KAHBHAO 2 - DAÜLANGPÜ LAIHING (BSI)

¹ Hapa keiha vangshothü hatü kahdoknyü hatü halei nyupüthü lingei tem.

² Nyih nyetpabü kü Kahvangi büpai dükpü dou peü tem, hatü dousho peü kübü büpai nyiumeiyei nyih nyetpabü kü them.

³ Hanangkü Kahvangi nyih nyetpabü-ü moihimanei daüeilanghü; mehenangkü ha nyih Kahvangi lingpü dousho peü kübü nyiumeiteke.

Eden Pemong

⁴ Vangshothü hatü kahdok lingshingkü nyupü jung: Shembüpa Kahvangi kahdok hatü vangshothü lingpü nyih kü,

⁵ pühivung meheyao neshiü hatü sheili vang meheyao nekoh-i nyu; mehenangkü Shembüpa Kahvangi vang mangshomi nyu, hatü kah linghen üpayao nenyuang;

⁶ shejao kahmong leipü yung vamei kahdok shak kü yung shuohhen mü nyuteke.

⁷ Hapheikü Shembüpa Kahvangi kahdok leipü ashem hanei yah-ei shennyak hük ling, hatü büpalei shongsha kü yangnyu ngü dushuoh, hatü hapa shennyakü yem leiteke.

⁸ Hapheikü Shembüpa Kahvangi Edenei pe hük heong philei ling, hatü halei büpai lingpü shennyak tuh.

⁹ Shembüpa Kahvangi kahmong leipü veihen meipü hatü hahhen meipü betjükpüthü kohei longhü, hatü hapa pe jiamei yangnyu pü, manghimei nyingpü püao nyuteke.

¹⁰ Eden leipü yungyen hük pe kü yung shuohhen yenei sha, hatü hatouei ali anei phaakteke.

¹¹ Shongpü yungyenü Pishon; hapai hon nyupü Havilah kahdok shonei yenteke;

¹² hatü hapa kahdok leipü honü meishi nyüke; halei longi taoshi dangpü vong meipü meli hatü onyx douvang yaong dangnyüke.

¹³ Nyipabü yungyenü Gihon; hapai Kush kahdok shinei yennyüke.

¹⁴ Jempabü yungyenü Tigris; hapai Assyria heongphi kü yennyüke, hatü alipabü yungyenü Euphrates nyüke.

¹⁵ Shembüpa Kahvangi hapa shennyak yah-ei halei dou dükhen hatü ha kü junghen Eden pemongei tuh,

¹⁶ hatü Shembüpa Kahvangi hapa shennyak kü, “Nüngi hapa pemong leipü lemphü hahhen aok,

¹⁷ shejao nüngi manghimei nyingpü pü leipü tehah; mechem nüngi haleipü hahhen, nüng hingmei ha nyih-üng dihen” shei shahkung shuoh.

¹⁸ Shaang Shembüpa Kahvangi, “Hapa shennyak büpa monha nyuhenü nemeiang. Ngei büpa mü jiüteipü sheühbü hük linghen khih” shei e.

¹⁹ Shembüpa Kahvangi kahdok hanei yah-ei yemhimak hatü shangouthü ling. Büpai hathü kemei hapa shennyaki mehe men menkahen shei veihen müei dei, hatü yemlem ieyei kü hapa shennyaki mehe men men, hapayü yemhimakthülei men leiteke.

²⁰ Hapa shennyaki yemhimakthü hatü shangouthü peü kü men menteke, shejao shennyak shingvaishi büpa mü jiüteipü sheühbü hükao nedang.

²¹ Hanangkü Shembüpa Kahvangi hapa shennyak mükhet meiyei shihütü büpai büpalei haampat hük yahtü maju phüngtük.

²² Shembüpa Kahvangi hapa shennyak leipü yahpü haampati nyüha hük ling, hatü büpa touei pinnyü deijateke.

²³ Hahepak kü hapa shennyaki eteke: “Shaang shomshiang hapa vangü ngelei vang; hapa phaiyü ngelei phai; pinnyü kü ‘Nyüha’ shei nyükhen; mehenangkü pinnyü-ü baha leipü yahpeih.”

²⁴ Hanangkü baha hüki laophülei nyühipa tuhphongtü laophülei nyüha mü mongjemei nyunyeih, hatü jijinyi phai hük leinyeih.

²⁵ Hapa baha hatü chenyüha nyiphen bümkong nyu, shejao jiji neveütei.