JOHAN 12 - DAÜLANGPÜ LAIHING (BSI)

Mary-i Jisu kü Vong Meipü Meli Phupü

¹ Hompü Mo ngoihen nyih vok shekü Jisui Bethanylei dipü kübü yangei leishihpü Lazar amei shemei pei.

² Halei jomi büpa kü bhaong üh. Martha-i nemno hatü Lazar-ü büpa mü nükdü kü chemi hah-ei nyu.

³ Mary-i longi bhei wongpü vongmei meli shong hük deiyei Jisulei la kü phutü pinnyülei sho-i thit. Hapa shem meli vongi mateke.

⁴ Shejao Judas Iskariot, büpalei nanglomthü khongkü hüki (üpai büpa luhahhen nyu),

⁵ “Mehekei hapa vongmei meli nanglat kho jemei bhei kü yutü hapa lop taopathü küang neshuohnya?” shei e.

⁶ Büpai hapayü taopathü kü kenpü nangkü nevai, shejao büpayü gühpa nyu; büpai khongei lop tuw noteke, hatü büpai haleipü güh-ei noteihamteke.

⁷ Jisui, “Pinnyü hei-üng nyemnyu. Pinnyüi hayü ngei mahng vühen nyih shingvaishi nyingshangi yongei tuhpü khih.

⁸ Am mü taopathü düngei nyuhen, shejao ngei am mü düngei nenyukahen” shei e.

Lazar Jühen Tempü

⁹ Mechem Jehoda am khong longpai büpa Bethanylei nyükeja shei danpa, jomi Jisu nangkü mon nevai, shejao büpai yangei leishihpü Lazar kao veihen pei.

¹⁰ Hanangkü ngongpathüi Lazarao jühen küpjan tem;

¹¹ mehenangkü hapayü büpa tata kü Jehoda ami jom yakphongtü Jisu kü hinglemei lüdai.

Aokpü Dangei Jisu Jerusalemei Yiüpü

¹² Nyihphei mo kü peipü khongnyü longpai Jisu Jerusalemei peiteke shei dan.

¹³ Hanangkü jomi phenhavunglak bhagei büpa mü pongteinüng, “Hosanna! Üpa Shembüpa, Israel Ongpalei men kü peikünya moihimantuh!” shei lenyaki peiteke.

¹⁴ Jisui gadu cheha hük yah-ei hapa kü uo; ha nyangei nyüke:

¹⁵ “Tenyem, Zion nela Veituh, ammei ongpa gadu dok shangkü uotü peikünyüke.”

¹⁶ Büpalei nanglomthüi shongei ha nenyingaok, shejao mechem Jisu müknyinshekhangpa, hapheikü jomi büpa nang hathü nyangei nyüke, hatü büpa kü ha dükteke shei deih-ei dang.

¹⁷ Hanangkü büpai mahngsha leipü Lazar kü nyüktü yangei leishihpü hepak kü büpa mü nyupü khongi nedoh-i büpa jung denpü shuoh.

¹⁸ Büpai hapa nyangeihepü dükpüja shei danpü nangkü khongnyüi büpa mü pongnüng pei.

¹⁹ Hahepak kü Pharisee am hüki hük mü, “Veihümao, jeni meheyao nedükaokhen khih. Veituh, kahdoknyü-ü büpa phei müdaiteke” shei etei.

Greek am Hanei Jisu kü Veihüpü

²⁰ Shaang mo kü khümnüng peipü khongkü Greek am hanei nyuteke.

²¹ Jomi Galil leipü Bethsaida am Philip kü peiyei, “Longpüba, hamphongi Jisu kü veihüangke” shei e.

²² Philip heih-ei Andrew kü e, hatü Andrew hi Philip nyi heih-ei Jisu kü e.

²³ Jisui jiji kü, “Shennyak Ha müknyinshekhanghen hepak ngoiteke.

²⁴ Hingmei ngei am kü enyeih, hahkuk hük kahdokei vüei mangdi thahshi hahkuk lakshing nyunyeih, shejao ha dijema, hapai betjük longi jüknyeih.

²⁵ Üami laophülei yangnyu kü bamnya mahtükhen, hatü üami hapa kahdoknyü kü laophülei yangnyu kü jiühitnya, vanyangyem shingvaishi yangei tuhhen.

²⁶ Üami ngei chongphonya, ngei phei mütuh, hatü ngei melei nyu, halei ngelei chongphobüthü nyuhen. Üami ngei chongphonya, Opai-i dhüm huhen” shei e.

Jisui Büpa Dihen Jung Enyüke

²⁷ “Shaang ngei mongshangnyüke, hatü ngei mehe ehenang? Opa, hapa hepak kübü ngei yangtuh shei ehen hiang? Nevai, hapa shangpong hepak homei daihen tata kü ngei peipeih.

²⁸ Opa, nüngei men müknyinshekhangtuh.” Hahepak kü, “Ngei müknyinshekhangtepih, hatü shao müknyinshekhanghen” shei vangsho leipü ngeü vam.

²⁹ Hatouei nyupü khongi ha danei hapayü vangmuk khih shei e. Lebüthüi, “Vangsho phongshan hüki büpa kü epü khih” shei e.

³⁰ Jisui, “Hapa ngeü-ü ngelei men kü nevai, ammei men kü peipü khih.

³¹ Shaangü hapa kahdoknyü kü shahphenhen hepak; shaangü hapa kahdoknyü kübü vanglem lembü changtükhen hepak.

³² Mechem ngei hapa kahdoknyü kübü shangei anlanghen, ngei laophü touei nanglak peü yahlanghen” shei e.

³³ Büpai ha epeyü mekeipü shangpongi büpa dihen, ha nang eteke.

³⁴ Khongi büpa kü, “Messiah-ü den kü nyunyeih shei hami shahkung leipü danpeih. Nüngi mekei etü Shennyak Ha shangei anshihhen shei enya? Shennyak Ha shei epeyü üpaang?” shei e.

³⁵ Jisui jomphong kü, “Amphong mü vangngai kansho hük nyuhen. Am mü vangngai nyushingkü vangngai kü kamtuh, shejüang vangnyaki am she neyeihen. Amphong shangmang kü kamjema, am melei dainya nenyinghen.

³⁶ Amphong vangngai hathü leihen shingvaishi vangngai am mü nyushingkü hapa vangngai kü hinglemtuh” shei e. Jisui hathü epheikü büpa daiyei jomphong toueipü jodai.

Shennyakthüi Hingnelempü

³⁷ Büpai jom touei nyangeihepü longi dükjao jomi büpa kü hingnelem.

³⁸ Hapayü Isaiah thibüi epü shah jiühen shingvaishi vamteke: “Shembüpa, üpai jenei shahjangmei kü hinglempa, hatü üpa kü Shembüpalei lak shakei vampa?”

³⁹ Hanangkü jomi hingnelemaok; mehenangkü Isaiah-i shao,

⁴⁰ “Büpai jomei mük phüngtük, hatü jomei mong vaantük, hanangkü jomei müki neveiaok, hatü jomei mongi nenyingaoki lepdai– hatü ngei jom meitükhen.”

⁴¹ Isaiah-i hapa epeyü büpai Jisulei müknyinshekhang eepü nangkü büpa nang epeih.

⁴² Shejoongpa longi, mübüthüao omshi büpa kü hinglem. Shejao Pharisee ami jom Sinagog leipü changshuohhen khih shei nyempü nangkü jomi hinglempü ngaiheyei nelah;

⁴³ mehenangkü jomi Kahvangi vihpü meyü shennyaki vihpü lümdai.

⁴⁴ Hahepak kü Jisui lenei, “Mechem shennyak hük ngei kü hinglemnya, büpai ngei kü mon hinglemnyu nevai, shejao üpai ngei shom büpa kao hinglemnyeih.

⁴⁵ Üpai ngei eenya, büpai ngei shompübaao eenyüke.

⁴⁶ Ngei kü vaipü üpaiyao vangnyak kü nekamhen shingvaishi ngei kahdoknyülei vangngai hük kei yiüpeih” shei e.

⁴⁷ Ngelei shah dantü nedükpü shennyak shingvaishi ngei shah nephennyih; mehenangkü ngeiyü kahdoknyü shahphenhen yiüpü nevai, yanghen yiüpeih.

⁴⁸ Ngei yaktükpü hatü ngelei shah tüktükpü shingvaishi shahphenbü hük nyüke; dohpü nyih ngei epü shah-i büpa nyonghühen.

⁴⁹ Mehenangkü ngei ngei mongpü ne-enyih, shejao ngei shompü Opa-i mehe ehen, mekei ehen ha ngei kü shahkung shuohpeih.

⁵⁰ Hapa shahkungi yangnyuyem touei münyeih shei ngei nying. Hanangkü ngei mehe enya hayü Opa-i etuh shei epü enyeih.