JONAH 4 - DAÜLANGPÜ LAIHING (BSI)

Kahvangi Bampü kü Jonah Mongshihpü

¹ Shejao Jonah longi mongneong hatü mongshih.

² Büpai Shembüpa kü, “Oh Shembüpa, ngei shem leipü layaonghinüng hapakei dükküshasha hih shei ngei epü ha nevaiang je? Hanangkü ngei shüshülangi Tarshish lemei lüdaipeih. Nüngü phahjipü hatü yahyang shinshangpü Kahvang, mongshihhen youngmü, hatü bampü kü bhashahshi, shangpong yakying shomhen kübüao mang tükpü Kahvang shei ngei nying.

³ Shaang, Oh Shembüpa, ngelei yangnyu yahlangtuh; mehenangkü ngei shingvaishi yemmü nyulei meyü didaipü-üng meipüba khih” shei phop.

⁴ Shejao Shembüpai, “Nüng mongshihhen mehe jiüpü nyüpa?” shei e.

⁵ Jonah vamei daiyei chingnyü heongphi shing hükei uoteke. Halei büpa tapshaü chantü hapa vangdhüm kü uoshi chingnyü mehe ponghahkahen shei veishi danei nyu.

⁶ Hahepak kü Shembüpa Kahvangi ümvü hük kohhü hatü Jonahlei shangjing kü vangdhüm shuoh-ei nyiumeihühen shingvaishi banei anshih, hatü hapa ümvü eeyei Jonah longi mongmei.

⁷ Shejao nyihphei dhomnaü hepak kü Kahvangi laong hük vamhüei ümvü haümtükpü nangkü kaudai.

⁸ Mechem vanghe aongpa, Kahvangi shaamlukpü heong vanglük shom hatü Jonahlei shangjing kü vanghenyüi ketpü nangkü büpa shomeiyingei sha. Hanangkü büpa didaihüei deih, hatü eteke, “Yemmü nyulei meyü didaipü-üng meipü khih.”

⁹ Shejao Kahvangi Jonah kü, “Ümvü nangkü nüng mongshihhen jiüpü je?” shei e. “Hejema, ngei dihen mü mongshih-ei hih” shei büpai e.

¹⁰ Shejao Shembüpai, “Nüngi neshei hatü nelonghülangmao hapa ümvü nangkü nüngi longi phahjiei deihnyüke. Hapa ya cha kü koh-ei longteke, yaphei-üng didaiteke.

¹¹ Shejema, hajükjük longpü Nineveh chingnyü, nyonghidah nenyingpü hashihthü 120, 000 hatü yemhimakthü hajükjük nyupü kü ngei nephahjihen je?” shei eteke.