JOHAN 6 - DAÜLANGPÜ LAIHING (BSI)

Haja Nga Ühyingpü

¹ Hapheikü Jisui Galil Yungching hükphi lemei heih (hapa kü Tiberius Yungching sheiyao nyüknyüke).

² Büpai tüngpüthü kü dükpü nyangeihepüthü eeyei khongnyü longpü büpa phei müshi nyuteke.

³ Jisui kahshangei aongei büpalei nanglomthü mü uo.

⁴ Shaang Jehoda amei Hompü Mo ngoihen yopailei nyu.

⁵ Mechem Jisui yaakei veipa büpai khongnyü longpü hük büpa lemei peijaei eeyei Jisui Philip kü, “Hathü nanglakthüi hahhen hahying jeni meleipü shakhenang” shei phe.

⁶ Büpai hapayü büpa kü dokei eteke; mehenangkü büpa laophü nyingi mehe dükhen ha nyingtüktü nyu.

⁷ Philipi büpa kü, “Jom peü maanbaongi hahhen dangkao len vokei nanglati hahying shakjao nechangükhih” shei e.

⁸ Büpalei nanglomthü khongkü hük Andrew, Simon Peterlei chenaüi büpa kü,

⁹ “Hatouei hashih hükei barley aan pha nga hatü nyah nyi nyüke. Shejao hapai hajükpü khongkü mehe vainüng” shei e.

¹⁰ Jisui, “Nanglakthü peü uohütuh” shei e. Shaang hatouei thüngkon longpü nyu; hanangkü peüshep shennyak haja nga hükshing hatouei uoteke.

¹¹ Hapheikü Jisui ha aan yah-ei menvih shuohtü hatouei uopüthü kü bheteke; büpai nyah yah-ei hapakei jomi hahhüpüshük shuoh.

¹² Mechem jom moh-ei hahpa, büpai nanglomthü kü, “Nedamnehuhen shingvaishi phuohinuo aopü thaituh” shei e.

¹³ Hanangkü jomi barley aan pha nga hahpüthüi aopü phuohinuo thaishingkü mühdow anpünyi nyuteke.

¹⁴ Mechem nanglakthüi büpai dükpü nyangeihepü eepa, jomi, “Hapayü kahdoknyülei yiükahen nyupü thibü khih” shei eteihen chongpang.

¹⁵ Jom peiyei vangmü lükei büpa ong vaihühen deihshi nyüke shei mechem Jisui nyingpa, büpa monha shao kahshangei aongdai.

Jisu Yung Shangkü Kampü

¹⁶ Mechem om dhüpa, büpalei nanglomthü yungei heih-ei,

¹⁷ ai mongei shü, hatü Kapernaumei heihhen yung homei dai. Sheyü nyakdai, hatü Jisu jomphong touei mangpei-i nyu.

¹⁸ Vanglük mangshi lükpü nangkü yung longi nemei-i jen.

¹⁹ Jom mile jem nevaijü ali hükshing yaatei heih-ei nyushi Jisu yung shangkü kamei ai yopailei peijapü eeyei jomphong longi nyem.

²⁰ Shejao büpai jomphong kü, “Hayü ngei hih; tenyem” shei e.

²¹ Jomi büpa ai mongei shühahhüei deih, hatü jom ngoihen heihpü yungphaangei jom lomi ngoidai.

Shennyakthüi Jisu Yempü

²² Nyihphei yungdang phihük lemei nyupü shennyakthüi halei ai hük mon nyupü ee. Büpalei nanglomthü mü Jisu ai mongei neshüpü jomphongiyao eeteke, shejao büpalei nanglomthü mon daiteke.

²³ Hapheikü Shembüpai moihimantü jomi aan hahpü shing yopailei Tiberius leipü ai hanei peiteke.

²⁴ Shejao mechem shennyakthüi halei Jisu nevaijü nanglomthü üpayao ne-eepa, jomi ai kü uotü Kapernaum lemei Jisu yemei dai.

Jisu-ü Yangnyu Hahying

²⁵ Mechem jomi yungdangei Jisu heüpa, jomi büpa kü, “Nyuhbü, nüng hatouei mechem heihpa?” shei phe.

²⁶ Jisui jomphong kü, “Hingmei mü ngei am kü enyeih, ammi nyangeihepü eepü nangkü ngei yemnyu nevai, shejao moh-ei hahhen dangpü nangkü ngei yemnyu khih.

²⁷ Shedailaidaihen hahying teyem, shejao vanyangyem nyuhen hahying yemtuh; hayü Shennyak Ha-i am kü shuohhen. Mehenangkü hapayü Pa Kahvangi büpa kü füoshang shingei nyüke” shei e.

²⁸ Hahepak kü jomi büpa kü, “Kahvangi napü douthü dükhenü hami mehe dükhen?” shei phe.

²⁹ Jisui jomphong kü, “Büpai shompü üpa nyüpa, büpa kü hinglemtuh; hapayü Kahvangei dou hih” shei e.

³⁰ Hanangkü jomi büpa kü, “Shejema hami veitü nüng kü hinglemhen shingvaishi nüngi hamphong kü mehe nyangeihepü yahphahenang? Nüngi menüng dou düknya?

³¹ Hamei bühipai jahpanei manna betjük hahteke; ‘Büpai vangsho leipü hahying hahhen shuoh’ shei nyangei nyüke” shei eteke.

³² Hahepak kü Jisui jomphong kü, “Hingmei ngei am kü enyeih, am kü vangsho leipü hahying shuohpeyü Mosa nevai shejao hingshangpü hahying shuohpeyü ngelei Opa hih.

³³ Mehenangkü Kahvangei hahyingü vangsho leipü peinyüpeih, hatü kahdoknyü kü yangnyuyem shuohnyeih” shei e.

³⁴ Jomi büpa kü, “Longpüba, düngei hamphong kü ha hahying yahshih” shei e.

³⁵ Jisui jomphong kü e, “Ngeiyü yangnyuyem hahying. Üami ngei touei pei, mechemao ne-aeipih, hatü üami ngei kü hinglemnya mechemao yung nelepih.

³⁶ Shejao ammi ngei eetü ngei kü hingnelempü nangkü ngei am kü ha epeih.

³⁷ Pa-i ngei kü shuohpüthü peü ngei touei peikahen, hatü üpa ngei touei peinya, ngei mechemao nechangtükhen;

³⁸ mehenangkü ngei vangsho leipü ngei mongpü düknüng yiüpü nevai, shejao üpai ngei shom, büpai mongpü düknüng yiüpeih.

³⁹ Büpai ngei kü shuohpü peü meheyao nemahtükhen, hatü dohpü nyih kü yangei leihen hapayü üpai ngei shom, büpai mongpü ha hih.

⁴⁰ Üami Ha ee, hatü büpa kü hinglemnya, vanyangyem danghen, hatü dohpü nyih kü ngei yangei leishihhen hapayü ngelei Opai-i mongpü nyüke.”

⁴¹ Hahepak kü, “Ngeiyü vangsho leipü yiüpü hahying” shei epü nangkü Jehoda ami büpa khüei eela.

⁴² Jomi, “Hapayü Josephei cheha Jisu nevaipü je? Chenyü chepa jeni nyingei nenyupü je? Mekei etü büpai, ‘Ngeiyü vangsho leipü yiüpeih’ shei eaoknya?” shei eteiteke.

⁴³ Jisui jomphong kü, “Am nyingi langmaanpü dohtuh.

⁴⁴ Ngei shompü Opa-i müei nedeipheikü üpayao ngei touei peinüng neaok; hatü ngei dohpü nyih ngei hapa shennyak yangei leishihhen.

⁴⁵ Thibüthüi ha nyangei nyüke: ‘Jom peü kü Kahvangi nyuhnyeih. Üpai Pa kü bangnya, hatü büpa leipü nyinghahnya, ngei touei peinyeih.

⁴⁶ Kahvang leipü hük mü lenei üpaiyao Pa ne-ee; büpai mon Pa eeteke.

⁴⁷ Hingmei ngei am kü enyeih, üami hinglemnya, vanyangyem nyüpeih.

⁴⁸ Ngeiyü yangnyu hahying.

⁴⁹ Ammei bühipathüi jahpanei manna betjük hah hatü didai.

⁵⁰ Shennyak hüki hahtü nedihen vangsho leipü yiüpü hahyingü hatouei nyüke.

⁵¹ Ngeiyü vangsho leipü yiüpü yangnyu hahying. Üami hapa hahying hahhen, den kü yemmü nyuhen, hatü kahdoknyü kü ngei shuohpü yangnyu hahyingü ngelei phai’ ” shei eteke.

⁵² Hahepak kü Jehoda ami jom jom, “Hapa shennyaki mekei etü büpalei phai jen kü hahhen shuohhenang?” shei etei.

⁵³ Hanangkü Jisui jom kü, “Hingmei ngei am kü enyeih, ammi Shennyak Halei phai nehahpheikü hatü büpalei iy neyingpheikü am kü yangnyuyem nenyu.

⁵⁴ Üami ngelei phai hah hatü ngelei iy ying, hathü kü yangnyuyem nyüke, hatü dohpü nyih kü ngei jom yangei leishihhen;

⁵⁵ mehenangkü ngelei phaiyü hingshangpü hahying, hatü ngelei iy-ü hingshangpü yung.

⁵⁶ Üami ngelei phai hah hatü ngelei iy ying, ngei kü nyunyüke, hatü ngei jom kü nyunyeih.

⁵⁷ Vanyangyem Opa-i ngei shompü keiha, hatü ngei büpa homei nyupü keiha, üami ngei hahhen, ngei homei mon nyuhen.

⁵⁸ Vangsho leipü yiüpü hahyingü ambü ampai hahtü dipü keipü hahying nevai. Shejao üpai hapa hahying hahhen den den kü yemmü nyuhen” shei eteke.

⁵⁹ Büpai hathüyü Kapernaumei Sinagoglei nyuhpü hepak kü eteke.

Vanyangyem Shahthü

⁶⁰ Mechem büpalei nanglomthüi ha danpa, jomi, “Hapa nyuhpü venpeyü wongshi khih; üpai ha yah-aoknüng?” shei etei.

⁶¹ Shejao Jisui büpalei nanglomthüi ha nangkü langmaanpü danei büpai jomphong kü e, “Hapai amphong huluh vaihünyu je?

⁶² Shejema Shennyak Ha büpa shongei nyupü shingei aongdai-i eejü mekei ehen?

⁶³ Yangnyuyem shuohpeyü laangha hih; phaiyü yahlak neshiü, hatü ngei am kü epü shahthüyü laangha hatü yangnyuyem nyüke.

⁶⁴ Shejao amphong khongkü hingnelempü hanei nyüke.” Mehenangkü Jisui shongei mebü-üng üpa hingnelem, hatü üpai büpa luhahhen nyingei nyuteke.

⁶⁵ Büpai nedoh-i, “Ha tata kü ngei shelei mebü amphong kü Opa-i neshuohpheikü üpaiyao ngei touei nepeiaokpih shei ngei etepih” shei e.

⁶⁶ Ha tata kü büpalei nanglomthü longshishing nyokei leidai, hatü hajük kü büpa phei nemü.

⁶⁷ Hanangkü Jisui Anpünyi kü, “Amphongao nyokei leidaihüangke je?” shei e.

⁶⁸ Simon Peteri, “Shembüpa, ham üpa touei daijanüng? Nüng kü vanyangyem shahthü nyüke.

⁶⁹ Nüngü Kahvang kübü Daülangpü Hük shei hinglemei peinyüke hatü nyingnyüke” shei e.

⁷⁰ Jisui jomphong kü, “Ngei am Anpünyi neje-angpü je? Shejao amphong khongkü hükü kahshih nyüke!” shei e.

⁷¹ Büpai hapayü Simon Iskariotei cheha Judas nang eteke; mehenangkü büpai Anpünyi khongkü hük vaijao büpa luhahhen nyuteke.