KAHBHAO 27 - DAÜLANGPÜ LAIHING (BSI)

Isaki Jakob kü Moihimanpü

¹ Mechem Isak viüdaipa, büpa mük pumdai. Büpai hashongpa Esau kü, “Hapeü” shei nyük, hatü büpai, “Oi” shei jang.

² Büpai, “Veituh, ngei sheyü viüdai; ngei mechem dihen hepak nenying.

³ Hanangkü pülah, lahhan yah-ei phaülei shaei mei jüei aongkei,

⁴ hatü ngei kü ngei hahhüpükei phai cheütü deikei, hatü ngei dishekü nüng kü moihiman shuohhen hih” shei e.

⁵ Mechem Isaki cheha Esau kü ha ejapa, Rebekah-i ha bangei nyu. Hanangkü mechem Esau-i mei jüei aonghen shingvaishi phaülei shadaipa,

⁶ Rebekah-i cheha Jakob kü, “Anjei Esau kü ampai,

⁷ ‘Ngei dihen shekü Shembüpa touei nüng kü moihiman shuohhen shingvaishi phaülei shaei mei jüei koei phai cheüei ühshih’ shei eshuohpü ngei danpeih.

⁸ Hanangkü hapeü, ngei epü nüngi bangei düktuh.

⁹ Nüngi yemthü touei heih-ei yum cheha nitshüpü nyi deikei; ha yah-ei ngei ampai hahhüpükei nemnoei temküjü,

¹⁰ nüngi ha yah-ei ampa touei deiyei nyemhahnüng shuohtuh; büpa didai shekü büpai nüng kü moihiman yahphahen” shei e.

¹¹ Shejao Jakobi chenyü Rebekah kü, “Veituh, ojei Esau-ü hangmum kohshi nyüke, shejao ngelei hangshuwü nyülüki nyüke.

¹² Opai ngei kü dükei veijü ngei büpa kü ne-ienelempü vaihen hatü moihiman nangjei thaüvaü danghen khih” shei e.

¹³ Chenyüi büpa kü, “Hapeü, nüngei thaüvaü ngei kü nyemhet; ngelei shah mon bangtuh, heihtuh, hathü yah-ei leikei” shei e.

¹⁴ Hanangkü büpa heih-ei hathü yah-ei chenyü touei lei, hatü chepai lümpükei chenyüi nemnoei temteke.

¹⁵ Hapheikü Rebekah-i pinnyüi shemei tuh-ei nyupü Esaulei ashak peü mü meipü ngaiyei naü-eepa Jakob kü owhü,

¹⁶ hatü pinnyüi yumshuw yah-ei lak hatü mum neshiüpü üng kü jümteke.

¹⁷ Hapheikü pinnyüi nemnopü phai, hatü aan cheha Jakob kü shuoh.

¹⁸ Hanangkü büpa chepa Isak touei shüei, “Opa” shei nyük, hatü chepai, “Oi, hapeü nüng üpaang?” shei jangei e.

¹⁹ Jakobi chepa kü, “Ngeiyü nüngei hashongpa Esau hih. Nüngi epükei ngei düktepih; paotuh hatü ha hahtü nüngi ngei kü moihimanshih” shei e.

²⁰ Shejao Isaki cheha kü, “Hapeü, mekei etü hajük lomshi dangaokpa?” shei phe. Büpai, “Mehenangkü Shembüpa, nüngei Kahvangi ngei kü shuohpeih” shei e.

²¹ Hahepak kü Isaki Jakob kü, “Hingmei ngelei ha Esau nevaipü hi vaipa, ngei nyinghen shangmü laki bomei veinüng heihkei” shei e.

²² Hanangkü Jakobi chepa Isak touei heih, hatü büpai bomei veitü, “Ngeü payü Jakobei ngeü khih, shejao lak payü Esaulei lak khih” shei e.

²³ Büpai büpa nenying; mehenangkü büpalei lakao Esaulei lak kei mum kohshi nyu. Hanangkü büpai büpa kü moihiman shuohtük.

²⁴ Büpai, “Nüngü hingmei ngelei hapeü Esau je?” shei phe. Büpai, “Ngei hih” shei e.

²⁵ Isaki, “Ngei nüngi cheüpü phai hahtü moihiman yahphanüng ngei touei deikei” shei e. Hanangkü büpai ha deiyei shuoh, hatü büpai ha hah, hatü büpai yiü-ao deiyei shuoh, hatü büpai hayao ying.

²⁶ Hapheikü chepa Isaki büpa kü, “Ngei yopailei heih-ei ngei kü jüpshih, hapeü” shei e.

²⁷ Hanangkü büpai yopailei heih-ei büpa kü jüp, hatü büpa kü büpalei ashakviha ngü dümteke, hatü moihimanei e: “Oh ngelei hapeülei ngü-ü Shembüpai moihimanpü kah ngü kei khih.

²⁸ Kahvangi nüng kü vangsho nyien, hatü kahdok cheü nyemshuoh; hatü hapai hahying hatü yiü changshi nyemdanghü.

²⁹ Nanglakthüi nüng chongnyempho, hatü jatthüi nüng kü aümei nyemkhüm. Nüngi nüngei jeihinaüthü shak kü shembü vaituh, hatü anyüi bühpü hapeüthüi nüng kü aümei nyemkhüm. Nüng kü thaüvaüpüthü kü thaüvaü hettuh, hatü nüng kü moihimanpüthü kü moihiman nyutuh.”

³⁰ Isaki Jakob kü moihiman shuoh-ei temei Jakob chepa toueipü vamdaihinüng chejei Esau mei kü shapü aong.

³¹ Büpaiyao hahying temei chepa touei deiyei büpai chepa kü, “Opa, nüng paoei ngei cheüpü hapa hahying hahtü ngei kü moihimanshih” shei e.

³² Chepa Isaki, “Nüng üpaang?” shei phe. Büpai, “Ngeiyü nüngei hashongpa Esau hih” shei e.

³³ Hahepak kü Isaki nyemshi kheüei, “Ngei kü hahying nemnoei deipü üpaang? Nüng peishekü ngei ha hahtü büpa kü moihiman shuohtüktih. Hingmei, büpa-üng den kü moihimanpü vaidaihen” shei e.

³⁴ Mechem Esau-i chepai epü shah danpa, büpa wongmü ngeü vamei shahyaki thepyaki chepa kü, “Opa, ngei kao moihimanshih!” shei e.

³⁵ Shejao büpai, “Anaüi lueilemei peiyei nüngei moihiman kemei yahlangtih” shei e.

³⁶ Esau-i, “Büpa keyü ha kü-üng Jakob shei menpü nevaipü je? Büpai shinnyihpai nyipa thahshi ngei kü lueilempeih. Büpai ngelei behepa hean yahlang; shaang shao büpai ngelei moihiman yahlangteke” shei e. Hapheikü büpai, “Ngei shing moihiman aoei neshiüpü je?” shei phe.

³⁷ Isaki Esau kü, “Ngei büpa nüngei shembü leihütüktih, hatü ngei büpa kü büpalei jeihinaüthü peüi büpa chongphohen, hatü hahying, yiü lemphü shuohtüktih. Hapeü, ngei nüng kü mehe dükphahenang?” shei e.

³⁸ Esaui chepa kü, “Opa, moihiman hük dangkao nyüla? Opa, ngei kao moihimanshih!” shei e, hatü Esau-i ngeüwong anei thep.

³⁹ Hapheikü chepa Isaki büpa kü jangei e: “Veituh, kahdok cheü nenyupülei, hatü vangsho nyien neshükpülei nüng chingei chongei nyuhen.

⁴⁰ Nüngü nüngei yannah-i chingchinghen, nüngi anaü chongphohen, Shejao mechem nüng khüei yaonghen, nüngei bhagchong leipü büpalei pang ngühtükaokhen.”

Esau kü Nyemei Jakob Lüdaipü

⁴¹ Shaang chepai Jakob kü moihiman shuohtükpü nangkü Esau-i Jakob kü jiühit, hatü Esau-i büpa nyingi, “Opa dihen nyih ngoikünyüke; hahepak kü Jakob jühen” shei deih.

⁴² Shejao Esaulei küpjan Rebekah kü ejashingkü Rebekah-i cheha naüeepa Jakob nyükei, “Anjei Esau-i nüng jühen küpjan temnyüke.

⁴³ Hanangkü, hapeü, ngei epü bangtuh; nüng Haranei angko Laban amei heihdaituh,

⁴⁴ hatü kansho hük büpa mü,

⁴⁵ anjei mongshihpü mangdoh thahshi, hatü büpai ha jung mangbe thahshi nyutuh. Hapheikü mon ngei shennyak shomei nüng haleipü müei leihen hih. Mehekei ngei anjiphen nyihcha hük kü mahtükhen?” shei e.

⁴⁶ Hapheikü Rebekah-i Isak kü, “Hit am nyüha deih-ei ngei mongshangnyüke. Hapa kahdokei nyupü Hit am nyüha hük keipü mü Jakobi shem yemjema ngeiyü didaipü-üng meihen khih” shei e.