KAHBHAO 13 - DAÜLANGPÜ LAIHING (BSI)

Abram hi Lot Nyi Yanpü

¹ Hanangkü Abrami Ijip leipü vamei Negebei chenyüha, büpalei angpü lemphü yah-ei aong, hatü büpa mü Lot-ao dai.

² Abramü yemhimak, hon hi ngin longi angpü shemmeipa nyuteke.

³ Büpa Negeb leipü shing hük kübü hük shei büpai shongei ashakshem vepü Bethel hi Ai nyi aa mangngoi thahshi longteiyei nyu,

⁴ halei büpai shongei moidü hük ling. Halei Abrami Shembüpa kü khüm.

⁵ Shaang Abram mü daipü Lot leiyao mi, mohoh hatü ashakshem nyu,

⁶ hanangkü jiji jemi nyuhen mü kahdok neshiü; mehenangkü jiji jemi nenyuaokhen mü mophimo longi nyuteke,

⁷ hatü nyeinya vaishi Abramei mi yombüthü hi Lotei mi yombüthü aa kü deyeilaoei nyu. Hahepak kü Kanan hatü Perizz amü hapa kahdokei nyuhamteke.

⁸ Hahepak kü Abrami Lot kü, “Ji aa kü hatü jilei mi yombüthü aa kü meheyao dehilao nenyushah; mehenangkü jiyü shem am hih.

⁹ Nüng she leipü kahdok eenyüla? Ji yanshah. Nüng laknyong lemei daijema, ngei lakdah lemei; nüng lakdah lemei daijema ngei laknyong lemei daihen” shei e.

¹⁰ Lot-i laophü shing kahdok vei, hatü Jordan Kahji yung changshi Shembüpalei pemong kei, hatü Zoar lemeipü Ijip kahdok kei eeteke. (Hapayü Shembüpai Sodom hatü Gomorrah mahtük shekü shiüteke.)

¹¹ Hanangkü Lot-i büpa shing Jordan Kahji kemei jehahtü heong philei dai. Hapakei jiji yanteke.

¹² Abramü Kanan kahdokei nyu, hatü Lot-ü kahji leipü chingnyüthü chi kü nyu, hatü Sodom yopailei baümtap ve.

¹³ Shaang Sodom amü ahshi nemei, hatü Shembüpa khüei mang longi thah.

Abram Hebronei Heihpü

¹⁴ Abram toueipü Lot yandai pheikü Shembüpai büpa kü, “Nüng yaongpü shing kübü ngangei heong, heshü, apsha, pehe peü lemei veituh.

¹⁵ Nüngi eepü kahdok kemei ngei nüng hatü nüngei lihilathü kü den shing shuohhen.

¹⁶ Ngei nüngei lihila molo bhihhiphang kei leihühen. Hanei ami molo bhihhiphang ieaokjema nüngei hühihathüao ieaokhen.

¹⁷ Shaang, layaongei kahdok bahiyang kemei kü kamtuh; ngei nüng kü ha shuohhen” shei e.

¹⁸ Hanangkü Abrami büpalei baümtap chaiyei daiyei Hebron Mamre leipü kahdok longkham püchongei nyu, hatü halei büpai Shembüpa kü moidü hük ling.