KAHBHAO 25 - DAÜLANGPÜ LAIHING (BSI)

Abrahami Keturah mü Shem Yempü

¹ Abrahami lebü nyüha hük Keturah shei menpü yah.

² Pinnyüi Zimran, Jokshan, Medan, Midian, Ishbak hatü Shuah hathü büh.

³ Jokshanü Sheba hatü Dedan nyilei chepa nyu. Dedanei hapeüthüyü Asshurim, Letushim, hatü Leummim hathü nyu.

⁴ Midianei hapeüthüyü Ephah, Epher, Hanokh, Abida hatü Eldaah hathü nyu. Hathü kemei Keturahlei hühihathü nyu.

⁵ Abrahami büpai angpü peü Isak kü shuoh.

⁶ Shejao Abrahami büpalei yiükphüthüi bühpü hapeüthü kü büpai yemmü nyushiüng thintho mon shuohtü Isak toueipü yanei jom peü heong kahmükei shomtük.

Abraham Dipü

⁷ Abrahami peüshep bong 175 nyu.

⁸ Abraham viüei meishi behe leiyei den luei nyutü di.

⁹ Cheha Isak hi Ishmael nyi-i büpa Hit am Zoharlei cheha Ephronei kah Mamre yopailei nyupü yaongdungei büpalei mahng vü.

¹⁰ Hapa kah-ü Abrahami Hit am leipü shak. Halei Abrahamao chenyüha Sarah mü mahng vü.

¹¹ Abraham dipheikü Kahvangi Isak kü moihiman; büpa hahepak kü Beerlahai-roi shei epü shingei nyu.

Ishmaelei Hühihathü

¹² Hapayü Sarahlei aa lanyü Ijip am Hagar-i bühpü Abrahamei ha Ishmaelei hühihathü nyüke.

¹³ Hathüyü Ishmaelei hapeüthü bühpü aimü nyangpü nyüke: Nebaioth, Ishmaelei hashongpa, Kedar, Adbeel, Mibsam,

¹⁴ Mishma, Dumah, Maasa,

¹⁵ Hadad, Tema, Jetur, Naphish hatü Kedemah.

¹⁶ Hathüyü Ishmaelei hapeüthü jom anpünyi jomei ching hatü baümtap vepü ai nyangpü nyüke.

¹⁷ Ishmael yangnyu den bong 137 nyutü di.

¹⁸ Ishmaelei hühihathü Havilah hatü Shur nyi aa kü Ijip kü heongphi Assyrialei heihpü lemei nyu. Jomü Abrahamei lebü hühihathü mü veshangei nyu.

Esau hi Jakob Nyi Bühpü

¹⁹ Hapayü Abrahamei cheha Isakei hühihathü: Abrahamü Isakei chepa nyu,

²⁰ hatü Isak bong pinyi nyushi Paddan-Aram leipü Aram am Bethuelei yiükha, Labanei chenaü Rebekah mü shem yem.

²¹ Isaki chenyüha Rebekah shing Shembüpa kü phop; mehenangkü pinnyü nyülan vaishi nyu, hatü Kahvangi büpai phoppü kü jangei Rebekah büm nekongi lei.

²² Pinnyüi hapeü nyi peetei koshi nyu, hatü büh shekü vom mongei naü nyi deteke, hatü pinnyüi, “Ngei keyü hapakei mehekei vamnya?” shei e. Hanangkü pinnyüi Shembüpa kü phehen dai.

²³ Shembüpai pinnyü kü e: “Nüngei vomei jat nyi nyüke, nüngi bühpü jat nyi laolao yanhen; Hükü hükpa mü wong kohpüba, chejei-i chenaü chongphohen.”

²⁴ Mechem hapeü anghen hepak ngoipa, pinnyülei vom mongei yeshang nyi peetei nyuteke.

²⁵ Shongpübayü hakpüh-i, hatü büm kü ashak kei mum kohshi nyu; hanangkü büpa kü Esau shei men.

²⁶ Nyipabü kü naü-eepa chejeilei la-ong kü wongshongi düktü bühteke, hatü büpa kü Jakob shei men. Rebekah-i henyi bühpü hepak kü Isak bong pejem nyuteke.

Esau-i Behepa Hean Yutükpü

²⁷ Naü nyi nethe lei, hatü Esau-ü phaühihao kü daiyei sikari shennyak meipü lei, shejao Jakobü nenmü shemei nyuhamteke.

²⁸ Esau-i jüpü phaüyem hahpü lümpü nangkü Isaki Esau kü bam, shejao Rebekah-i Jakob kü bam.

²⁹ Nyih hük Jakobi phai müpei cheüei nyu; Esau-i sikari shapü aeiyei aong.

³⁰ Büpai Jakob kü, “Ngei aeiyei hih; hanangkü hapa hakpüh-i müptükpü phai maani yahshih” shei e. (Hanangkü büpa kü Edom shei nyükpeih.)

³¹ Jakobi, “Shuohshah, shejao nüngi shongei ngei kü behepa hean yushih” shei e.

³² Esau-i, “Ngei dihen khih, behepa hean mehe nadang nyüpa?” shei e.

³³ Jakobi, “Shongpüba kü nüngi ngei kü behepa hean shuohnyeih shei lahtuh” shei e. Esau-i Jakob kü, “Behepa hean shuohtüknyeih” shei lah.

³⁴ Hapheikü Jakobi büpa kü aan hanei hatü phai maani shuoh. Büpai ha hahtü yaongei lüdai. Hapakei Esau-i büpalei behepa hean yutük.