JOHAN 5 - DAÜLANGPÜ LAIHING (BSI)

Jisui Sabbath Nyih Meihüpü

¹ Hapheikü Jehoda amei mo hük nyu, hatü Jisu Jerusalemei aong.

² Shaang Jerusalemei Mi Shaden touei bangtap nga kohpü shemyung hük Hebrew shah mü Bethesda shei mentü nyu.

³ Halei tüngpüthü– mükphüngdaipü, la khodaipü, bümphi diyei tüngpüthü bangtapei lemshi yung jenpü danei nyu.

⁴ Mehenangkü hepak hepak kü vangsho phongshan yiüei hapa yung jenhamteke. Yung jenshan ieyei üpai shong halei laongei hünghenshang, mehe din vaijao meidaihamteke.

⁵ Halei shennyak hük bong hapüanpüshet thahshi tüngpü nyu.

⁶ Mechem Jisui büpa halei lemshi eepa, hatü büpa halei bong luangi nyuphei khih shei nyingei büpai büpa kü, “Nüng meihünyüla?” shei phe.

⁷ Tüngpü shennyaki büpa kü, “Longpüba, yung jenshingkü ngei yungei deihen shennyak üpayao neshiü. Mechem ngei heihnüng shei nyuhen, hanei ami ngei shekü heihdaitü mon nyunyüke” shei e.

⁸ Jisui büpa kü, “Yaongtuh, hatü nüngei lüng paitü kamtuh” shei e.

⁹ Chemjalak kü hapa shennyak meidai, hatü büpai lüng paitü kam. Hapayü Sabbath nyih nyuteke.

¹⁰ Hanangkü Jehoda ami tüngpü meipü shennyak kü, “Shinnyih-ü Sabbath nyih; nüngi nüngei lüng paitü kamhenü shahkung kü nejiü” shei e.

¹¹ Shejao büpai jomphong kü, “Ngei meihüpü shennyaki ngei kü, ‘Nüngei lüng paitü kamtuh’ shei ephopeih” shei e.

¹² Jomi büpa kü, “Nüng kü, ‘Nüngei lüng paitü kamtuh’ shei epü shennyakü üpaang?” shei phe.

¹³ Shejao hapa tüngpü shennyaki büpa tüngpü üpai meishuohpa nenying; mehenangkü Jisu-ü hatouei nyupü khong kü vukdaiteke.

¹⁴ Pheishi Jisui büpa phopshemei heüei büpa kü, “Veituh, nüng meidaiteke! Nüng hajük kü mang thah-ei tenyu; hei nevaijema lemhük nemeipü dhaümkahen” shei e.

¹⁵ Hapa shennyak daiyei Jehoda am kü büpa meihüpeyü Jisu khih shei eshuoh.

¹⁶ Hanangkü Jisui hapa keipü douthü Sabbath nyih dükpü nangkü Jehoda ami büpa kü shüveihen chongpang.

¹⁷ Jisui jomphong kü, “Ngelei Opai shinnyih-ao dou düknyüke, hatü ngeiyao düknyüpeih” shei e.

¹⁸ Ha tata kü Jehoda am nyeinya büpa jühen yem, mehenangkü büpai Sabbath mangpü mon nevai, shejao büpai Kahvang kü büpalei Pa shei nyükei büpa nying Kahvang mü hükkeipü leiteke.

Halei Wong

¹⁹ Jisui jomphong kü, “Hingmei mü ngei am kü enyeih, Ha-i büpai mongpü meheyao nedükaoknyih, shejao Pa-i mehe dükei ee, ha mon düknyüpeih; mehenangkü mehe mehe Pa-i düknya, Ha-i hapakei düknyüpeih.

²⁰ Pa-i Ha kü bamnyüpeih, hatü büpai ha mao longpü douthü huphahen, shejüang am thamahen.

²¹ Pa-i dipü kübü yangei leitü jom kü yangnyu shuohpükei Ha-iyao büpai mongpüthü kü yangnyu shuohnyeih.

²² Pa-i üpa kao shah nephennyih, shejao shahphenpü peü Ha kü shuohtükteke,

²³ shejüang Pa kü dhüm hupükei Ha kao dhüm huhen. Üpai Ha kü dhüm nehu, büpai büpa shompü Pa kü dhüm nehunyu” shei e.

²⁴ “Hingmei mü ngei am kü enyeih, üpai ngelei shah banghen hatü ngei shompüba kü hinglemhen yangnyuyem nyüpeih, hatü shahphenpülei nepeihen, shejao dipü kübü yangnyuyem touei lüdaiteke.

²⁵ Hingmei mü ngei am kü enyeih, dipüthüi Kahvang Halei ngeü danhen, hatü ha danpüthü yemmü nyuhen hepak ngoikünyüke, hatü hayü shaang khih.

²⁶ Mehenangkü Pa kü büpa kü-üng yangnyuyem nyupü keiha Ha kao büpa kü yangnyuyem nyuhen shuohpeih;

²⁷ hatü büpai büpa kü shahphenhen wong shuohpeih; mehenangkü büpayü Shennyak Ha nyüke.

²⁸ Ammi ha kü tethama; mehenangkü mahngshalei nyupüthüi büpalei ngeü danhen hepak ngoikünyüke,

²⁹ hatü haleipü paoei vamkahen; mei dükpüthü yangnyuyem touei yangei leikahen, hatü mang dükpüthüao nyonghühen shingvaishi yangei leihen.”

Jisu kü Denpüthü

³⁰ “Ngei mongpü kü meheyao nedüknyih. Ngei danpükei ngei shahphennyeih, hatü ngei shahphenpeyü shahhing; mehenangkü ngei mongpü dükhen ngei neyemnyih, shejao üpai ngei shom büpai mongpü düknyeih.”

³¹ “Ngei-i ngei nying kü denpü shuohhahjema ngelei denpeyü nejiü.

³² Ngelei men kü denpü shuohpü hük nyüpeih, hatü büpalei denpeyü ngei keyü jiüangke shei ngei nying.

³³ Ammi Johan touei phongmokbüthü shom, hatü büpai shahhing kü denpü shuohteke.

³⁴ Ngei hangkulei denpü yahnyeih shei nevai, shejao am yanghen shingvaishi ngei hathü enyeih.

³⁵ Büpayü bahpü hatü nyapü awdük nyuteke, hatü amphong kansho hük büpalei vangngai kü mongongshi nyu.

³⁶ Shejao Johani denpü mao nyeipü denpü hük ngelei nyüpeih. Pa-i ngei kü temhen shingvaishi shuohpü ngei shaang dükpü douthü homei Pa-i ngei shompeih shei denpü shuohnyüke.

³⁷ Ngei shompü Pa-i büpa nyingi ngei nangkü denpü shuohteke. Ammi büpalei ngeü mechemao nedan nevaijü büpalei dhe ne-ee;

³⁸ hatü büpalei shah ammei mong kü netuh; mehenangkü büpai üpa shom, ha kü ammi hingnelem.”

³⁹ “Ammi laihing yemnyüke; mehenangkü halei yangnyuyem nyüpeih shei ammi deihnyüke; ha laihingthüi ngei jung denpü shuohnyüke,

⁴⁰ shejao yangnyuyem danghen shingvaishi ammi ngei touei peihen nemongnyu.

⁴¹ Ngei hangku leipü dupü-oupü neyemnyih,

⁴² shejao ammei mongdangei Kahvang bampü nenyu shei ngei nyingnyüpeih.

⁴³ Ngei Opalei men kü yiüpeih, shejao ammi ngei neyah; lebü hük büpalei men kü peikülang meyü ammi büpa yahhen vaipeih.

⁴⁴ Üpa mon Kahvang nyu, ammi büpa leipü peipü müknyinshekhang neyemi am hüki hük leipü dupü-oupü yemyaki mekei etü am hinglemhen?

⁴⁵ Pa touei ngei am nyonghühen shei tedeih; am nyonghühenü ammi monglempü Mosa nyüke.

⁴⁶ Ammi Mosa kü hinglemjema ngei kü hinglemhen vaipeih; mehenangkü büpai ngei jung nyangpeih.

⁴⁷ Shejao büpai nyangpü kü ammi hingnelemjema, ngei epü kü mekei etü ammi hinglemhen?”