JOHAN 7 - DAÜLANGPÜ LAIHING (BSI)

Jisulei Chenaüthüi Hingnelempü

¹ Hapheikü Jisu Galilei kamtei. Büpai Judea philei neheihhü; mehenangkü Jehoda ami büpa jühen lem yemei nyuteke.

² Shaang Jehoda amei Ashakshem Mo ngoihen yopailei nyu.

³ Hanangkü chenaüthüi büpa kü, “Nüng hatoueipü Judealei heihtuh, shejüang nüngi dükpü douthü nüngei nanglomthüi nyem-ee;

⁴ mehenangkü shakei vamei mih peüi nyemnying shei deihpü üpa shennyakiyao joshi nedüknyih. Nüngi hathü dou dükjema, kahdoknyü kü nyinghütuh” shei e.

⁵ Chenaüthüiyao büpa kü hingnelem.

⁶ Jisui jomphong kü, “Ngelei hepak shao-üng mangngoi, shejao am shingvaishi hepak peü jiünyüke.

⁷ Kahdoknyüi amphong kü nejiühithen, shejao ngei kü jiühitnyüke; mehenangkü ngei ha khüei hapalei douthüyü mang shei denpü shuohnyeih.

⁸ Am nying mo kü daituh. Ngei ha mo kü nedaipih; mehenangkü ngelei hepak shao-üng lomei mangpei” shei e.

⁹ Büpai ha etü Galilei nyu.

Jisu Ashakshem Mo kü Peipü

¹⁰ Shejao chenaüthü molei lüdaipheikü büpaao ngaiheyei nevai, joei dai.

¹¹ Jehoda ami molei, “Büpa melei daipa yo?” shei büpa yemei nyu.

¹² Büpa nangkü khong longi langmaanteiyei nyu. Hanei ami, “Büpayü shennyak mei hih” shei e, haneiyü, “Nevaipih, büpayü mih luhahnyüke” shei e.

¹³ Shejao Jehoda am kü nyempü nangkü üpaiyao ngaiheyei nelangmaan.

¹⁴ Mo jiam kü Jisu phopshemei peiyei nyuhhen pang.

¹⁵ Jehoda ami thamaei, “Meleiyao nyuhhahpü neshiüpü kü hapa shennyaki mekei etü hajükjük nyingaoknya yo?” shei e.

¹⁶ Hahepak kü Jisui jomphong kü, “Ngei nyuhpü venpeyü ngelei nevai, shejao üpai ngei shom, büpalei hih.

¹⁷ Üpai Kahvangi mongpü dükhen shei mongei nyu, büpai hapayü Kahvang leipü hi ngei nyingkü deihtü ehahnya nyinghen hih.

¹⁸ Üami laophülei nang mon ehahnya, hathüi laophü nyingkü müknyinshekhang yemnyüke; shejao üpai büpa shom, büpalei müknyinshekhang yempeyü shahhing, hatü büpa kü shahshem neshiü” shei e.

¹⁹ “Mosai am kü shahkung neshuoh-angpü je? Shejao amphong üpaiyao shahkung nedüknyu. Mehekei ammi ngei jühen lem yemnya?” shei e.

²⁰ Khongi büpa kü, “Nüng kü kahshih nyüke! Üpai nüng jühen yemnyüke?” shei e.

²¹ Jisui jomphong kü, “Ngei yashanpü dou hük dükjü am peüi thamanyüke.

²² Mosai ammei hapeüthü kü shuw japhen shuoh, (jiüpü lemi hapayü Mosa kübü nevai; ambü ampa leipü peipeih), hatü ammi Sabbath nyih hapeüthü kü shuw japnyüke.

²³ Ammi Mosa shahkung nemanghen tata kü Sabbath nyih shuw japjema, shejema ngei Sabbath nyih shennyak hükei büm kemei meihüjü ammi ngei kü mongshihnyu je?

²⁴ Ammi shakdokei eepü kü shah tephen, shejao jiüpü shahphen shuohtuh” shei e.

Büpayü Messiah Je?

²⁵ Shaang Jerusalem nanglakthü hanei-i, “Jomi jününg yempü shennyakü ha nevaipü je?

²⁶ Büpayü hatouei ngaiheyei shah enyüke, shejao jomi büpa kü meheyao ne-eshuohnyu! Hapayü Messiah hih shei mübüthüiyao nyingpü hiang yo?

²⁷ Shejao hapa shennyak meleipü peipa, jeni nyingei nyüke; shejao mechem Messiah peihenshang, üpaiyao büpa meleipü peipa nenyingaokhen” shei e.

²⁸ Hahepak kü Jisui phopshemei nyuh-ei nyushingkü büpai wongmü lenei, “Ammi ngei nying, hatü ngei meleipü ammi nyingnyüke. Ngei ngei nyingi mongpü kü neyiü; shejao üpai ngei shom, büpayü hingshangpü, hatü ammi büpa nenying.

²⁹ Ngei büpa nying; mehenangkü ngeiyü büpa leipü, hatü büpai ngei shompeih” shei e.

³⁰ Hahepak kü jomi büpa yepnüng khe, shejao üpaiyao büpa kü laki neshoungaok; mehenangkü büpalei hepak shao-üng mangngoi-i nyuteke.

³¹ Shejao khong kü longshi shingi büpa kü hinglem hatü jomi, “Mechem Messiah peihenshang, hapa shennyaki dükpü mao nyeishi nyangeihepü dou dükkahen” shei etei.

Jisu Yepnüng Shompü

³² Khongi büpa nang hapakei eteipü Pharisee ami danei, ngongpathü hatü Pharisee ami büpa yephen phopshem leipü veshanthü shom.

³³ Jisui hahepak kü, “Ngei amphong mü hepak kanja mon nyutü üpai ngei shom, büpa touei ngei lüdaihen.

³⁴ Ammi ngei yemhen, shejao nedanghen, hatü ngei melei nyu, halei am nepeiaokhen” shei e.

³⁵ Jehoda am hüki hük mü, “Jeni büpa nedanghen mü hapa shennyakü melei daihen deihnya yo? Büpayü jenei shennyakthü Greek am mü yanei haishi nyupü am touei daiyei nyuhen deihnyu hiang yo?

³⁶ ‘Ammi ngei yemhen, shejao ngei nedanghen, hatü ngei melei nyu, halei am nepeiaokhen’ sheiyü mehe lappü enya yo?” shei etei.

Yangnyuyem Yungyen

³⁷ Mo dohpü hatü longpü nyih, Jisui yaongtü wong mü lenei, “Üam yung lenya, ngei touei peikei, hatü yingtuh,

³⁸ hatü üami ngei kü hinglem, laihingi eyei nyupükei, yangnyuyem yung büpalei mongdang kübü yenhen” shei e.

³⁹ Shaang büpai hayü büpa kü hinglempüthüi yahhen Laangha jung eteke; mehenangkü Jisu müknyinshekhang kü mangaongdai-i nyupü nangkü Laangha shao-üng mangshuoh-i nyuteke.

Shennyakthü Shahju Nejiüteipü

⁴⁰ Mechem jomi hathü shah danpa, khongkü hanei-i, “Hingmei hapa shennyakü thibü khih” shei e.

⁴¹ Lebüthüi, “Büpayü Messiah khih” shei e. Shejao hanei ami, “Mekei etü Messiahyü Galil leipü peihenang?” shei e.

⁴² Laihingi Messiahyü David am phang kübü, hatü David nyupü Bethlehem kübü vamhen shei eyei nenyupü je?

⁴³ Hanangkü büpa nangkü khong shahju nejiütei-i vam.

⁴⁴ Jom haneiyü büpa yephüei deih, shejao üpaiyao büpa kü laki neshoungaok.

Hingnelempü Jehoda am Mübüthü

⁴⁵ Mechem ngongpathü hatü Pharisee am touei phopshem yompüthü leijapa, hathüi jomphong kü, “Ammi mehekei büpa yepei neleiküpa?” shei phe.

⁴⁶ Phopshem yompüthüi, “Üpaiyao hapa shennyaki epükei epü mangdanpih” shei e.

⁴⁷ “Amphongao büpai luhahpü je?” shei Phariseethüi jomphong kü phe.

⁴⁸ “Mübü hanei nevaijü Pharisee am hanei dangkao büpa kü hinglemei nyüpü je?

⁴⁹ Hapa khongnyüi Mosa Shahkung meheyao nenyingpü nangkü jomphongü thaüvaü phangkü nyüke.”

⁵⁰ Jomphong khongkü shennyak hük, Nikodemas, üpa Jisu mü pongteinüng dai, büpai hathü kü,

⁵¹ “Shennyak hük büpai mehe dükpa hapa shong mangdani jenei shahkungi hanei am nenyonghünyih” shei e.

⁵² Jomi büpa kü, “Hingmei, nüngao Galil leipü je? Laihing yemtuh, hatü nüngi Galil leipü thibü nevamnyih shei nyangei eehen” shei eteke.

⁵³ Hapheikü jom laophü laophülei shemei leidai.