JOSHUA 2 - DAÜLANGPÜ LAIHING (BSI)

Joshua-i Jerikolei Gühshuk Shompü

¹ Hahepak kü Nunei cheha Joshua-i Shittim leipü shennyak nyi joei gühshuk shomteke. “Daituh, hatü kahmük doktuh, nyeinya vaishi Jeriko kü veituh” shei eteke. Hanangkü jiji daiyei büm yupü nyüha hük Rahab am shemei ngoi, hatü halei paümteke.

² “Veituh, sheya Israel am hanei gühshuknüng peiyei nyüke” shei Jeriko ongpai dan.

³ Hanangkü Jeriko ongpai Rahab touei shah shomei, “Nüngei shemei ngoipü shennyak nyiyü kahmük kemei gühshukhen peipü khih; hanangkü ha nyi chingshelei müei ngaikei” shei e.

⁴ Shejao hapa nyühai hapa shennyak nyi jotük. Pinnyüi, “Hih hapa shennyak nyi shemei peikütih shejao jiji meleipü peiküpüshang ngei nenyingangpih.

⁵ Vanghe shüdaiyaki penyüsha küphen hepak kü lüdaitih. Jiji melei daipa ngei nenyingang. Jiji phei changei daituh; amphongi phei thahhen aokpeih” shei eteke.

⁶ Shejao pinnyüi jiji shem adokei anei pinnyüi shüngei tuhpü hahtang phangei jotük.

⁷ Hanangkü ongpalei shennyak gühshuk peipü shennyak nyi phei changei Jordan lembaong thahshi sha, hatü hathü shadaihinüng penyüsha küplang.

⁸ Jijinyi shidai shekü pinnyüi shem adokei aongei,

⁹ henyi kü eteke: “Shembüpai hapa kahdokü am kü shuohtükteke shei ngei nyingteke, hatü hapa kahdok kü nyupüthüi am kü nyempai mong maandaiteke.

¹⁰ Am Ijip kübü vamei daishingkü mekei Shembüpai am shekü Hakla Yungching kübü yung ütükpa, hatü Jordan apshaphi kübü Amor am Sihon hatü Og ongpa nyi kü ammi mehe dükshuohpa, hatü mekei chemjalak kü mahtükpa, ha hami dantepih.

¹¹ Hami ha jung danhinüng am kü nyempai hamei mong mahdai; mehenangkü Shembüpa, ammei Kahvangü vangsho shangpa kü hatü kahdoknyü kü Kahvang khih.

¹² Hanangkü shaang, ngei anji kü bampü hupü keiha, hamei shemongsha kü phahji huphahen shei Shembüpalei men kü lahshih.

¹³ Anji-i ngelei opa hatü onyü, jeihinaü hatü nyahinaüthü hatü jomei shemongthü mahhen kübü ham yangphahen hih shei ngei kü nyangeihepü hük yahshih” shei eteke.

¹⁴ Hapa shennyak nyi-i pinnyü kü, “Henjilei yangnyu-ü am shingvaishi nyukahen; nüngi-üng jeni eteipü mih kü neluphei keyü mechem Shembüpai ham kü hapa kahdok yahphahenshang hami nüng kü phahjiei hatü shahhingi dükhen” shei eteke.

¹⁵ Hanangkü Rahabi jiji vü kü shitei ümha shadenei shanshih; mehenangkü pinnyülei shemü penyü kü aüshi veyei nyuteke.

¹⁶ “Anji yempü ami anji dangmangkü phaüshang lemei aongdaituh, hatü jomphong nyokei mangleidai thahshi halei nyih jem joshi nyutuh; hapheikü mon anji leituh” shei pinnyüi jiji kü eteke.

¹⁷ Hapa shennyak nyi-i pinnyü kü, “Henjinyi-i nüng touei lahhüpü keiha hapa lahtükpü jiüshi nohen,

¹⁸ Mechem hami hapa kahdok yahhenshang, nüngei nyühipa, nüngei jeihinaü hatü nyahinaüthü nüngei shemei nyükei thailangtuh, hatü henji shitei shanshihpü hapa vü hakla ümha shaden kü shentuh.

¹⁹ Am hük dangkao shemong leipü chingshelei vamjema, büpa mahpeyü büpa-üng pungpü vaihen, hatü hayü ham pungpü nevaikahen; shejao shemongei nüng mü nyupü hük kü dangkao lak shihjema, hapa mang hami kohen.

²⁰ Shejao jen mehe eteitepa ha nüngi mih kü lutükjema nüngi henji kü lahhüpeyü nedükphahen” shei eteke.

²¹ “Anji-i epükei-üng dükhen shei etü pinnyüi jiji leitük, hatü hapheikü pinnyüi ümha shaden kü hapa vü hakla-i shenteke.”

²² Jomphong hapakei eteitü yanei jijinyi kü changpüthü nyokei mangleidai thahshi phaüshang lemei aongei nyih jem joshi nyuteke. Jomphongi lem peü kü jiji yemteke shejao nedang.

²³ Hapheikü hapa shennyak nyi phaüshang lemeipü yungdang homei leiyei Nunei cheha Joshua ngoi, hatü jiji-i mehe mehe ponghahpa, lemphüli ejateke.

²⁴ Jijinyi-i Joshua kü, “Hingmei Shembüpai jenei lak kü hapa kahdok shuoh-ei nyüke hatü halei nyupü shennyakthü-ü jen kü nyempai mong mahdaitü nyüke” shei ejateke.