JOHAN 15 - DAÜLANGPÜ LAIHING (BSI)

Jisu-ü Hingshangpü Nyalingngupai

¹ Ngeiyü hingshangpü nyalingngupai, hatü Opayü pe dükbü.

² Ngei kü nyupü betjük nejükpü kaothü büpai langtüknyeih, hatü betjük jükpü kao shao nyeishi jükhen shingvaishi büpai hapa kao daütüknyeih.

³ Ngei am kü epü shah-i am daüdaiteke.

⁴ Ngei kü nyutuh, hatü ngei am kü nyuhen. Pü bümnyü kü nenyupheikü kao hük mekei etao betjük nejükaok; hapa keiha ngei kü nenyupheikü am nyingi betjük jüknüng neaok.

⁵ Ngeiyü pünyü büm, amphongü kaothü. Üpai ngei kü nyuhen, ngei büpa kü nyuhen, hatü büpai betjük longi jükhen; mehenangkü ngei mü yanei ammi meheyao nedükaokhen.

⁶ Üam ngei kü nenyu, hathüyü kao hük kei yaktüknyeih hatü vandainyeih; hapa keipü kaothüyü thaiyei aw kü shükei jaktüknyeih.

⁷ Amphong ngei kü nyujema hatü ngelei shahthü am kü nyujema, ammi mehe na ha yütuh hatü ha am kü shuohhen.

⁸ Ammi betjük longi jükpai ngelei nanglomthü khih shei huhen; hapai Opa müknyinshekhanghühen.

⁹ Opa-i ngei kü bampü keiha ngeiyao amphong kü bamnyeih; ngei kü nyutuh.

¹⁰ Ammi ngelei shahkungthü bangjema, ngei Opalei shahkungthü bangei büpa bampü kü nyupükei amphongao ngei bampü kü nyuhen.

¹¹ Ngelei mongong am kü nyuhen hatü am mongongpü changhühen shingvaishi ngei hathü am kü epeih.

¹² Ngei am kü bampü keiha am hüki hük mü bamteituh; hapayü ngelei shahkungnyü.

¹³ Küphü hük shingvaishi laophülei yangnyu lanei shuohpü mü nyeipü lebü bampü neshiü.

¹⁴ Ngei am kü epü dükjema amphongü ngelei küphüthü.

¹⁵ Ngei hajük kü amphong kü aathü shei nenyüknyih; mehenangkü shembüi mehe düknya, ha aa hüki nenyingnyih; shejao ngei am kü küphüthü shei nyüknyeih; mehenangkü ngei Opa leipü danpü peü ngei am kü nyinghütepih.

¹⁶ Ammi ngei neje, shejao ngei amphong jepeih. Am daiyei betjük jükhen, hatü den kü nyuhen betjük jükhen shingvaishi ngei amphong jepeih; shejüang ngelei men kü ammi mehe mehe Opa kü yühenshang büpai ha am kü shuohhen.

¹⁷ Am hüki hük mü bamteihen shingvaishi ngei hathü shahkung shuohnyeih.

Kahdoknyüi Jiühitpü

¹⁸ Kahdoknyüi am kü jiühitjema, am kü jiühit shekü ngei kü jiühitteke shei ammi nyingtuh.

¹⁹ Amphong kahdoknyülei vailangmeyü kahdoknyüi laophülei lompü kei bamphahen. Mehenangkü amphongü kahdoknyülei nevai, shejao kahdoknyü kübü ngei amphong jelangpü nangkü kahdoknyüi am kü jiühitnyüke.

²⁰ “Aathüyü shembü mü longpü nevai” shei ngei am kü epü shah deih-ei dangtuh. Jomi ngei kü dangkao shüveijema, am kao shüveiphahen. Jomi ngelei shah bangjema, ammei shah-ao bangkahen.

²¹ Shejao ngelei men tata kü jomi am kü ha douthü dükphahen; mehenangkü üpai ngei shom, jomi büpa nenying.

²² Ngei paoh peiyei jom kü ne-elangmeyü jom mang nethahhah shepeih; shejao shaangü jomei mang nangkü jom kü mang tükpü neshiü.

²³ Üpai ngei kü jiühitnya, Opa kao jiühitnyüke.

²⁴ Üpaiyao mangdükpü dou ngei jomphong touei nedüklangmeyü jomi mang nethahhah shepeih. Shejao shaang jomi ha eeteke, hatü ngei hatü Opa henjiphen kü jiühitnyüke.

²⁵ Jomei shahkung kü, “Meheyao ten neshiüpü kü jomi ngei kü jiühitteke” shei nyangei nyupü ha jiühen shingvaishi vamteke.

²⁶ Ngei am kü Opa leipü shompü Sheühbü mechem peikahen, Opa leipü peipü shahhing Laanghai ngei nangkü denpü shuohhen.

²⁷ Pangpü mebü am ngei mü nyuhamphei vaipü nangkü ammiyao ngei jung denpü shuohtuh.