KAHBHAO 11 - DAÜLANGPÜ LAIHING (BSI)

Babel Shangdü

¹ Shaang kahdoknyü kemeilei shahlem hük hatü shahjük aihük mü nyu.

² Jom heong lemei daishingkü jomi Shinarlei kahji hük heü, hatü halei nyu.

³ Jom hüki hük kü, “Kei, jeni itayaong lingei meishi jakshah” shei etei. Jomi yaong nangjei itayaong ling hatü cement, bhih hatü yung nangjei müh yahteke.

⁴ Hapheikü jomi, “Kei, jeni jen shing chingnyü longpü hük lingshah hatü shangdü hük vangsho thahshi lingshah, shejüang jenei men nyuhen hatü jen kahdoknyü bahiyang kü neyandai-i nyuhen” shei etei.

⁵ Hahepak kü Shembüpai hapa chingnyü, hatü shennyakthüi vepü shangdü kü veihen yiüteke.

⁶ Shembüpai, “Aihük shennyakthü aihük shah etü hapakei dükjema, jomi tempü meheyao neaokpeih shei nenyu-ükhih.

⁷ Kei, jen yiüei hüki epü hüki nedanhen mü jomei shah buktükshah” shei e.

⁸ Hanangkü Shembüpai kahdoknyü bahiyang peü lemei jom yantük hatü chingnyü nelingi tuhphong.

⁹ Hanangkü hapa kü Babel shei nyük; mehenangkü halei Shembüpai kahdoknyü peüei shah nepongpaüi buktük, hatü Shembüpai kahdok shak peülei jom yantük.

¹⁰ Hathüyü Shemei hühihathü: Shem bong 100 nyushi bünghiyang pheikü Arpakhshad bühteke,

¹¹ hatü büpai Arpakhshad bühpheikü bong 500 nyu, hatü lebü yiükha yeshangthü bühteke.

¹² Arpakhshad bong 35 nyushi Shelah büh,

¹³ hatü Shelah bühpheikü büpa bong 403 nyu, hatü lebü yiükha yeshangthü büh.

¹⁴ Shelah bong 30 nyushi Eber büh,

¹⁵ hatü Eber bühpheikü büpa bong 403 nyu, hatü lebü yiükha yeshangthü büh.

¹⁶ Eber bong 34 nyushi Peleg büh,

¹⁷ hatü Peleg bühpheikü büpa bong 430 nyu, hatü lebü yiükha yeshangthü büh.

¹⁸ Peleg bong 30 nyushi Reu büh,

¹⁹ Peleg bühpheikü büpa bong 209 nyu, hatü lebü yiükha yeshangthü büh.

²⁰ Reu bong 32 nyushi Serug büh,

²¹ hatü Serug bühpheikü büpa bong 207 nyu, hatü lebü yiükha yeshangthü büh.

²² Serug bong 30 nyushi Nahor büh,

²³ hatü Nahor bühpheikü büpa bong 200 nyu, hatü lebü yiükha yeshangthü büh.

²⁴ Nahor bong 29 nyushi Terah büh,

²⁵ hatü Terah bühpheikü büpa bong 119 nyu, hatü lebü yiükha yeshangthü büh.

²⁶ Terah bong 70 nyushi Abram, Nahor hatü Haran hathü bühteke.

Terahlei Hühihathü

²⁷ Hathüyü Terahlei hühihathü: Terah-ü Abram, Nahor hatü Haran hathülei chepa nyu, hatü Haranü Lotei chepa nyu.

²⁸ Haranü büpa bühpü Babylonia kahdok Ur chingei nyushi chepa shekü didai.

²⁹ Abram hi Nahor nyi-i nyüha yah; Abramei nyühayü Sarai, hatü Nahorlei nyühayü Milkah nyu. Pinnyü-ü Milkah hi Iskah nyilei chepa Haranei yiükha nyu.

³⁰ Shaang Saraiyü nyülan leidaitü hapeü neshiüi nyu.

³¹ Terah-i cheha Abram, chehü Lot, Haranei cheha, hatü cheha Abramei nyüha Sarai müei Babylonia kahdok Ur ching tuhtü Kanan kahdokei layaongei dai, shejao jomphong Haranei nyu.

³² Terah bong 205 nyutü büpa Haranei didai.