JOHAN 2 - DAÜLANGPÜ LAIHING (BSI)

Kana Chingei Yiükjingpü

¹ Nyih jempabü kü Galil kahdok Kana chingei yiükjing mo hük nyu, hatü halei Jisulei chenyüao omei nyu.

² Hapa yiükjing mo kü Jisu hatü büpalei nanglomthü kao nyük.

³ Mechem yiü kemdaipa, Jisulei chenyüi büpa kü, “Jom yiü kemdaiteke” shei e.

⁴ Jisui pinnyü kü, “Nyüha, ngei mehe dükhen, ha nüngi te-epha. Ngelei hepak shao mangngoi” shei e.

⁵ Chenyüi chongphobüthü kü, “Büpai mehe ephahenshang ha düktuh” shei e.

⁶ Shaang Jehoda amei vanglem aimü daühen shingvaishi dük dok kho hük shing shüpü yaongi lingpü yungdük vok shemshi nyuteke.

⁷ Jisui jomphong kü, “Hathü yungdük kü yung maei shihtuh” shei e. Jomi dükju thahshi yung müngteke.

⁸ Hapheikü büpai jomphong kü, “Shaang haleipü hanei shoei mo shembü touei deijatuh” shei e. Hanangkü jomphongi ha dei.

⁹ Mechem nemnopüthüi yungi lingpü yiü kü jepei veipa, yung shopü chongphobüthüi nyingjao ha meleipü nemnopüthüi nenyingi jomi mo shembüpa kü nyüktü,

¹⁰ büpa kü, “Peüi meipü yiü shong shuohnyeih; yenthüi moh-ei yingpheikü mon maani nemeipü yiü bhenyüpeih, shejao nüngü shaang thahshi hajük meipü yiü joshi angpü je?” shei phe.

¹¹ Jisui hayü Galil kahdok Kana chingei shongpü yashanpü dou dükei pangpü nyuteke. Hapakei büpalei müknyinshekhang shakei vam, hatü büpalei nanglomthüi büpa kü hinglem.

¹² Hapheikü büpai chenyü, chenaüthü hatü nanglomthü mü Kapernaumei yiüei halei nyih maani nyu.

Jisui Phopshem Daühüpü

¹³ Jehoda amei Hompü Mo yoei nyushi Jisu Jerusalemei aong.

¹⁴ Phopshemei büpai mohoh, mi hatü athuba, hatü lop jeiteipüthü haüdü touei uoshi ee.

¹⁵ Büpai vülepi bheiyaki phopshem leipü mohoh hatü mithü changtük. Büpai shao lop jeiteipüthülei lop haitük hatü jomei haüdü khüptük.

¹⁶ Büpai athuba yupüthü kü, “Hatoueipü hathü dou yahlangtuh! Opalei shem amphongi bhei leihshing teleitük!” shei e.

¹⁷ “Nüngei shem kü nyakpükenpai ngei awi kei hahtükhen” shei nyangei nyupü büpalei nanglomthüi deih-ei dang.

¹⁸ Hahepak kü Jehoda ami büpa kü “Nüngi hathü peü dükhen wong nyüpeih shei huaokhen mü mehe nyangeihepü huaokhen?” shei eteke.

¹⁹ Jisui jomphong kü, “Hapa moila shem bentü nyih jem mongkü shao vehen hih” shei e.

²⁰ Hahepak kü Jehoda ami, “Hapa phopshem bong pinyipü vok yah-ei vepeih, shejema nüngi nyih jem mongkü bentü veaokhen je?” shei phe.

²¹ Shejao büpai büpalei büm phopshem jung eteke.

²² Büpa dipü kübü yangei leipheikü büpalei nanglomthüi büpai ha epü khih shei deih-ei dang, hatü jomi laihing hatü Jisui epü shahthü kü hinglem.

²³ Mechem Hompü Mo hepak kü büpa Jerusalemei nyupa, longshi shing büpa kü hinglem; mehenangkü jomi büpai dükpü yashanpü douthü eeteke.

²⁴ Shejao Jisui payü jomphong kü hingnelem; mehenangkü büpai nanglakthüi deihpü peü nyingdai,

²⁵ hatü büpa shingvaishi shennyak hük shing shennyak hük leipü denpü nadang neshiü; mehenangkü shennyak peü kü mehe nyu, ha büpai nyingdaikem.