KAHBHAO 28 - DAÜLANGPÜ LAIHING (BSI)

¹ Hapheikü Isaki Jakob kü nyükei büpa kü moihimantü büpa kü, “Nüng Kanan am nyüha hük mao shem teyem.

² Nüngi Paddan-Aramei anyülei chepa, ambü Bethuel amei heihtuh, hatü angko Labanei yiükha hük yahtuh.

³ “Jeiyong Kahvangi nüng kü moihimanhen, nanglak longi dahühen, hatü nanglak khongnyü longpü leihühen.

⁴ Büpai nüng hatü nüngei hühiha kü Abrahamei moihiman shuohhen; nüngi shaang benha vaishi nyupü Abraham kü Kahvangi shuohpü ha kahdok nüngei vailanghen” shei e.

⁵ Hapheikü Isaki Jakob shom, hatü büpa Paddan-Aramei Aram am Bethuelei cheha Laban, Jakob hi Esau nyilei chenyü Rebekahlei chejei touei heih.

Esau-i Ishmaelei Yiükha Yahpü

⁶ Shaang Isaki Jakob kü moihimantü Paddan-Aramei nyüha yahnüng shomtükteke shei Esau-i dan, hatü shao Isaki büpa kü moihimantü Kanan am yiük teyah shei büpa kü eshuohpü dan.

⁷ Jakobi chenyü chepa nyilei shah bangei Paddan-Aramei heihdaipü dan.

⁸ Hanangkü mechem Esau-i Kanan am yiük yahhen chepa Isaki nemongnyu shei nyingpa,

⁹ Esau-i daiyei Abrahamei cheha Ishmaelei yiükha Nebaiothlei chenaü Mahalath sheleipü nyühathü kü üei yahteke.

Jakobi Bethelei Mangh Manghpü

¹⁰ Jakobi Beer-sheba tuhtü Haranei layaongei dai.

¹¹ Büpa shing hük ngoiyei nyakdaipü nangkü hatouei paüm. Hatoueipü yaong hük yah-ei büpai ha shangjing kü letü shihen lemteke.

¹² Büpai kahdok kübü vangsho thahshi thai chantü ha kü vangsho phongshanthü phungei aong, shüh-ei shaei mangh mü eeteke.

¹³ Hatoumü Shembüpai büpa touei yaongtü, “Ngeiyü Shembüpa, ambü Abrahamei Kahvang, hatü Isak Kahvang; nüng lempü kahdokü ngei nüng hatü nüngei lihilathü kü shuohhen;

¹⁴ hatü nüngei lihilathü molo bhihhiphang kei nyuhen, hatü jomphongü heong heshü apsha pehe peü lemei daei daihen, hatü nüng hatü nüngei lihila homei kahdoknyü nanglak peü moihimanhen.

¹⁵ Ngei nüng mü nyuhen, hatü nüng melei daihen, ngei nüng yomhen, hatü ngei hapa kahdokei nüng müei leihen. Ngei nüng kü lahpü mangdük thahshi ngei nüng netuhphongpih” shei e.

¹⁶ Mechem Jakob shipü kübü paopa, büpai, “Hingmei, Shembüpayü hapa shingei nyüke, hatü ngei ha nenyingi nyupü khih” shei deih.

¹⁷ Büpai nyemei, “Hapa shing meshük nyempüang! Hapayü lebü nevai Kahvangei shem khih; hapayü vangsho shaden khih” shei e.

¹⁸ Nepphei lomi Jakobi büpai shangjing lepü yaong yah-ei shemnyü kei haongtü ha shangkü mainga langteke.

¹⁹ Hapa chingnyü kü Luz shei menlangmao büpai hapa shing kü Bethel shei men.

²⁰ Hapheikü Jakobi, “Ngei daipü yenlem yangkü Kahvang ngei mü nyuei ngei yomjema, hatü hahying shuoh-ei ashakviha owhen yahphüjema,

²¹ hatü ngei meishi leiyei opalei shem ngoijema, Shembüpayü ngelei Kahvang vaihen,

²² hatü ngei shemnyü vaishi haongpü yaongü Kahvangei shem vaihen, hatü nüngi ngei kü shuohpü lemphü kübü ngei nüng kü ankhong shuohhen” shei lah-ei eteke.