JOHAN 14 - DAÜLANGPÜ LAIHING (BSI)

Jisu Mon Lemnyü

¹ Amphong mongteshang. Kahvang kü hinglemtuh, hatü ngei kao hinglemtuh.

² Opalei shemei nyushing longi nyüke. Hei nevailangmeyü ngei amphong kü ephahen vaipeih. Ngei am shing nyushing hük temnüng dainyeih.

³ Ngei daiyei am shing shing hük tempheikü ngei nyipabü yiüei ngei mü nyuhen shingvaishi ngei am yahhen, hatü ngei melei nyu, halei amphongao nyuhen.

⁴ Ngei melei dainya, ha lem amphongi nying.

⁵ Thomas-i büpa kü, “Shembüpa, nüng melei dainya hami nenying, shejema hami mekei etü lem nyinghen?” shei e.

⁶ Jisui jangei, “Ngeiyü lemnyü, shahhing hatü yangnyu; ngei nehompheikü üpaiyao Opa touei nepeiaokpih.

⁷ Ammi hingshangi ngei nyinglang meyü ammi Opayao nyinghen vaipeih. Shaang mü leitü ammi büpa nyingnyüke hatü eeteke” shei e.

⁸ Philipi büpa kü, “Shembüpa, hamphong kü Opa hushih, hatü hapai ham shing changpü vaihen hih” shei e.

⁹ Jisui jangei, “Ngei amphong mü hajük hepak lushi nyupheikü nüngi ngei nenyingnyu je? Üpai ngei ee, büpai Opa eeteke. ‘Ham kü Opa hushih’ shei nüngi mekei enya?

¹⁰ Ngei Opa kü hatü Opa ngei kü nyüpeih shei nüngi nenyingang je? Ngei nüng kü epü shahthüyü ngelei lompü shah nevai. Shejao hapayü Opa, üpa ngei kü nyu, büpai ha dou düknyüke.

¹¹ Ngei Opa kü hatü Opa ngei kü nyüke shei ngei kü hinglemtuh; nüngi hapakei hingnelemjema, yashanpü douthü kü dangkao hinglemtuh.

¹² Hingmei ngei am kü enyeih, üpai ngei kü hinglemhen, büpai ngei dükpü douthü dükaokhen; hingmei, ngei dükpü kao nyeishi dükaokhen; mehenangkü ngei sheyü Opa touei lüdainyeih.

¹³ Ha kü Pa müknyinshekhanghen shingvaishi ammi ngelei men kü mehe yühenshang ngei ha shuohhen.

¹⁴ Ngelei men kü ammi mehe yühenshang ngei ha am kü shuohhen” shei e.

Laangha Daülangpü Shomhen Lahpü

¹⁵ Ammi ngei kü bamjema, ngelei shahkungthü banghen.

¹⁶ Ngei Opa kü yühen, hatü büpai am kü lebü Sheühbü hük den kü am mü nyuhen yahphahen.

¹⁷ Hapayü shahhing Laangha. Kahdoknyüi büpa neyah-aok; mehenangkü kahdoknyüi büpa ne-eeaok nevaijü nenyingaok. Shejao ammi büpa nying; mehenangkü büpa am mü nyüke, hatü am kü nyukahen.

¹⁸ Ngei amphong hashihha kei netuhphongpih; ngei nyipabü yiükahen.

¹⁹ Kansho hük pheikü kahdoknyüi ngei ne-eehen, shejao ammi ngei eehen; mehenangkü ngei yemmü nyupü nangkü amao yemmü nyuhen.

²⁰ Hapa nyih kü ngei Opa kü nyüke, amphong ngei kü nyüke hatü ngei am kü nyüke shei nyinghen.

²¹ Üam kü ngelei shahkungthü nyu hatü hathü düknya, hathüyü ngei kü bampüthü, hatü üami ngei kü bamnya, hathü kü Opai bamhen, hatü ngei jom kü bamhen hatü ngei jom kü shakei vamhen.

²² Judas-i (Iskariot nevai) büpa kü, “Shembüpa, nüngi mekei kahdoknyü touei nevai-i hamphong touei shakei vamhen?” shei e.

²³ Jisui büpa kü, “Üami ngei kü bamnya, hathüi ngelei shahthü banghen, hatü Opa-i hathü kü bamhen, hatü ham jom touei peiyei jom mü chemi shemong hük leiyei nyuhen.

²⁴ Üami ngei kü nebam, hathüi ngelei shahthü nebangnyih, hatü ammi danpü shah-ü ngelei nevai, shejao hapayü ngei shompü Opa leipü hih” shei e.

²⁵ Ngei am mü nyushingkü hathü ngei am kü etepih.

²⁶ Shejao Sheühbü, Laangha Daülangpü, üpa ngelei men kü Opa-i shomhen, büpai am kü lemphü nyuhphahen, hatü ngei am kü epü peü deih-ei lehühen.

²⁷ Ngei am mü chingmei tuhphünyeih; ngelei chingmei ngei am kü shuohnyeih. Kahdoknyüi shuohpükei ngei am kü neshuohnyih. Ammei mong teshanghü nevaijü tenyemhü.

²⁸ Ngei am kü, “Ngei lüdainyeih, hatü ngei am touei peikahen” shei epü ammi danteke. Ammi ngei kü bamjema ngei Opa touei lüdaipü kü ammi bamhen; mehenangkü Opayü ngei mü longpüba.

²⁹ Ha vamshekü ngei am kü ha yeihshi enyeih, hatü mechem ha vamhenshang, ammi ha kü hinglemhen.

³⁰ Ngei amphong mü hajük kü ahshi ne-ehen; mehenangkü hapa kahdoknyü vanglem lembü peikünyüke. Büpa ngei shak kü mehe wongao neshiü;

³¹ Ngei Opa kü bamnyüke shei kahdoknyüi nyinghen shingvaishi ngei Opa-i epü düknyüpeih. Yaongtuh, jen daishah.