JONAH 1 - DAÜLANGPÜ LAIHING (BSI)

Jonah-i Kahvangei Ven Nedanpü

¹ Shembüpalei shah Ammittailei cheha Jonah touei pei, hatü e:

² “Hapa chingnyü longpü Ninevehlei daituh hatü halei chongveneishuoh; mehenangkü jomei mang ngei thah-ei aongteke.”

³ Shejao Jonah-i Shembüpa toueipü lükei Tarshish lemei dai. Büpa Joppalei yiüjashingkü Tarshish lemei daihen jahas hük heüteke. Büpai fara shuohtü jahas mongei shü hatü Shembüpa toueipü lükei Tarshish lemei dai.

⁴ Hahepak kü Shembüpai yungching yinglükleisho longpü hük shom, hatü hapa vanglük mangpai jahas mangtükhen mü vongshüh kü nyuteke.

⁵ Jahas mübüthü peü longi nyem, hatü shennyak ieyei laophü laophülei kahvang kü ham yangtuh shei len. Jomi jahas shanghen shingvaishi hanggo lak-ai shüktükkem. Hahepak kü Jonah jahas shaongei yiüei mükhet meishi shiyei nyu.

⁶ Jahas mübü longpübai büpa kü, “Nüng mepakei hajük shinya? Paotuh hatü nüngei Kahvang kü yangshih shei phoptuh. Üpai nyingpa, büpai jen kü phahjiei deihtü jen yangphahen aokpeih” shei e.

⁷ Hahepak kü jahas mübüthüi hüki hük mü hapakei etei, “Kei, üpalei mangi jen hapa vongshüh ponghünya nyinghen shingvaishi phongyomshah.” Jomi phongyom, hatü hapa phong Jonah kü hetteke.

⁸ Hanangkü jomphongi büpa kü, “Üpalei mang homei hamphong hajük ponghahnyeih shei deihnya, eshih? Nüng mehe dou düknya? Nüng meleipü peiküpa? Nüng mepa kahmük leipü peipa? Nüng üam jatliang?” shei phe.

⁹ Jonah-i, “Ngeiyü Hebrew am hih” shei jangei e. “Ngei Shembüpa, vangsho Kahvang, üpai yungching hatü kahdoknyü ling, büpa kü khümnyüpeih” shei jangei e.

¹⁰ Jonah-i shelei ejapü nangkü shennyakthü peüi büpayü Shembüpa toueipü lükei daiküpü khih shei nying. Jahas mübüi nyemdaitü büpa kü, “Nüngi mehe dükshuohpa?” shei phe. Mehenangkü büpa Shembüpa toueipü lüdaipeih shei ejapü nangkü shennyakthü peüi nyingei nyu.

¹¹ Yungching yinglükleisho mangpüba, mangpüba pei. Hanangkü jomi büpa kü, “Yungching yinglükleisho nenhen shingvaishi hami nüng kü mehe dükhenang?” shei phe.

¹² “Ngei yah-ei yungchingei shüktüktuh, shejüang ha nenkahen. Ngei pungpü nangkü hapa yungching yinglükleisho kü amphong ponghahnyu khih” shei Jonah-i jangei e.

¹³ Halangmao jahas mübüi yungkung philei jahas leihen khe, shejao jomi neaok; mehenangkü yungching yinglükleisho sheleipü mü mangpüba peiteke.

¹⁴ Hahepak kü jomphongi Shembüpa kü, “Oh Shembüpa, hapa shennyakei yangnyu mahtükpü nangkü chingmeilemlingei ham temahtük; hapa iy yenpü kü ham pungpü teleihü; Oh Shembüpa, hayü nüngi mongpükei düknyüpeih” shei e.

¹⁵ Hahepak kü jomi Jonah paümei yungchingei shüktük; hatü yungching yinglükleisho nendai.

¹⁶ Hathü shennyakthüi nyeinya Shembüpa kü nyem, hatü jomi Shembüpa kü jakpü moila shuoh, hatü vangeishuwteke.

¹⁷ Shejao Shembüpai Jonah lühhen nyah longpü hük temei nyu, hatü hapa nyah-i büpa lüh. Jonah nyah mongei nyih jem hatü ya jem nyu.