JOSHUA 8 - DAÜLANGPÜ LAIHING (BSI)

Ai Chingnyü Neütükpü

¹ Hahepak kü Shembüpai Joshua kü, “Nüng tenyem, nevaijü mong temaan. Nüngi veshanthü peü mütuh hatü aongei Ai ching hahtuh. Mehenangkü ngei nüngei lak kü Ai ongpa, büpalei nanglakthü, ching hatü kahdok shuohtepih.

² Nüngi Jeriko hatü jomei ongpa kü dükshuohpükei Ai hatü haleipü ong kao dükeishuoh; shejao haleipü douhinang hatü yemhimakthü laophü laophü shing leihahtuh. Hapa ching ngaümphei phikü show lingtuh” shei eteke.

³ Hanangkü Joshua hatü veshanthü kemei Ai ching hahhen layaongei dai. Büpai hampathü haja hapüan je, hatü jomphong nyak kü,

⁴ hapa ngeükhüam shuoh-ei shomteke: “Amphongi hapa ching ngaümphei philei showtuh. Tailei tedai. Am peü thashimashi nyutuh.

⁵ Ngei hatü ngei mü daipüthü ching mongei shühen, hatü mechem sheleipükei jomi hamphong mü hoknüng heihkahenshang, hamphong nyaidaishuohhen.

⁶ Jomi ham kü changei ching kübü laoei vamkahen; mehenangkü jomi, ‘Hathüyü sheleipükei-üng jen kü nyemei nyainyu khih’ shei eteihen. Hanangkü mechem ham jom toueipü nyaiyei leikahenshang,

⁷ amphong show kübü paohen hatü ching hahhen. Mehenangkü Shembüpa, ammei Kahvangi ammei lak kü hapa ching yahphahen.

⁸ Mechem ammi hapa ching hahhenshang, Shembüpai epükei aw hapeishuoh. Ngei shuohpü ngeükhüam ha kü veituh” shei eteke.

⁹ Hanangkü Joshua-i jomphong deishih, hatü jomphongi Bethel hatü Ai nyi aa kü Ai heshüphi kü show uo, shejao Joshua payü ha ya nanglakthü mü baümtapei paümteke.

¹⁰ Nepphei lomi Joshua-i veshanthü nyükei thaihü, hatü Israel am mübüthü mü Ai chingei aong.

¹¹ Büpa mü nyupü veshanthü peü aongei chingnyü penyüsha yopailei ngoiyei Ai ching apshaphi kü jomphong hatü Ai aa kü kahji-i mon aatü baümtap veteke.

¹² Joshua-i veshan haja nga hükshing mon Bethel hatü Ai ching heshüphi aa kü show uohüteke.

¹³ Jomi veshanthü shingnüngei show kü uohüei baümtapei nyupüthüi Ai ching apshaphi tap, hatü show kü uopüthüi heshüphi tapteke. Shejao ha ya Joshuayü kahjilei paümteke.

¹⁴ Mechem Ai ongpai ha eepa, büpa hatü ching kü nyupü shennyakthü peü nepnüng lomi Israel am mü thep ponghen Arabah shei epü shingei heih, shejao ngaümphei lemeipü ve vamei jüshuohhen shei büpai nenying.

¹⁵ Joshua hatü Israel am kemei nyempükei hu, hatü jomphong yingnyü philei mokdaishuoh.

¹⁶ Hanangkü ching kü nyupü shennyakthü peü nyükteitü thaiyei jom kü chang, hatü jomphongi Joshua kü changshing kü ching kübü khaatdaitü nyu.

¹⁷ Israel am kü changei nedai-i shennyak üpayao Ai nevaijü Bethelei nenyu. Jomi Israel am kü changei lüdaitü chingü apshi tuhphong.

¹⁸ Hahepak kü Shembüpai Joshua kü, “Nüngi noshi nyupü phung Ai philei haongtuh; mehenangkü ngei hapa ching nüngei lak kü shuohhen” shei e. Hanangkü Joshua-i Ai philei phung haongteke.

¹⁹ Büpai phung notü lak haonghinüng show uopü veshanthü vamei shehongei heih hatü ching mongei shüei ching hah hatü aw hapteke.

²⁰ Mechem Ai ami ngaümphei lemei yaakei veipa, vangmü dhaüshi ching kü aw aongdaitü eeteke. Sheyü jom yanglem neshiü; mehenangkü jahpan philei nyaidaipü Israel amao nyokei hoknüng leiteke.

²¹ Mechem Joshua hatü Israel ami show kü uopüthüi ching kü aw haongpü eepa, jom nyokei leiyei Ai am jütük.

²² Show uopü veshanthü-ao ching leipü jom mü hoknüng vamei heih; ngaümphei shelang kü Israel ami shümlangtü jom vepalei show kü shüteke. Israel ami hathü hükao aoei netuh, nevaijü yangdaipü hükao neshiü-i kemei jütükkem.

²³ Shejao Ai ongpayü yemmü yepei Joshua touei leijateke.

²⁴ Mechem Israel ami Ai am kemei kahjishongei changiteiyei jüpa, Israel am kemei Ai chingei aongei aopüthü peü jütük.

²⁵ Ai am ha nyih mahpü nyüha baha peü shepei haja anpünyi nyuteke.

²⁶ Mehenangkü Ai nanglakthü mangjükem thahshi Joshua-i phung notü Ai philei meeshi yaongpü lak nelei.

²⁷ Israel ami yemhimakthü hatü haleipü douhinangthü peü Joshua homei Shembüpai eshuohpükei laophü shing leihahteke.

²⁸ Joshua-i Ai ching haptüktü lavüngtoiyei yakphong, hatü shinnyih thahshi hapakei nyüke.

²⁹ Joshua-i Ai amei ongpa pü hük kü shentü om dhüshi sheüphong, hatü vanghe shüshingkü büpai ngeükhüam shuoh-ei hapa mahng yah-ei chingei shüpü penyüsha touei yakphong, hatü ha shangkü yaong longi thaiyei shüngphong hatü ha shinnyih thahshi nyüke.

Ebal Kahshangei Khümpü

³⁰ Hapheikü Joshua-i Ebal Kahshangei Shembüpa, Israel amei Kahvang kü moidü hük ling,

³¹ hatü hapayü Shembüpa chongphobü Mosa homei Israel am kü epükei nyiam hadir noshi chemao manglokpü yaong kübü lokei moidü ling, hatü jomi halei jakpü moila hatü mongjempü moila shuohteke.

³² Hammü Israel ami veishi Joshua-i Mosai nyangpü Mosa shahkung kübü yaong kü nyangteke.

³³ Israel ami benha hatü bühü, jomei mübüthü, lakchongbüthü, hatü shahphenbüthü kemei Shembüpalei Vangpüshuwpü Pela paipü Levi am ngongpathü philei meeshi dangpong kü yaongteke. Shembüpa chongphobü Mosai shelei Israel nanglakthü kü moihiman shuohhen hepak kü epükei, nanglakthü hükeishing Gerizim Kahshang kü dok meeshi hatü hükei shing Ebal Kahshang kü dok meeshi yaongteke.

³⁴ Hapheikü Shahkungnyü Laitap kü nyangei nyupü keiha moihiman hatü thaüvaüthü kemei Shahkung kübü Joshua-i ieteke.

³⁵ Israel am khong nyüha, hashih hatü jom mü lakeiloiyei nyupüthü thaipü touei Mosai epü shahjük hükao Joshua-i ne-ie-i netuhphong.