KAHBHAO 21 - DAÜLANGPÜ LAIHING (BSI)

Isak Bühpü

¹ Shaang Shembüpai epükei Sarah kü moihiman hatü Shembüpai Sarah kü lahtükpü dük.

² Shaang Sarah büm nekongi lei, hatü Kahvangi lahpü kü jiüshi Abraham viüdaitü yeshang hük büh.

³ Sarah-i bühjapü naü kü Abrahami Isak shei men.

⁴ Kahvangi büpa kü epükei Abrahami Isak nyih shetpabü kü shuw japtük.

⁵ Cheha Isak bühpü hepak kü Abrahamü bong kho hük nyuteke.

⁶ Shaang Sarah-i, “Kahvangi ngei kü nyihübenüng koei peiküteke; ha jung danpü peüi ngei kü nyiphahen khih” shei e.

⁷ Shao pinnyüi, “Sarah-i Abraham kü hapeü bühjahen shei üpai deihshi nyupa? Shejao büpa viüdai pheikü ngei büpa kü yeshang hük bühjapeih” shei e.

⁸ Hapa naü long, hatü hapa naü nük hah-ei pangpü nyih Abrahami mo longpü hük moteke.

Hagar hi Ishmael Nyi Deitükpü

⁹ Shejao mechem Sarah-i Ijip am aa lanyü Hagar-i bühpü Ishmael mü cheha Isak ngateiyei eepa,

¹⁰ pinnyüi Abraham kü, “Hapa aa lanyü hatü cheha nyi changtüktuh; mehenangkü hapa aa lanyülei chehai ngelei hapeü Isak mü mükjüp nehanteihüpih” shei e.

¹¹ Cheha nangkü hapa shahhidou-ü Abraham kü longi mongshang vaiteke.

¹² Shejao Kahvangi Abraham kü, “Anha hatü aa lanyü nyi nangkü nüng mongteshang; Sarah-i epü keiha düktuh; mehenangkü Isak homei mon nüngei li shei nyuhen.

¹³ Aa lanyülei hapeü nang keyü ngei büpayao jat hük leihühen; mehenangkü büpayao nüngei li” shei e.

¹⁴ Nepphei lomi Abrahami hahying hanei hatü yinghen yung yah-ei Hagar kü bhagchongei chanhütü cheha jiji deitük. Pinnyü daiyei Beersheba jahpanei paüeiyonei longtei.

¹⁵ Mechem koei daipü yung kemdaipa, pinnyüi naü pü hük phangei tuhphong.

¹⁶ Hapheikü pinnyüi lahhan kappü daiyei vüpü shing shük taishi daiyei uoteke; mehenangkü pinnyüi, “Ngelei hapeü dipü ngelei müki neveihahhüang” shei e. Pinnyü halei daiyei wongmü thep.

¹⁷ Kahvangi naü theppü dan, hatü vangsho phongshani vangsho leipü Hagar kü nyüktü pinnyü kü, “Hagar, nüng mehekei mongshangnya? Nüng tenyem; mehenangkü naü nyupü shing leipü naüei ngeü Kahvangi danteke.

¹⁸ Yaongei heih-ei naü yah-ei paümtü yawhlangtuh; mehenangkü ngei büpayü jat longpü hük leihühen” shei e.

¹⁹ Hahepak kü Kahvangi pinnyülei mük apshuoh, hatü pinnyüi yungkuk hük ee. Pinnyüi heih-ei yung maei shoei leiyei naü kü yung yinghen shuoh.

²⁰ Ha naü longyaki Kahvang hapa naü mü nyu, hatü büpa Paran jahpanei nyu, hatü sikari shennyak meipü leiteke.

²¹ Paran jahpanei nyushi chenyüi büpa shing Ijip leipü yiük hük yahteke.

Abraham hi Abimelekh Nyi Vangteipü

²² Hahepak kü Abimelekh-i büpalei veshan mübü Phikol mü heih-ei Abraham kü, “Kahvangü nüng hatü nüngi dükpü lemphü mü nyüke.

²³ Shaang nüngi Kahvangei men kü ngei mü, ngelei hühihathü mü nevaijü ngei phei kübüthü mü lueilemei nelingpih shei ngei kü lahshih. Ngei nüng mü hingshangi nyupü keiha nüngiyao ngei hatü nüng nyupü kahmük kü hingshangi nyuhen lahshih” shei e.

²⁴ Abrahami, “Ngei lahnyüpeih” shei e.

²⁵ Mechem Abrahami Abimelekh kü Abimelekhei chongphobüthüi yungkuk yahlangpü nang eshuohpa,

²⁶ Abimelekh-i, “Ha üpai dükpa, ngei nenyingangpih; nüngiyao ngei kü ne-epha; ngeiyao shinnyih-ang ha dannyeih” shei e.

²⁷ Hanangkü Abrahami mi hatü mohohbaongthü yah-ei Abimelekh kü shuoh, hatü jijinyi-i vangpüshuwpü ling.

²⁸ Abrahami mi chebihathü hayaoha nyet khaatei dei.

²⁹ Abimelekh-i Abraham kü, “Nüngi mi chebiha nyet hayaoha khaatei deipü lappeyü meheang?” shei phe.

³⁰ Büpai, “Hapa yungkuk ngei-i shoupeih shei nüngiyao denpü vaihen shangmü nüngi ngelei lak leipü hapa mi chebiha nyet yahtuh” shei e.

³¹ Hanangkü hapa shing kü Beer-sheba shei nyüknyüke; mehenangkü jijiphen hatouei vangteiteke.

³² Jijinyi Beer-shebalei vangpüshuwpü lingpheikü Abimelekh hi veshan mübü Phikol nyi Philistia kahdok yemei leidai.

³³ Abrahami Beer-shebalei tamarisk pü hük sheiteke, hatü Shembüpa, Nedohnetenpü Kahvang kü khümteke.

³⁴ Hatü benha hük keiha Abrahami Philistia kahdokei hepak luangi nyu.