JOSHUA 24 - DAÜLANGPÜ LAIHING (BSI)

Joshua-i Nanglakthü kü Epü

¹ Hapheikü Joshua-i Israel am kemei Shekhemei thaihü; büpai Israel am behethü, mübüthü, shahphenbüthü hatü lakchongbüthü kemei nyük, hatü jom peü Kahvang touei pei.

² Joshua-i nanglakthü peü kü e, “Shembüpa, Israel amei Kahvangi enyüke: Hepak longi daiteke, ammei ambü ampa, Abraham hatü Nahor nyilei chepa Terah omshi Euphrates yungdangei lebü kahvangthü chongphoei nyuhampeih.

³ Shejao ngei ammei pa Abraham hapa kahdok yungdang leipü yahei Kanan kahdokei müei leiyei büpa kü hühihathü longi shuohpeih. Ngei büpa kü Isak;

⁴ hatü Isak kü Jakob hatü Esau shuohpeih. Ngei Esau kü phaüshang kahdok Seir shuohpeih, shejao Jakob hatü chehathü kemei Ijiplei yiüdaipeih.

⁵ Hapheikü ngei Mosa hatü Aaron nyi shompeih, hatü Ijip am kü ngei mehe dükshuohpa, ha chami jom hanghihüpeih; hapheikü ngei am müei daipeih.

⁶ Mechem ngei ammei bühipa Ijip leipü müei daipa, Ijip ami koyei khari hatü veshanthü Hakla Yungching thahshi ambü ampa kü changei shapeih.

⁷ Mechem jomi Shembüpa kü lenshuohpa, büpai am hatü Ijip am aa kü vangnyak longpü vamhüpeih, hatü yungi leamei leiyei jom lümlangpeih. Ngei Ijip am kü mehe dük, ha ammei müki eeteke. Hapheikü jahpanei am hepak luangi nyupeih.

⁸ Jordan heong philei nyupü Amon amei kahdokei ngei am müei leipeih. Jomi am mü hokteke shejao ammei lak kü ngei jom shuohpeih. Ngei am toueipü jom mahtükpeih, hatü ami jomei kahdok yahpeih.

⁹ Mechem Moab ongpa, Zipporlei cheha Balaki Israel am khüei hokhen tempa, büpai am kü thaüvaühen shingvaishi Beorlei cheha Balaam nyükhen shompeih.

¹⁰ Shejao ngei Balaami epü kü nebang; hatü büpai leiyei am kü moihimanpeih; hapakei ngei büpalei lak leipü am yangei tuhpeih.”

¹¹ Hapheikü am Jordan yung homei Jerikolei peipeih. Amor am, Perizz am, Kanan am, Hit am, Girgash am, Hiv am, hatü Jebus ami keiha Jeriko amiyao am mü hokpeih, shejao ngei ammei lak kü jom shuohpeih.

¹² Ngei am toueipü jom hatü Amor am ongpa nyi changtükhen shingvaishi ngei am she kü nyahngi shompeih; hapayü ammei yani nevaijü lahhilaongi nevaipih.

¹³ Ammi mechemao lem-ow netükpü kahdok hatü nyüei nelingpü chingnyüthü ngei am kü shuohpeih, hatü shaang amphong halei nyunyüke; ammi nesheipü kü haleipü nyalingngupai hatü olive betjük ammi hahnyüke.

¹⁴ “Hanangkü shaang Shembüpa kü dhüm shuohhen, hatü shüeinyiükei, hinglemei büpa chongphotuh; ambü ampai Euphrates yungdangei hatü Ijiplei chongphopü kahvangthü yaktüktuh hatü Shembüpa chongphotuh.

¹⁵ Shaang ammi Shembüpa chongnephohüjema, ambü ampai Euphrates yungdangei chongphopü kahvangthü hi nevaijü am shaang nyupü kahdok Amor amei kahvangthü chongphohenmepapa chongphohen shinnyih-üng amphongi jehahtuh, shejao ngei hatü hamei shemongi payü Shembüpaüng chongphohen” shei eteke.

¹⁶ Hahepak kü nanglakthüi jangei, “Shembüpa tuhphongtü hami lebü kahvangthü chongnephopih;

¹⁷ mehenangkü hamei bühipa Ijip kahdokei aa laphen kübü hamei müki eeshi yashanyale longi düktü müei leipeyü Shembüpa, hamei Kahvang hih. Ham daipü lemyang kemei kü, hatü hami peih-ei daipü nanglakthü kübü büpai ham yangpeih;

¹⁸ hatü Shembüpai ham toueipü jatthü kemei hatü hapa kahdok kü nyupü Amor amao omshi changtükpeih. Hanangkü hami Shembüpaüng chongphohen; büpayü hamei Kahvang hih” shei e.

¹⁹ Shejao Joshua-i nanglakthü kü, “Ammi Shembüpa chongphoei neaokpih. Büpayü daülangpü Kahvang; büpayü mükhühpü Kahvang. Büpai ammei mang netükphapih.

²⁰ Ammi Shembüpa yakphongtü lebü kung amei kahvangthü chongphojema, büpai shelei am kü meipü düklangmao am kü shanghah yahphahen hatü li mahtükhen” shei e.

²¹ Shejao nanglakthüi Joshua kü, “Nevaipih, hami Shembüpaüng chongphohen!” shei e.

²² Hahepak kü Joshua-i nanglakthü kü, “Amphongi SHEMBÜPAüng chongphohen shei jehahpeyü am nyingi am kü denpü shuohteke” shei e. Jomi, “Hih, hami denpü shuohnyeih” shei jangei e.

²³ Joshua-i, “Shejema shaangüng am toueipü kung amei kahvangthü yaktüktuh, hatü Shembüpa, Israel amei Kahvang kü ammei mongdang shuohtuh” shei e.

²⁴ Nanglakthüi Joshua kü, “Hami Shembüpa, hamei Kahvang-üng chongphohen, hatü büpalei ven banghen” shei e.

²⁵ Hanangkü ha nyih Joshua-i nanglakthü mü vangteishuwteipü ling, hatü Shekhemei büpai shahkungnyüthü lingei shuoh.

²⁶ Joshua-i hathü shah Kahvangei shahkungnyü laitap kü nyangteke, hatü büpai yaong longpü hük yah-ei Shembüpalei daülangpü shingei longkhampü phangei haong.

²⁷ Joshua-i nanglakthü peü kü, “Veituh, hapa yaongü jen kü denpü hük. Shembüpai jen kü epü shahthü kemei hapai danteke. Ammi Kahvang kü hingnelemjema hapayü jen kü denpü hük vaikahen” shei e.

²⁸ Hathü ekempheikü Joshua-i nanglakthü laophü laophülei kahdok yemei leishihtük.

Joshua hi Eleazar Nyi Didaipü

²⁹ Hapheikü Shembüpa chongphopü, Nunei cheha Joshua nyübüh vangbong kho hük mü an nyushi didai,

³⁰ hatü jomi büpa Gaash Kahshang apshaphi phaüshang kahdok Ephraimei laophülei mükjüp kahdok Timnah-Serahlei mahng vüphong.

³¹ Israel ami Joshua yemmü nyupü thahshi, hatü Joshua phei kü nyupü behethü üami Israel am shingvaishi Shembüpai dükpü douthü nyingei nyu, hathü nyupü thahshi Israel ami Shembüpa chongphoteke.

³² Israel ami Ijip leipü koei anpü Josephei vang Shekhemei cheha Hamorlei hapeüthü leipü Jakobi lop kho hük shuohtü shakpü kahdok Shekhemei dungphongteke. Hapayü Josephei hühihathülei mükjüp kahdok vaiteke.

³³ Aaronei cheha Eleazar-ao didai, hatü büpalei cheha Phinehas kü shuohpü phaüshang kahdok Ephraimei Gibeah jilalei jomphongi büpalei mang vüphong.