KAHBHAO 16 - DAÜLANGPÜ LAIHING (BSI)

Ishmael Bühpü

¹ Shaang Abramei chenyüha Sarai-i hapeü nebüh. Shejao pinnyü mü Ijip am nyüha aa Hagar shei menpü nyu.

² Hanangkü pinnyüi Abram kü, “Shembüpai ngei kü naü nebühhen bangtükpü khih. Heih-ei ngelei nyüha aa mü paümtuh; pinnyü homei-ang ngei hapeü danghen aokpeih” shei e. Hanangkü Abrami Sarai-i epü bang.

³ Abrami Kananei bong an nyupheikü chenyüha Sarai-i Ijip am aa lanyü Hagar deiyei chepaha kü büpalei nyüha vaihen shuoh.

⁴ Büpai Hagar mü paüm, hatü pinnyü büm nekongi lei. Mechem pinnyüi ngei büm nekongi leiteke shei nyingpa, pinnyüi pinnyülei shembülanyü kü ne-ienelemhen chongpang.

⁵ Hahepak kü Sarai-i Abram kü, “Hagar-i ngei kü ne-ienelemi dükpeyü nüngi pungpeih. Ngei ngelei aa nüngei lak kü shuohpeih, shejao pinnyüi pinnyü büm nekongpü nyingei ngei kü neienelemnyu khih. Kahvangi ji aa kü shah nyemphenkei” shei e.

⁶ “Nüngei aa lanyü-ü nüngei lakmongei nyüpeih. Nüng kü meipükei dükeishuoh” shei Abrami e. Hanangkü Sarai-i Hagar kü ne-ienelemi dükshuohpü nangkü pinnyü paüei lüdai.

⁷ Shembüpalei phongshan hük jahpanei yunglok hük yopailei Hagar heüteke; hapayü Shurlei heihpü lemhaoei shiüteke.

⁸ Büpai, “Sarailei aa lanyü Hagar, nüng meleipü peipa, hatü melei dainya?” shei phe. “Ngei ngelei shembülanyü Sarai toueipü paüei dainyüpeih” shei e.

⁹ Hahepak kü Shembüpalei phongshani pinnyü kü, “Nüng pinnyü touei nyokei leituh hatü pinnyü phangkü nyutuh” shei e.

¹⁰ Hahepak kü büpai, “Ngei nüng kü iehen neaoki hühihathü longi dahühen hih” shei e.

¹¹ Shembüpalei phongshani shao pinnyü kü eteke: “Nüng sheyü hapeü nyüke, hatü yeshang hük bühhen. Nüngi büpa kü Ishmael shei menhen; Mehenangkü Shembüpai nüngei mongshang nyingteke.

¹² Anhayü phaü gadu kei nyuhen; büpai mih peü khüei yaonghen, hatü peüi büpa khüei yaonghen, hatü büpayü büpalei jeihinaü peü mü ve vaiyei nyuhen.”

¹³ Hanangkü pinnyü mü shah eteipü Shembüpa kü pinnyüi, “Nüngü El-roi; mehenangkü pinnyüi, ‘Ngei kü veipü Kahvang ngeiyao shaang büpa eetepih’ ” shei e.

¹⁴ Hanangkü hapa yunglok kü, “Beer-lahai-roi” shei men. Hapayü Kadesh hi Bered nyi aa kü nyuteke.

¹⁵ Hanangkü Hagar-i Abram kü yeshang hük büh, hatü pinnyüi bühpü naü kü Ishmael shei men.

¹⁶ Hagar-i Ishmael bühpü hepak kü Abramü bong 86 nyuteke.