JOHAN 20 - DAÜLANGPÜ LAIHING (BSI)

Jisu Yangei Leipü

¹ Hat kü shongpü nep, pibom kü Mary Magdalen mahngchongei heih, hatü mahngchong leipü yaong ngowtüktü ee.

² Hanangkü pinnyüi mokei leiyei Simon Peter, hatü Jisui bampü lebü nanglom hük kü, “Jomphongi mahngchong leipü Shembüpa yahlangteke, hatü büpa melei vüpüshang nenyingang” shei e.

³ Hahepak kü Peter hatü lebü nanglom nyi layaongei mahngchongei heih.

⁴ Jiji chemi mok, shejao lebü nanglomi Peter kü yeiyei büpai shong mahngchong ngoi.

⁵ Büpai phaangei mongei veishuohjü ngeihpü nyemin ashak mon haüshi ee, shejao büpa mongei neshü.

⁶ Hahepak kü Simon Peter büpa phei müshi ngoiyei mahngshalei shüteke. Büpai ngeihpü nyemin ashak haüshi ee,

⁷ hatü Jisulei shangjing kü shakpü ashakü büm kü ngeihpü ashak mü khaatei hayaoha dütü shing hükei nyu.

⁸ Hahepak kü lebü nanglom üpa shongei mahngchong ngoi, büpaao mongei shü hatü büpaiyao ha eetü hinglem;

⁹ mehenangkü hahepak thahshi büpa dipü kübü yangei leihen shei epü laihing nenyingaok.

¹⁰ Hapheikü nanglom nyi shemei leidai.

Jisu Mary Magdalen Touei Vampü

¹¹ Shejao Mary payü mahngchong shelei thepei yaong. Pinnyü thepshingkü mahngshalei veihen aümei sha;

¹² hatü pinnyüi vangsho phongshan nyi shola ow owtü Jisulei mahng shangjing lemei hük hatü la lemei hük uoshi ee.

¹³ Jiji-i pinnyü kü, “Nyüha, nüng mehekei thepnya?” shei e. Pinnyüi jiji kü, “Jomi ngelei Shembüpa yah-ei lüdaiteke, hatü jomi büpa melei tuhtükpüshang ngei nenyingang” shei e.

¹⁴ Ha etü mechem pinnyüi yaakei leipa, hatouei Jisu yaongshi ee, shejao pinnyüi hapayü Jisu khih shei nenying.

¹⁵ Jisui pinnyü kü, “Nyüha, nüng mehekei thepnya? Nüngi üpa yemnya?” shei e. Pinnyüi hapa shennyakü pe dükpü am khih shei deih-ei, “Longpüba, nüngi büpa yah-ei lüdaipü vaijema, nüngi büpa melei tuhpüshang eshih, ngei büpa yah-ei lüdaihen hih” shei e.

¹⁶ Jisui pinnyü kü, “Mary!” shei e. Pinnyüi yaakei büpa kü Hebrew shah mü Rabboni (lappai, Nyuhbü) shei e.

¹⁷ Jisui pinnyü kü, “Nüngi ngei kü laki tedükpha; mehenangkü ngei Opa touei mangaongpih. Shejao ngelei jeihinaüthü touei daiyei jomphong kü, ‘Ngei ngelei Opa hatü ammei Pa, hatü ngelei Kahvang hatü ammei Kahvang touei aongdainyuja’ shei etuh” shei eteke.

¹⁸ Hanangkü Mary Magdalen daiyei nanglomthü kü, “Ngei Shembüpa eetepih” shei e, hatü büpai hathü shah ngei kü ephopeih shei pinnyüi e.

Jisu Nanglomthü Touei Vampü

¹⁹ Hat kü shongpü nyih om kü mechem nanglomthüi Jehoda am kü nyemei sha küptü thaiyei nyupa, Jisu peiyei jomphong khong touei yaongtü, “Amphong mü chingmei nyutuh” shei e.

²⁰ Büpai ha epheikü büpai jomphong kü büpalei lak hatü haampat hushuoh. Hahepak kü nanglomthüi Jisu eeyei mongong.

²¹ Jisui shao jomphong kü, “Amphong mü chingmei nyutuh. Opa-i ngei shompükei ngeiyao amphong shomnyeih” shei e.

²² Mechem büpai ha epa, büpai jomphong kü ngüi dutü jomphong kü, “Laangha Daülangpü yahtuh.

²³ Ammi hanei amei mang tükjema, jomei mang tüktükteke; ammi hanei amei mang netükjema jomei mang netüki nyüke” shei e.

Jisu hatü Thomas

²⁴ Shejao Thomas (üpa kü Didymus shei nyük), anpünyi khongkü hük Jisu peishingkü büpa nenyu.

²⁵ Hanangkü lebü nanglomthüi büpa kü, “Hamphongi Shembüpa eetepih” shei e. Shejao büpai jomphong kü, “Ngei büpalei lakbha kübü kojal kaw mang-ee thahshi hatü hapa kojal kaw hatü haampat kübü makaw kü ngelei lakjaangi mangyuk thahshi ngei hingnelempih” shei e.

²⁶ Hapta hük pheikü shao büpalei nanglomthü hapa shemei nyu, hatü Thomas-ü jomphong mü nyu. Sha küptü nyujao Jisu peiyei jomphong touei yaongtü, “Amphong mü chingmei nyutuh” shei e.

²⁷ Hahepak kü büpai Thomas kü, “Nüngei lakjaangi hammü yuktuh, hatü ngelei lak kü veituh. Nüngei lak deiyei ngelei haampat kü yuktuh. Nüng tejü-ü shejao hinglemtuh” shei e.

²⁸ Thomas-i büpa kü, “Ngelei Shembüpa, ngelei Kahvang!” shei e.

²⁹ Jisui büpa kü, “Nüngi ngei eepü nangkü hinglemnyu je? Üami ne-ee shejao hinglemnya, jomphong moihiman” shei e.

Hapa Laitapei Mükhong

³⁰ Shaang Jisui büpalei nanglomthü mü nyangeihepü longi dük, hatü hathü ha lai kü nyangei neshiü.

³¹ Shejao hathüyü ammi Jisu-ü Messiah, Kahvang Ha shei hinglemhen, hatü ha kü hinglempü homei ammi büpalei men kü yangnyuyem danghen shingvaishi nyangnyüpeih.