JOSHUA 17 - DAÜLANGPÜ LAIHING (BSI)

Manasseh Jat kü Hanpü Kahdok

¹ Hapheikü Manasseh jat kü kahdok hanteke; mehenangkü büpayü Josephei hashongpa nyuteke. Manassehlei hashongpa Makir, Gileadei chepa kü Jordan kü heongphi Gilead hatü Bashan hanteke; mehenangkü büpayü hampa meipü nyuteke,

² hatü aopü Manasseh jat kü Abiezer, Helek, Asriel, Shekhem, Hepher hatü Shemida phangthü kü kahdok hanteke. Hathüyü Josephei cheha Manasseh kü phaakpü baha hapeüthü hanpü khih.

³ Shaang Manassehlei cheha Makir, Makirlei cheha Gilead, Gileadei cheha Hepher, Hepherlei cheha Zelophehadei baha hapeüthü nenyu, shejao yiükhathü mon nyu, hatü hathüyü büpalei yiükhathülei men khih: Mahlah, Noah, Hoglah, Milkah hatü Tirzah.

⁴ Jomi ngongpa Eleazar hatü Nunei cheha Joshua hatü mübüthü touei peiyei, “Hamei jeihinaüthü mü chemi ham kao mükjüp shuohhen Shembüpai Mosa kü epeih” shei eteke. Hanangkü Joshua-i jomphong kü Shembüpai epükei chepa mü jempü jeihinaüthü mü mükjüp hanshuohteke.

⁵ Jordan apshaphi Gilead hatü Bashan nyi mü Manasseh jati kahdok phaihan an dangteke;

⁶ Mehenangkü Manassehlei yiükhathüi bahathü kei mükjüp dangteke. Gilead kahdokü aodaipü Manasseh phangthü kü shuohteke.

⁷ Manassehlei kahdokü Asher kübü Shekhem heongphi Mikhmethath ngoishi nyu; hapheikü hatoueipü viong pehephi kübü shadaipü En-Tappuah shennyakthü nyushing omei nyuteke.

⁸ Tappuah kahdokü Manassehlei omei nyu, shejao Manasseh viong kü nyupü Tappuah jilayü Ephraim amei nyuteke.

⁹ Hapheikü viongü Kanah yungyen thahshi yiüei nyu. Yungyen pehephi kü nyupü jilathüyü Manassehlei kahdokei nyulangmao Ephraim amei jilathü nyuteke. Hapheikü Manasseh ammei viongü yungyen apshaphi aimü phungei heih-ei Mediterranean yungching kü leanshi nyuteke.

¹⁰ Pehephi kahdokü Ephraim amei hatü apshaphiyü Manasseh amei; heshüphilep kü yungchingü jomei viong; apshaphi kü Asher am thahshi, hatü heongphi kü Issakhar am ngoishi nyuteke.

¹¹ Issakhar hi Asher amei kahdok kon mongei Manasseh amei Beth-Shean, Ibleam hatü Dor nanglakthü, Endor, Taanakh hatü Megiddo hatü jom kü ngeihpü shonpü jilathü nyuteke (jempabüyü Naphath nyüke).

¹² Shejao Manasseh ami hathü jilathü kü nyupü nanglakthü nechangtükaok, hanangkü Kanan ami nedoh-i hapa kahdok kü nyuei dai.

¹³ Shejao mechem Israel am wong koh-ei leipa, jomi Kanan am kemei nechangtüki jom shingvaishi ngaüngei dou dükhü.

¹⁴ Josephei hühihathüi Joshua kü, “Mehekei nüngi ham kü kahdok mükjüp phaihan hük mon yahphopa? Hamü shennyak longi ahshi nyüke; mehenangkü Shembüpai ham kü hapakei moihimanteke” shei e.

¹⁵ Joshua-i jangei, “Am shennyak longi ahdaijema hatü Ephraim phaüshang kahmük am kü longi maandaijema, Perizz hatü Rephaim phaü ami aongei daühahtuh” shei e.

¹⁶ Josephei hühihathüi jangei e, “Phaüshang kahmükü ham shingvaishi nechangang; mehenangkü Kanan am üamphong Beth-Shean hatü hapalei chingthü, hatü Jezreel kahji kü nyunya, jom peülei nyiam koyei khari nyüke”.

¹⁷ Shejao Joshua-i Joseph phang Ephraim hatü Manasseh kü, “Amü shennyak longi ahshi hatü wong kohshi nyüke. Amü kahdok phaihan hük mon danghen nevai,

¹⁸ shejao phaüshang kahdokao ammei vaihen, hapayü phaü mon vailangmao ammi phaü daüeitüktü viong dohpü thahshi yahtuh; mehenangkü nyiami lingpü koyei khari nyulangmao hatü jom wong kohlangmao ami Kanan am changtükaokhen” shei eteke.