JOSHUA 5 - DAÜLANGPÜ LAIHING (BSI)

¹ Mechem Jordan heshüphi kü nyupü Amor ongthüi hatü Mediterranean Yungching yungkung kü nyupü Kanan ongthüi Israel am manghomkem thahshi Shembüpai Jordan yung ütükpü ha jung danei jom nyempai mong mahdai hatü jom hokhen mongnelong.

² Hahepak kü Shembüpai Joshua kü, “Yaonglang yah-ei longkhoih lingtuh hatü shao Israel am shuw japtuh” shei eteke.

³ Hanangkü Joshua-i yaonglang yah-ei longkhoih ling hatü büpai Gibeah-Haaraloth shei epü shingei Israel am shuw japteke.

⁴ Ijip kübü vamei daipü bahathü hatü veshanthü peü jahpanei longteishingkü lemei peü didaikem; hanangkü Joshua-i jom kü shuw japteke.

⁵ Ijip kübü vamei daipü bahathü peü shuw japtüklangmao Ijip leipü vamei daipheikü jahpanei longteishingkü lemei bühpü bahathü kü shuw nejapi nyuteke.

⁶ Shembüpai epü nebangpü nangkü Ijip leipü vamei daishingkü veshan vaihen yienmeishem peü mangdidaikem thahshi Israel am jahpanei vangbong pinyi hükshing longtei; mehenangkü Shembüpai jomei bühipa kü amma hatü nyahjiü mon yenpü kahdok shuohhen shei lahpü ha ne-eehüpih shei lahteke.

⁷ Hanangkü büpai jomei hühihathü jom nangjei longhü hatü Joshua-i hathü kü shuw japteke. Jom yendai lem kü shuw nejappü nangkü jom shaang thahshi nejapi nyuteke.

⁸ Mechem hapa denja pheihathü kü Joshua-i shuw jappa, hapa ma mangmei thahshi jom baümtapei nyu.

⁹ Shembüpai Joshua kü, “Shinnyih ngei am Ijiplei aa vaihampü mongmang yaktüknyeih. Hanangkü shinnyih mü leitü hapa shingkü Gilgal shei nyükhen” shei e.

¹⁰ Mechem Israel am Gilgalei Jeriko kahji kü baümtap vetü nyupa, hapa len nyih anpüalipabü om kü Hompü Mo moteke.

¹¹ Hapa Hompü Mo nyihphei jomi hapa Kanan kahdok kü vampü hahying ngouei hatü daw neshihpü aan shongpü shan vaishi hahteke.

¹² Jomi kahdok kü vampü hahying hahpü nyihphei manna vüpü dohdai; hajük kü Israel ami manna nedang, shejao hapa bong jomi Kanan kahdok kü vampü hahying hahteke.

Shembüpa lei Veshan Mübü

¹³ Mechem Joshua Jeriko yopailei nyupa, ngangahük kü büpai veishuohshingkü shennyak hük yanlu notü yaongshi ee. Joshua-i büpa touei heih-ei, “Nüngü hamphong khong kübü veshan hük hi vepa hük ang?” shei phe.

¹⁴ Hapa shennyaki, “Mepayao nevai, shejao ngeiyü Shembüpalei veshan mübü hük leshi peipeih” shei e. Hahepak kü Joshua-i dhüm huei büpalei dhe thaungei shatü, “Büpa chongphobü kü Shembüpai mehe shahjang ehüpa?” shei khümei phe.

¹⁵ Shembüpalei veshan mübüi jangei, “Nüngei la leipü lathuth huktüktuh; mehenangkü nüng yaongpü shingü daülangpü shing khih” shei e, hatü epükei Joshua-i lathuth huktük.