KAHBHAO 18 - DAÜLANGPÜ LAIHING (BSI)

Sodom hatü Gomorrah Mahtükpü

¹ Nyihnüng shaampü nangkü Mamrelei longkham püchong yopai kübü büpalei ashakshem shadenei Abraham uoshi nyushingkü büpa touei Kahvang peiteke.

² Abrahami ngangei veishingkü büpa yopailei shennyak jem yaongshi ee. Büpai hathü eeyei hathü mü pongteinüng ashakshem shaden leipü mokei heih-ei kahdokei aümei shaei khüm.

³ Büpai, “Oh Shembüpa, amphongi bamei deihjema, shemei nehaki tepeihdai.

⁴ Ngei yung maani ankününg; lakhüh shephutü hapa püdhümei nyiumeituh.

⁵ Ngei amphongi hahhen lemhük ankününg, am chongphobülei shemei peidaiphei keyü hapa hahtü wong koh-ei daituh” shei e. “Meiteke, nüngi epükei düktuh” shei jangei e.

⁶ Abrahami shemei shüei Sarah kü, “Shülangi atta aan meipü dok jem hükshing yah-ei ngümei aan lingtuh” shei e.

⁷ Hapheikü büpai mohoh khaokei heih-ei mohoh chebaongha meipü yah-ei büpalei chongphobü kü shülangi nemnotuh shei shuoh.

⁸ Büpai amma cheü, amma hatü phai anei hathü kü shuoh, hatü jomphongi ha hahshingkü büpai jomphong kü ühyingei püdhümei nyu.

⁹ Jomphongi büpa kü, “Anyüha Sarah melei nyüpa?” shei phe. “Pinnyü-ü shem mongei nyüke” shei büpai e.

¹⁰ Hahepak kü hathü khongkü hüki, “Jiüpü hepak kü ngei nyokei leikahen; hahepak kü anyüha Sarah-i yeshang bühei nyuhen hih” shei e. Hahepak kü Sarahyü büpalei ngaümpheilei shadenei yaongshi nyu.

¹¹ Abraham hi Sarah nyiyü sheyü viüei bong longi lüdai; Sarahyü hapeü bühhen hepak peihdaitü nyu.

¹² Hanangkü Sarah-i pinnyülei mongei nyiyei deihtü, “Ngei sheyü wong kemdai, shembüpayü viüdaijü jemteihen mong kü lekahen je?” shei e.

¹³ Hahepak kü Shembüpai Abraham kü, “Ngei hajük viüdaipheikü ngei hapeü bühhen je shei mehekei Sarah-i nyiyei enya?

¹⁴ Shembüpai neaokbenüng lemhük nyüpü je? Jiüpü hepak hük kü ngei nyokei leikahen, hatü Sarah-i yeshang hük büh-ei nyuhen” shei e.

¹⁵ Shejao Sarah-i nyemei, “Ngei nenyi-angpih” shei shahshem e. Büpai, “Nüng nyiphei” shei e.

Sodom Mahtükhen Epü

¹⁶ Hapheikü jomphong hatoueipü layaongei Sodom eehen lemei dai, hatü Abrahamao hathü jingei dai.

¹⁷ Shembüpai, “Ngei mehe dükhen nyu, ha Abraham kü johen je?

¹⁸ Abrahamei hühihathüi longpü hatü wong kohpü jat hük leihen, hatü büpa homei kahdoknyü jatthü peü moihimanhen.

¹⁹ Mehenangkü mehe jiüpü hatü shahhing ha dükei Shembüpalei lem kü kamhen shingvaishi büpai laophülei hapeüthü hatü shem am kü nyuhhen venhen ngei Abraham jepeih; shejüang Shembüpai Abraham kü mehe lahpa, ha koei peihen” shei e.

²⁰ Hapheikü Shembüpai, “Antepa Sodom hatü Gomorrah khüei nyembenüng thaüvaü nyüpeih, hatü jomei mang ahshi-üng longdaiteke.

²¹ Ngei touei peiküpü thaüvaü aimü jomi nedükpü hi dükpüshang ngei yiüei veihen, hatü hapakei nevaipü vaijema, ngei nyinghahhen hih” shei e.

²² Hanangkü hapa shennyak nyi Sodom lemei yiüdaitü Shembüpayü Abraham touei yaongshi nyu.

²³ Hahepak kü Abrahami yopailei heihtü, “Nüngi daülangpüthüao mangthü mü mahtükhen je?

²⁴ Nyingshah-i hapa chingnyü kü daülangpü shennyak jom pinyipüan nyuküjü haleipü jom pinyipüan nangkü dangkao mang netüki ha ching mahtükhen je?” shei phe.

²⁵ “Henüng keipü dou dükkahen shei nüngi tedeihhah; daülangpüthü mangthü mü aihük mü jütükhen shei nüngi tedeih. Kahdoknyü peü kü Shahphenbüi jiüpü nedükhen je?”

²⁶ Shembüpai, “Hapa Sodom chingnyülei daülangpü shennyak jom pinyipüan dangkao nyuküjema, jomei med kü ngei hapa chingnyü yangei tuhhen” shei e.

²⁷ Shao Abrahami, “Ngeiyü bhihla keiha maanpü kong yangnyu vaijao Shembüpa touei monglongei ngei ha enyeih,

²⁸ halei paoh daülangpü shennyak jom pinyipünga nyuküjema mekei? Shennyak nga kompü nangkü nüngi hapa chingnyü mahtükhen je?” shei e. “Halei jom pinyipünga nyuküjao ngei hapa chingnyü nemahtükpih” shei büpai e.

²⁹ Shao chem büpai büpa kü, “Jom pinyi mon chongküjü mekei?” shei e. “Jom pinyilei med kü ngei ha nedükpih” shei e.

³⁰ Shao büpai, “Shembüpai chingmeilemlingei mongtemangpha, ngei shao eshah. Jom hapüan mon nyuküjü mekei vaihen?” shei e. Büpai, “Halei jom hapüan mon nyuküjao ngei ha nedükpih” shei e.

³¹ Abrahami, “Ngei nüng kü hajük monglongshi epü kü mang tükshih. Halei jom kukha mon nyuküjü mekei vaihen?” shei e. Büpai, “Jom kukhalei med kü ngei jom nemahtükpih” shei e.

³² Shao büpai, “Shembüpai chingmeilemlingei mongtemangpha, ngei shao chem mon eshah. Halei jom an mon nyuküjü mekei vaihen?” shei e. Büpai, “Jom anei med kü ngei jom nemahtükpih” shei e.

³³ Mechem Shembüpai Abraham mü shah eteiyei kempa, büpa lüdai hatü Abrahamao shemei leidai.