KAHBHAO 14 - DAÜLANGPÜ LAIHING (BSI)

Abrami Lot Yangpü

¹ Shinar am Amraphel ongpa, Ellasar am Ariokh ongpa, Elam am Kedorlaomer ongpa, hatü Goiim am Tidal ongpa hathülei nyih kü jomi,

² Sodom am Bera ongpa, Gomorrah am Birsha ongpa, Admah am Shinab ongpa, Zeboiim am Shemeber ongpa, hatü Bela (Zoar) amei ongpa hathü mü hokteke.

³ Hapa ongthülei veshanthü sheptü Siddim (lappai, Dipü Yungching) Kahjilei thaiteke.

⁴ Bong anpünyi thahshi jom Kedorlaomer phang kü nyu, shejao bong anpüjempabü kü jomi khüei yaongteke.

⁵ Bong anpüalipabü kü Kedorlaomer hatü büpa mü nyupü ongthü peiyei Ashteroth-Karnaim leipü Rephaim, Ham leipü Zuzim, Shaveh-Kiriathaim leipü Emim,

⁶ hatü phaüshang kahmük Seir leipü Hor kübü heihdaipü jahpan jung kü nyupü Elparan thahshi,

⁷ hapheikü nyokei leiyei En-Mishpat (lappai, Kadesh) lemei heih, hatü Amalek kahdok kemei hatü Hazazon Tamar kü nyupü Amor kahdok kemei neüteke.

⁸ Hapheikü Sodom ong, Gomorrah ong, Admah ong, Zeboiim ong, hatü Bela (Zoar) ong hathü daiyei Siddim Kahjilei,

⁹ Elam am Kedorlaomer ong, Goiim am Tidal ong, Shinar am Amraphel ong, hatü Ellasar am Ariokh ong, hathü ongthü ali khüei ong nga-i hokhen show ling.

¹⁰ Siddim Kahjilei müh kohpü kahsha longi nyupü nangkü Sodom hatü Gomorrah ong nyi nyaidai, hatü shennyak hanei halei vü, hatü hanei shangching lemei nyaidai.

¹¹ Hathü ong ali-i Sodom hatü Gomorrah amei douthü, hatü hahying kemei shetei leidai.

¹² Jomi Abramei chenaü Lot Sodomei nyupü nangkü büpa hatü mophimo kemei yah-ei lüdai.

¹³ Yangei daipü shennyak hüki Hebrew am Abram touei peiyei büpa kü ha jung ejateke. Shaang Abramü Amor am Mamrelei longkham püchong yopailei nyu. Mamre hatü chenaü Eshkol hatü Aner hathüyü Abramei mongjempathü nyu.

¹⁴ Mechem Abrami chenaü yepei lüdaipü jung danpa, büpai shemei bühpü veshanthü jom 318 mütü Dan thahshi changei dai.

¹⁵ Yanüng Abrami büpalei veshanthü hantü Damaska kü apshaphi Hobah thahshi hathü jühen changei dai.

¹⁶ Büpai douthü peü dang, hatü chenaü Lot hatü büpalei mophimo mü nyühathü hatü lebü shennyakthüao yah-ei lei.

Melkizedeki Abram kü Moihimanpü

¹⁷ Mechem Abrami Kedorlaomer hatü büpa mü nyupü ongthü neütü leijapa, Sodom ongpai büpa mü pongteinüng Shaveh Kahjilei (lappai, Ongpalei Kahji) heihteke.

¹⁸ Hahepak kü Salem ongpa Melkizedeki Abram kü aan hatü yiü deiyei shuoh. Büpayü Jaipüba Kahvangei ngongpa nyuteke,

¹⁹ hatü büpai Abram kü moihimanei e: “Kahdok vangsho Lingbü Jaipüba Kahvangi Abram kü moihimantuh.

²⁰ Nüngei lak kü vepathü shuohpü Jaipüba Kahvangei men longtuh.” Hahepak kü Abrami büpa kü lemphü kübü ankhong shuohteke.

²¹ Hahepak kü Sodom ongpai Abram kü, “Ngelei nanglakthü peü ngei kü yahshih, ha jeiyei douhinang yahhahtuh” shei e.

²² Shejao Abrami, “Shembüpa Jaipüba Kahvang, kahdok vangsho Lingbü kü ngei lahtüktih.

²³ ‘Ngei homei Abram shemmei leihüpeih’ shei nüngi ne-ehen shingvaishi ngei nüngei vilah hükao nevaijü lathuh vü hükao neyahpih.

²⁴ Ngei payü meheyao neyahhahpih, shejao nethethüi mehe hah, hatü ngei mü daipü Aner, Eshkol hatü Mamre hathülei phaihan nyemyahhah” shei eteke.