KAHBHAO 17 - DAÜLANGPÜ LAIHING (BSI)

Abrami Shuw Jappü

¹ Mechem Abram bong 99 nyupa, Shembüpa büpa touei peiyei, “Ngeiyü Jeiyong Kahvang; ngei touei eela nekoh-i kamtuh.

² Ji aa kü vangpüshuwpü ngei shahbhawlaongvethen hatü nüngei hühihathü longi dahühen” shei e.

³ Hahepak kü Abrami aümei sha, hatü Kahvangi büpa kü,

⁴ “Ngei nüng mü vangteipeyü ha hih: Nüngü jat longilei pa vaihen.

⁵ Nüng kü hajük kü Abram shei nenyükhen; nüngei menü, Abraham vaihen; mehenangkü ngei nüngü jat longilei pa leihütepih.

⁶ Ngei nüngei li longi dahühen; ngei nüng kübü jat longi linghen, hatü nüng kübü ongthü vamhen.

⁷ Ji aa kü hatü nüngei hühihathü ngoikahen denshem peü kü ngei nüngei Kahvang hatü nüng pheilei nüngei hühihathü kü jomei Kahvang vaihen ngei nüng mü vangteipeyü nedohnetenpü vangpüshuwpü leihühen.

⁸ Kanan kahdok kempü, melei nüng shaang benha kei nyunya, hayü ngei nüng hatü nüng phei kübü nüngei hühihathü kü den shing vangei shuohhen, hatü ngei jomei Kahvang vaihen” shei e.

⁹ Kahvangi Abraham kü, “Nüng hatü nüng phei kübü ngoikahen hühihathüi ngelei ha vangpüshuwpü jiüshi düktuh.

¹⁰ Hapayü ngei nüng hatü nüng phei kübü hühihathü mü vangteipü nyüke; ammi ha jiüshi düktuh. Am bahathü kemei shuw japtükhen.

¹¹ Ammi shuw japtükhen, hatü hapayü ji aa kü vangpüshuwpü nyuhen.

¹² Ngoikahen den peü kü nüng mü nyupü bahanaü peü nüngei shemei bühpü vaijao, kung am nüngei li nevaipü lop shuohtü shakpü vaijao nyih shetpabü kü shuw japtüktuh.

¹³ Shemei bühpü aa vaijao, lop shuohtü shakpü vaijao jomei shuw japtüktuh. Nüngei büm kü ngei vangteishuwteipeyü nedohnetenpü vangpüshuwpü vaihen.

¹⁴ Baha üpai shuw nejaphen, büpayü ngelei nanglak khong kübü yaktükhen; mehenangkü büpai vangpüshuwpü mangtükteke.”

¹⁵ Kahvangi shao Abraham kü, “Anyüha Sarai kü sheyü Sarai shei nenyükhen; shaang mü leitü Sarah shei nyüktuh.

¹⁶ Ngei pinnyü kü moihimanhen, hatü ngei pinnyü homei nüng kü yeshang hük shuohhen. Pinnyü jat longilei nyü leihen nangkü ngei pinnyü kü moihimanhen; pinnyü kübü nanglakthülei ongthü vamhen” shei e.

¹⁷ Abrahami aümei shatü büpa nying nyiyei, “Bong kho hük pajei hüki hapeü anghen je? Bong 90 lomdaipü Sarah-i naü bühhen je?” shei e.

¹⁸ Abrahami Kahvang kü, “Ishmael pa-ang ngelei mükjüp vaihen moihimanshih!” shei e.

¹⁹ Hahepak kü Kahvangi, “Nevai, shejao anyüha Sarah-i yeshang hük bühkahen, hatü nüngi ha naü kü Isak shei mentuh. Ngei büpa mü vangpüshuwpü hük linghen, hatü hapayü büpa phei kübü hühihathü shing nedohnetenpü vangpüshuwpü vaihen.

²⁰ Ishmael shingvaishi nüngi phepü ngei danphei: Hingmei ngei büpa kü moihimanhen; ngei büpa kü hapeü longi shuoh-ei hühihathü dahühen. Büpayü ong anpünyilei pa vaihen, hatü ngei büpayü jat longpü hük leihühen.

²¹ Shejao ngüvang shaangkei Sarah-i bühkahen nyupü anha Isak mü mon ngei vangpüshuwpü linghen” shei e.

²² Mechem büpai Abraham kü ha eyei kempa, Abraham toueipü Kahvang aongdai.

²³ Ha nyih-üng Abrahami cheha Ishmael, hatü shemei bühpüthü hatü lopi shakpüthü peü kü Kahvangi epükei shuw japteke.

²⁴ Abrahami shuw jappü hepak kü büpa bong 99 nyu,

²⁵ hatü cheha Ishmael-ü bong anpüjem nyu.

²⁶ Abraham hi Ishmael nyi jemi nyih hük kü shuw japteke,

²⁷ hatü shemei bühpü, kung am lopi shakpüthü peü büpa mü shuw japteke.