KAHBHAO 20 - DAÜLANGPÜ LAIHING (BSI)

Abraham hatü Abimelekh

¹ Shaang Abrahami Mamre kübü daiyei Negeb kahdokei Kadesh hatü Shur nyi aa kü nyu. Gerarlei kanja nyutü,

² Abrahami chenyüha Sarah kü, “Pinnyü-ü ngelei naüpeü hih” shei ehamteke. Hanangkü Gerar leipü Abimelekh ongpai mühen shennyak shomei Sarah yah.

³ Shejao yahük mangh mü Abimelekh touei Kahvang yiüei büpa kü, “Nüngi yahpü nyüha tata kü dihen; mehenangkü pinnyü-ü shem yemdaipü nyüha hih” shei e.

⁴ Shaang Abimelekh-i pinnyü yopailei mangheih-i nyu; hanangkü büpai, “Shembüpa, nüngi nepungpü jat hük mahtükhen je?

⁵ Abrahami, ‘Pinnyü-ü ngelei naüpeü hih’ shei hatü Sarah-iyao, ‘Büpayü ngelei ojei hih’ shei neeangpü je? Ngei hayü jiüpeih shei deih-ei dükpeih, hatü ngei pungei nedükangpih” shei e.

⁶ Hahepak kü Kahvangi büpa kü mangh mü, “Hih, nüngi hayü jiüpeih shei deihshi dükpü khih; hanangkü nüngi ngei khüei mang nethahhüpih, hatü pinnyü kü laki nehonghüpih.

⁷ Shaang nüngi hapa nyüha chepaha kü leiyeishuoh; mehenangkü büpayü thibü hük, hatü büpai nüng shing phopphahen hatü nüng meishi nyuhen. Shejao nüngi pinnyü neleishihjema, nüng hatü nüngei nanglak kemei dihen” shei e.

⁸ Hanangkü nepnüng lomi Abimelekh-i büpalei lakchongbüthü nyükei mehe vampa ha peü büpai ejashingkü jom peüi nyem.

⁹ Hapheikü Abimelekh-i Abraham nyükei shütü büpa kü, “Nüngi ham kü mehe düknya? Ngei hatü ngelei ongching kü hajük longpü mang koei peihühen mü ngei nüng kü mehe shaiphopa? Nüngi ngei kü nedükhen dou dükteke” shei e.

¹⁰ Abimelekh-i Abraham kü, “Nüngi hapa dükhen mü nüng kü mehe deihküpa?” shei phe.

¹¹ Abrahami, “Hapa shingei Kahvang kü nyempü lanshei neshiü; ngelei nyüha tata kü ngei jüphahen khih shei deihpü nangkü ha dükpeih.

¹² Lemhükei, pinnyü-ü ngelei naüpeü hih; pinnyü-ü onyü lemeipü yiükha nevai, opa lemeipü yiükha hih, shejao ngei pinnyü yahpeih.

¹³ Mechem Kahvangi ngei opalei shem tuhtü kung kahdokei shompa, ngei pinnyü kü, ‘Nüngi ngei kü bampü dou hük dükhenü ji daipü shing peülei büpayü ojei hih shei etuh’ shei etüktü nyupeih” shei e.

¹⁴ Hapheikü Abimelekh-i mi, mohoh hatü nyüha, baha aathü deiyei Abraham kü shuoh, hatü chenyüha Sarah büpa kü nyokei shuoh.

¹⁵ Hatü Abimelekh-i, “Hathü peü ngelei kahdok hih; nüng nyuhüpü shing kü nyutuh” shei e.

¹⁶ Büpai Sarah kü, “Ngei anjei kü ngin haja lomei shuohnyeih; hapayü nüng mü nyupüthü peü touei nüng nepungangpih shei dahshakhen nangkü shuohnyeih” shei e.

¹⁷ Hapheikü Abrahami Kahvang kü phop, hatü Kahvangi Abimelekh, chenyüha hatü nyüha aathü peü hapeü anghen mü meitükshuoh;

¹⁸ mehenangkü Abrahamei nyüha tata kü Shembüpai Abimelekh am shem kempai hapeü ne-anghen mü naü uoshing küptük.