KAHBHAO 26 - DAÜLANGPÜ LAIHING (BSI)

Isak hi Abimelekh Nyi

¹ Shelei Abrahamei hepak kü peipü münghishaü keiha shao hapa kahdok kü münghishaü pei, hatü Gerar leipü Philistia am Abimelekh ong touei Isak heih.

² Shembüpa Isak touei vamei, “Nüng Ijiplei teyiü; ngei nyutuh shei epü kahdokei nyutuh.

³ Hapa kahdokei kanja nyutuh, hatü ngei nüng mü nyuhen hatü moihimanphahen. Nüng hatü nüngei hühihathü shing hapa kahdok kemei shuohhen, hatü ngei ampa Abraham kü lahpü ha jiühühen.

⁴ Ngei nüngei hapeüthü vangsho lithathü kei leihühen, hatü nüngei hühihathü kü hapa kahdok kemei shuohhen, hatü nüngei hühihathü homei kahdoknyü jatthü peü moihiman danghen.

⁵ Mehenangkü Abrahami ngelei ven dan, ngei yüpü peü dük, ngelei shahkung, ngelei vanglem kemei ven bangei dükpeih” shei e.

⁶ Hanangkü Isak Gerarlei nyu.

⁷ Mechem hapa shingei nyupü shennyakthüi chenyüha nang pheshuohpa, büpai, “Pinnyü-ü ngelei naüpeü hih” shei e. Mehenangkü Rebekah ahshi-üng nela meipü nangkü pinnyü tata kü ha ami jüshuohhen khih shei deih.

⁸ Mechem Isak halei hepak luangi nyupa, Isaki Rebekah kü baktü nyupü Philistia am Abimelekh ongpai ümha shaden homei veishuohshingkü eeteke.

⁹ Hanangkü Abimelekh-i Isak kü nyüktü, “Pinnyü-ü hingmeipü nüngei nyüha khih! Nüngi mehekei pinnyü-ü, ‘Ngelei naüpeü hih’ shei epa?” shei eteke. Isaki, “Pinnyü nangkü ngelei yangnyu mahhen khih shei deihpü nangkü epeih” shei e.

¹⁰ Abimelekh-i, “Nüngi ham kü mehe lingphopa? Ngelei nanglak hanei-i anyüha mü shitü nyuhah shepü khih, hatü nüngi ham kü mang koei peihah shepü khih” shei e.

¹¹ Hanangkü Abimelekh-i nanglakthü peü kü, “Üpai hapa shennyak hatü chenyüha kü laki honghenshang jühen” shei shahvüng shuoh.

¹² Hapa bong Isaki sheili shei, hatü kho langei vet; mehenangkü Shembüpai büpa kü moihiman,

¹³ hatü hapa shennyak shemmei lei; büpai dükpü kü nyeinya nyeinya daeishe, hatü büpa longi shemmei lei.

¹⁴ Büpa mi, hatü lebü yemhimakthü longi ang, hatü chongphobüthü longi nyu; hanangkü Philistia ami büpa kü mükhüh.

¹⁵ Hanangkü jomi Abrahamei nyih kü büpalei chongphobüthüi shopü yungkuk kü kahdok hi yaong shih-ei matük.

¹⁶ Hahepak kü Abimelekh-i Isak kü, “Hamei kahdok leipü lüdaituh; mehenangkü ham meyü nüngang wong kohpüba leidaiteke” shei e.

¹⁷ Hanangkü Isak daiyei Gerarlei baümtap vetü halei nyu.

¹⁸ Abrahami shopü yungkuk shao Isaki shoteke; mehenangkü Philistia ami Abraham didaipheikü ha küptük. Chepai menpü men Isakiyao hapa yungkuk kü men.

¹⁹ Isakei chongphobüthüi kahjilei yungkuk sho, hatü jomi halei yung dangteke.

²⁰ Gerar leipü mi yombüthüi Isakei mi yombüthü mü, “Hapa yungkukü hamei hih” shei eshi deteke. Hanangkü büpai hapa yungkuk kü Esek shei men; mehenangkü jomi büpa mü deteke.

²¹ Isakei chongphobüthüi shao lebü yungkuk hük kuk, shejao ha nangkao deteke; hanangkü büpai Sitnah shei men.

²² Büpai haleipü daiyei shao yungkuk hük kuk, shejao ha nangkü üpaiyao nede. Büpai hapa kü Rehoboth shei nyük; lappai, “Shaang Shembüpai hapa kahdok kü nyuhen bümei hean shuohteke; hanangkü jen hammü nyuei daeisheyei daihen” shei e.

²³ Haleipü büpai Beer-shebalei aong.

²⁴ Ha ya Shembüpa büpa touei vamei, “Ngeiyü ampa Abrahamei Kahvang. Nüng tenyem, ngei nüng mü nyüpeih. Ngei nüng kü moihimanhen hatü ngelei chongphobü Abrahamei men kü ngei nüngei hühihathü dahühen” shei e.

²⁵ Isaki halei moidü hük lingtü Shembüpa kü khüm. Büpai halei ashakshem ve, hatü büpalei chongphobüthüi yungkuk kukteke.

Abimelekh hi Isak Nyi Vangteipü

²⁶ Nyuyang kü Abimelekh-i büpa mü chudeih kü sheühteipü Ahuzzath hatü veshan mübü Phikol nyi mütü Gerar leipü büpa touei heihteke.

²⁷ Isaki hathü kü, “Am mehekei ngei touei peiküpa? Mehenangkü ammi ngei mü ve vaiyei ngei changtükpeih” shei e.

²⁸ Jomphongi büpa kü, “Shembüpa nüng mü nyüke shei hami veiaoknyüke; hanangkü jen aa kü vangteipü nyushah; hami nüng mü vangteishuwteipü lingshah,

²⁹ shejüang hami nüng kü meheyao ten nedük, shejao meishi nyutü chingmei kü leishihpükei nüngiyao ham kü mehe tenao nedükphahen. Nüng keyü Shembüpai moihimanteke” shei e.

³⁰ Hanangkü büpai jom kü mo tem, hatü jomi hapa hah.

³¹ Nepnüng lomi paoei hüki hük mü vangtei. Hapheikü Isaki jom leitük, hatü jom chingmei kü shan yanteke.

³² Hapa nyih-üng Isakei chongphobüthü peiyei jomphongi yungkuk kukpü nang büpa kü, “Hamphongi yung dangtepih” shei e.

³³ Büpai hapa kü, “Shibah” shei men. Hanangkü hapa ching kü shaang thahshi Beer-sheba shei nyüknyeih.

Esau-i Yahpü Hit am Nyühathü

³⁴ Mechem Esau bong pinyi nyupa, büpai Hit am Beerilei yiükha Judith, hatü Hit am Elonei yiükha Basemath nyi mü shem yem,

³⁵ hatü Isak hi Rebekah nyi shing jomphongü mongshang longpü vamshing vaiteke.