kü Joseph shei men, hatü “Kahvangi shao ngei kü yeshang üei nyemyahpha!” shei e.

Laban Lomoh-ei Jakob Dapüshepü

²⁵ Racheli Joseph bühpheikü Jakobi Laban kü, “Ngei ngelei nyübüh kahdok yemei leihen ngei shomtuh.

²⁶ Nyüha hapeü nangkü ngei hajük nüng chongphotükpü ngei kü hathü yahshih, hatü ngei leidaihen hih. Ngei meshük nüngei dou dükei nyüpa nüngi nyingei nyüke” shei e.

²⁷ Shejao Labani büpa kü, “Nüngi ngei kü bamei deihjema, haleiüng chongkütuh. Nüng nyupü nangkü Kahvangi ngei kü moihimanpü khih shei phongyompai nyingteke” shei e.

²⁸ “Nüngei lat meshük vam, ha ngei nüng kü shuohhen” shei e.

²⁹ Jakobi büpa kü, “Ngei nüng shing meshük dou düktepa, hatü ngei jungpü homei nüngei yemhimak meshük datepa, ha nüngi nyingei nyüke.

³⁰ Ngei peishekü nüng maani angpü sheyü longi dateke, hatü ngei melei nyu, Shembüpai nüng kü moihimanteke. Shejao shaang ngei ngelei shemong shing mechem dükhahhen?” shei e.

³¹ “Ngei nüng kü mehe shuohhenang?” shei phe. Jakobi, “Ngei kü meheyao teyahpha” shei e. “Shejao nüngi ngei kü hapa dou hük mon dükphüjema ngei nedoh-i nüngei mithü haümei yomei nyukahen” shei e.

³² “Ngei shinnyih nüngei yemthü kü veiyei daishah, hatü mi hi yum meshük kü shahngpü hatü ampünyampü ow kohshi chongkahen, hatü mi cheha nyakla kemei ngelei lat vaihen.

³³ Ngoikahen nyih kü ngei shahhing epü ne-epü nüngi yopai-i nyingdaihen. Nüngi shuohpü ngelei lat kü veinüng nüng peijü shahngpü hatü ampünyampü neshiüpü yum nevaijü nyakla nevaipü mi chongküjema, hayü gühpü khih shei deihtuh” shei e.

³⁴ Labani, “Oma, nüngi epükei dükshah” shei e.

³⁵ Shejao hapa nyih büpai shahngpü nevaijü ampünyampü yum chebaongthü hatü chenyüthü hatü shola ow kohpü yumthü, hatü mi nyakla kemei yah-ei chehathü kü veihen shuohtük.

³⁶ Hapheikü büpai nyih jem lem kü Jakob mebü yanei lüdai; Jakob payü aopü mithü kü veiyei nyu.

³⁷ Hahepak kü Jakobi poplar, almond hatü plane pükaothü louh-ei hapa püshuw ammeinyamei nyiuktükpü nangkü pükaothü ammeinyamei nyuteke.

³⁸ Büpai hathü yah-ei yemthü yung yingteipü shing she philei haüteke; mehenangkü yemhimakthüi yung yingnüng leijü li shuohhamteke.

³⁹ Hanangkü mechem yumthüi ha pükaothü touei cheha shaanhenshang, shahngshi hatü ammeinyamei mon shaanteke.

⁴⁰ Jakobi mithü kemei yum mü khaatei tuh, hatü yemthü peü shahngpü hatü ampünyampü Labanei yemthü philei meeshi tuh. Hapa keiha büpai Labanei yemthü mü nevuki büpalei mithü hayaoha tuh.

⁴¹ Mechem büm meipü yemthüi cheha yahhen, Jakobi yungkukei hathü touei pükaothü haü, hatü yemthüi hatouei li yahteke,

⁴² shejao büm nemeipü yemthü touei büpai pükaothü nehaüshuoh. Hanangkü büm nemeipü yemthü peü Labanei vai, hatü büm meipü kemei Jakobei vaiteke.

⁴³ Hapa keiha hapa shennyak longi shemmei lei, hatü yemhimakthü, nyüha baha aathü, ut hatü gadu longi angteke.