KAHBHAO 15 - DAÜLANGPÜ LAIHING (BSI)

Kahvangi Abram mü Vangteipü

¹ Hapheikü Shembüpalei shah Abram touei manghkhang hük kü peiyei, “Nüng tenyem, Abram, ngeiyü nüngei inyüshung, nüngei laklei longi nyüpeih” shei eteke.

² Shejao Abrami, “Oh Shembüpa Kahvang, nüngi ngei kü mehe yahphahen? Mehenangkü ngeiyü hapeü neshiü, hatü ngelei mükjüpü Damaska am Eliezer-i yahhen je?” shei e.

³ Hatü Abrami, “Nüngi ngei kü hapeü neyahpha, hatü ngelei shemei bühpü aa-i ngelei mükjüp yahhen khih” shei e.

⁴ Shejao Shembüpalei shah büpa touei peiyei, “Hapa shennyakü nüngei mükjüp nevaihen, shejao nüngei büm kübü hapeü-üng nüngei mükjüp vaihen” shei e.

⁵ Büpai büpa kü chingshelei ngaiyei, “Vangsholei ngangei veituh, hatü nüngi ieaokülashang lithathü ietuh” shei e. Hapheikü büpai, “Hapa keiha nüngei hühihathü nyuhen” shei e.

⁶ Abrami Kahvang kü hinglem, hatü Kahvangi büpa kü hingshangpü shennyak shei ieyeilem.

⁷ Hapheikü büpai büpa kü, “Ngeiyü nüng kü hapa kahdok shuohhen shingvaishi Babylonia kahmük Ur leipü nüng müei daipü Shembüpa” shei e.

⁸ Shejao büpai, “Oh Shembüpa, ngei hapa kahdok yah-aokhen shei ngei mekei nyingaokhen?” shei phe.

⁹ Shembüpai büpa kü, “Ngei touei bong jem lomdaipü mohoh hük, yum hük, hatü mi hük mü athuba hatü khakhi ouha hükbaong deikei” shei e.

¹⁰ Abrami hathü peü deiyei nyi nyi anei vettü hükkeikei dangteiyei haü, shejao büpai outhü payü nekaktük.

¹¹ Hahepak kü hapa phai kü alang laongteke, shejao Abrami ha changtük.

¹² Vanghe shüdaiyaki Abrami mükhet ngoiyei shidai, hatü büpa touei nyemshi nyakei pei.

¹³ Shembüpai büpa kü, “Nüngei hühihathü kung kahdokei daiyei benhayaha vaiyei nyuhen, hatü aa vaiyei bong 400 thahshi shüveipü ponghah-ei nyuhen ha nyingtuh.

¹⁴ Shejao jom aa vaishi chongphopü jat kü ngei hanghi shuohhen, hatü hapheikü jom mophimo longi kotü vamei daihen.

¹⁵ Shejao nüng payü chingmei kü den luei nyutü diyei vühen.

¹⁶ Den alipabü kü nüngei hühihathü hatouei nyokei leihen; mehenangkü Amor amei mang shao-üng maei mangaong” shei e.

¹⁷ Mechem vanghe shüei nyakpa, dük keiha aw hük awlom kohshi vamei haüpü phai aa kü peih-ei dai.

¹⁸ Ha nyih Shembüpai Abraham mü vangpüshuwpü hük ling, hatü büpa kü, “Nüngei hühihathü kü hapa kahdok Ijip yungyen kübü Euphrates yung thahshi,

¹⁹ hatü Ken, Kenizz, Kadmon,

²⁰ Hit, Perizz, Rephaim,

²¹ Amor, Kanan, Girgash, hatü Jebus amei kahdok shuohnyeih” shei e.